1 Lot junt nich daut Hoat be-orrujen! Jleeft aun Gott un jleeft aun Mie! 2 En mien Voda sien Hus sent väl Woninjen; wan daut nich soo wia, wudd Ekj junt daut jesajcht haben; Ekj go han, junt eene Städ reed to moaken. 3 Un wan Ekj hango un junt eene Städ reedmoak, dan kom Ekj wada un woa junt no Mie nämen, om daut jie uk doa sent, wua Ekj sie. Joh 12:26; 17:24 4 Un wua Ekj hango, weet jie, un dän Wajch weet jie.

5 Tomas sajcht to Am: Har, wie weeten nich, wua Du hanjeist, un woo kjenn wie dän Wajch weeten? 6 Jesus sajcht to am: Ekj sie de Wajch un de Woarheit un daut Läwen; kjeena kjemt nom Voda, buta derch Mie. Mat 11:27; Joh 10:9; Ree 5:1-2; Heb 10:20 7 Wan jie Mie jekjant hauden, wudd jie mienen Voda uk jekjant haben; un von nu aun kjan jie Am un haben Am jeseenen.

8 Filippus sajcht to Am: Har, wies ons dän Voda, daut woat ons jenuach sennen. 9 Jesus sajcht to am: Soo lang sie Ekj bie junt, un du hast Mie nich jekjant, Filippus? Wäa Mie jeseenen haft, dee haft dän Voda jeseenen; un woo sajchst du, wies ons dän Voda? Joh 12:45; Heb 1:3 10 Jleefst du nich, daut Ekj em Voda sie un de Voda en Mie es? De Wieed, dee Ekj to junt räd, räd Ekj nich von Mie selfst; oba de Voda, dee en Mie wont, Hee deit de Woakjen. Joh 12:49 11 Jleeft Mie, daut Ekj en däm Voda sie un de Voda en Mie es; wan nich, dan jleeft Mie doch wäajens de Woakjen. Joh 10:25,38 12 Woarhauftich, woarhauftich, Ekj saj junt: Wäa aun Mie jleeft, dee woat uk de Woakjen doonen, dee Ekj doo un woat jratre aus dise doonen, wiels Ekj go no mienem Voda. Mat 28:19 13 Un wautemma jie bedden woaren en mienem Nomen, daut well Ekj doonen, om daut de Voda veharlicht woat en däm Sän. Joh 15:7; 16:24; Mrk 11:24; 1Joh 5:14-15 14 Wan jie no waut froagen woaren en mienem Nomen, daut woa Ekj doonen.

15 Wan jie Mie leewen, dan hoolt miene Jebooten; Joh 15:10; 1Joh 5:3 16 un Ekj well dän Voda bedden, un dee woat junt eenen aundren Treesta* jäwen, daut dee eewich bie junt bliewen woat; Joh 15:26; 16:7 17 dän Jeist von de Woarheit, dän de Welt nich kjrieen kaun, wiels dee Am nich sitt uk nich kjant; jie oba kjanen Am, wiels Hee blift bie junt un woat en junt sennen. Joh 16:13 18 Ekj woa junt nich aus Weisen loten; Ekj kom no junt. 19 Noch een kjlienet Stootje, un de Welt sitt Mie nich mea; jie oba seenen Mie; wiels Ekj läw, sell jie uk läwen. Joh 20:20 20 Aun däm Dach woa jie erkjanen, daut Ekj en mienem Voda sie un jie en Mie un Ekj en junt. 21 Wäa miene Jebooten haft un helt dee, dee es daut, dee Mie leeft; wäa oba Mie leeft, woat von mienem Voda jeleeft woaren, un Ekj woa am leewen un Mie selfst to am openboaren. Joh 16:27; 1Joh 5:3

22 Dan sajcht to Am Judas, nich Iskariot: Har, woo es daut, daut Du Die to ons openboaren west un nich to de Welt? 23 Jesus auntwuad un säd to am: Wan irjentwäa Mie leeft, dan woat hee mien Wuat* hoolen; un mien Voda woat am leewen, un Wie woaren no am komen un Woninj bie am moaken. Spr 8:17; Efs 3:17 24 Wäa Mie nich leeft, dee helt miene Wieed nich; un daut Wuat, waut jie hieren, es nich mient, oba däm Voda sient, dee Mie jeschekjt haft. Joh 7:16-17

25 Dit hab Ekj to junt jerät, wäarent Ekj bie junt wia. 26 Oba de Treesta, de Heilja Jeist, dän de Voda en mienem Nomen schekjen woat, dee woat junt aules lieren un junt aun aules erinren, waut Ekj junt jesajcht hab. 27 Dän Fräd lot Ekj junt, mienen Fräd jäw Ekj junt; nich, soo aus de Welt jeft, jäw Ekj junt. Lot jun Hoat nich be-orrujen un nich ferchten. Joh 16:33; Flp 4:7

28 Jie haben jehieet, daut Ekj junt jesajcht hab: Ekj go han un kom wada no junt. Wan jie Mie leewden, dan wudd jie junt freien, daut Ekj jesajcht hab: Ekj go nom Voda; wiels mien Voda es jrata aus Ekj. 29 Un nu hab Ekj junt daut jesajcht, ea daut passieet, daut, wan et passieet, jie jleewen wudden. 30 Ekj woa nich mea väl met junt räden; wiels doa kjemt de Väaschta von dise Welt un haft en Mie nuscht; Joh 12:31; Efs 2:2 31 oba om daut de Welt weeten saul, daut Ekj dän Voda leew un jrod soo doo, aus de Voda Mie jeboden haft. Stot opp un lot ons hia wajchgonen. Joh 10:18