1 Dit räd Jesus un hoof siene Uagen opp nom Himmel un säd: Voda, de Stund es jekomen; veharlich dienen Sän, soo daut uk dien Sän Die veharlicht. 2 Jrod soo aus Du Am Macht jejäft hast äwa aul daut Fleesch, om daut Hee aul dee eewjet Läwen jeft, dee Du Am jejäft hast. Mat 11:27 3 Dit es oba daut eewje Läwen, daut see Die erkjanen, dän auleen woaren Gott, un dän Du jeschekjt hast, Jesus Christus. 1Joh 5:20 4 Ekj hab Die veharlicht opp Ieeden; Ekj hab dien Woakj vollbrocht, daut Du Mie jejäft hast, daut Ekj doonen sull. 5 Un nu veharlich Du Mie, Voda, bie Die selfst met de Harlichkjeit, dee Ekj bie Die haud, ea de Welt wia. Joh 1:1; Flp 2:6

6 Ekj hab de Menschen dienen Nomen jeopenboat, dee Du Mie ut de Welt jejäft hast; dee wieren diene, un Du hast Mie dee jejäft, un see haben dien Wuat jehoolen. 7 Nu erkjanen see, daut aules, waut Du Mie jejäft hast, es von Die. 8 Wiels de Wieed, dee Du Mie jejäft hast, hab Ekj äant jejäft, un see haben dee aunjenomen un haben woarhauftich erkjant, daut Ekj von Die rutjegonen sie, un see jleewen, daut Du Mie jeschekjt hast. Joh 16:30 9 Ekj bedd fa äant; Ekj bedd nich fa de Welt, oba fa dee, dee Du Mie jejäft hast, wiels see sent diene. Joh 6:37,44 10 Un aules, waut mient es, es dient, un waut dient es, es mient; un Ekj sie en äant veharlicht. Joh 16:15 11 Un Ekj sie nich mea en de Welt, oba dise sent en de Welt, un Ekj kom no Die. Heilja Voda, bewoa äant en dienem Nomen, dee Du Mie jejäft hast, soo daut see eent sent, jrod soo aus Wie. 12 Aus Ekj bie äant en de Welt wia, hilt Ekj äant en dienem Nomen; dee, waut Du Mie jejäft hast, hab Ekj bewoat, un kjeena von äant es veloaren, aus bloos de Sän vom Vedoawen, soo daut de Schreft erfelt wort. Ps 41:10; Joh 6:39

13 Nu oba kom Ekj no Die, un dit räd Ekj en de Welt, soo daut see miene Freid vollkomen en sikj haben. Joh 15:11 14 Ekj hab äant dien Wuat jejäft, un de Welt haust äant, wiels see nich von de Welt sent, jrod soo aus Ekj nich von de Welt sie. Joh 15:19 15 Ekj bedd nich, daut Du äant ut de Welt rutnemst, oba daut Du äant bewoaren wurscht ver däm Beesen. Mat 6:13; 2Tess 3:3 16 See sent nich von de Welt, jrod soo aus Ekj uk nich von de Welt sie. 17 Heilj äant en diene Woarheit; dien Wuat es de Woarheit. Ps 119:160 18 Jrod soo aus Du Mie en de Welt nenjeschekjt hast, soo hab uk Ekj äant en de Welt jeschekjt. Joh 20:21 19 Un Ekj heilj Mie selfst fa äant, soo daut uk see sellen jeheilicht sennen en de Woarheit. Heb 10:10

20 Ekj bedd oba nich fa dise auleen, oba uk fa dee, dee derch äa Wuat aun Mie jleewen woaren, Ree 10:17 21 om daut see aula sellen eent sennen, jrod soo aus Du, Voda, en Mie un Ekj en Die, om daut uk see en Ons sellen eent sennen, soo daut de Welt jleeft, daut Du Mie jeschekjt hast. Gal 3:28 22 Un Ekj hab de Harlichkjeit, dee Du Mie jejäft hast, äant jejäft, daut see sellen eent sennen, jrod soo aus Wie eent sent. Apj 4:32 23 Ekj en äant un Du en Mie, om daut see sellen vollkomen en Eenheit sennen, om daut de Welt erkjanen saul, daut Du Mie jeschekjt hast un äant leefst, jrod soo aus Du Mie leefst. 1Kor 6:17

24 Voda, Ekj well, daut, wua Ekj sie, uk dee sellen bie Mie sennen, dee Du Mie jejäft hast, daut see miene Harlichkjeit seenen, wiels Du hast Mie jeleeft, ver de Welt-Gruntlajunk. Spr 8:22-31; Joh 12:26

25 Jerajchta Voda, de Welt kjant Die nich; oba Ekj kjan Die, un dise erkjanen, daut Du Mie jeschekjt hast. 26 Ekj hab äant dienen Nomen bekaunt jemoakt un woa dän bekaunt moaken, om daut de Leew, wuamet Du Mie jeleeft hast, en äant sull sennen un Ekj en äant.