1 Un aus Hee vebie-jinkj, sach Hee eenen Mensch, dee blint wia von Jeburt aun. 2 Un siene Jinja fruagen Am un säden: Rabbi, wäa haft jesindicht, disa ooda siene Elren, daut hee blint jebuaren es? Luk 13:2 3 Jesus auntwuad: Nich disa haft jesindicht uk nich siene Elren; oba daut Gott siene Woakjen aun am sullen openboat woaren. Joh 11:4 4 Ekj mott de Woakjen von däm wirkjen, dee Mie jeschekjt haft, soolang aus daut Dach es; doa kjemt de Nacht, wan kjeena wirkjen kaun. Jer 13:16; Joh 5:17 5 Soolang aus Ekj en de Welt sie, sie Ekj daut Licht fa de Welt. Joh 8:12; 12:35 6 Aus Hee dit jesajcht haud, spieech Hee opp de Ieed un muak een Blott von daut Kjwiel un schmäad daut Blott opp däm Blinjen siene Uagen Mrk 8:23 7 un säd to am: Go han, un wausch die em Siloa Wota (daut meent äwasat: Jeschekjt). Dan jinkj hee han un wosch sikj un kjeem seenent.

8 De Nobasch dan, un deejanje, dee am ea aus eenen Blinjen jeseenen hauden, säden: Es daut nich dee, dee doa saut un prachad? 9 Atelje säden: Hee es dee; aundre säden: Hee es am änlich; hee oba säd: Ekj sie dee. 10 Dan säden see to am: Woo sent diene Uagen opjemoakt worden? 11 Hee auntwuad un säd: Een Mensch, Jesus jenant, muak een Blott un beschmäad miene Uagen un säd to mie: Go han nom Siloa Wota un wausch die. Aus ekj hanjinkj un mie wosch, wort ekj seenent. 12 Dan säden see to am: Wua es Hee? Hee säd: Ekj weet nich.

13 Dan leiden see dän, dee ieescht blint wia, no de Farisäa. 14 Daut wia oba Sabat, aus Jesus daut Blott muak un am de Uagen opmuak. 15 Dan fruagen uk de Farisäa am wada, woo hee wia seenent jeworden. Hee säd to äant: Hee läd mie Blott opp de Uagen, un ekj wosch mie un kaun seenen. 16 Dan säden atelje von de Farisäa: Dis Mensch es nich von Gott, wiels Hee dän Sabat nich helt. Aundre säden: Woo kaun een sindja Mensch soone Wundawoakjen doonen? Un daut jeef eene Spoolunk mank äant. 17 Dan säden see wada to däm Blinjen: Waut sajchst du von Am, daut Hee diene Uagen opjemoakt haft? Hee oba säd: Hee es een Profeet.

18 De Juden jleewden nich von am, daut hee blint jewast wia, un seenent jeworden wia, bat see de Elren von däm Seenent-Jewordnen jeroopt hauden. 19 Un see fruagen äant un säden: Es dit jun Sän, von däm jie sajen, daut hee blint jebuaren wia? Woo sitt hee dan nu? 20 Siene Elren auntwuaden äant un säden: Wie weeten, daut disa ons Sän es un daut hee blint jebuaren wia; 21 oba woo hee nu sitt, weet wie nich, un wäa am de Uagen opjemoakt haft, weet wie uk nich. Hee es oolt jenuach, froacht am, hee woat fa sikj selfst räden. 22 Dit säden siene Elren doawäajen, wiels see de Juden ferchten; wiels de Juden wieren aul äwareen jekomen, daut, wan irjentwäa Am aus Christus bekjanen wudd, daut dee ut de Synagoge utjeschloten woaren sull. Joh 7:13; 12:42 23 Doawäajen säden siene Elren: Hee es oolt jenuach; froacht am selfst.

24 Dan roopten see dän Mensch toom tweedemol, dee blint jewast wia, un säden to am: Jeff Gott de Iea, wie weeten, daut dis Mensch een Sinda es. 25 Dan auntwuad hee un säd: Auf Hee een Sinda es, weet ekj nich; eenatlei weet ekj, daut ekj blint wia un nu seenent sie. 26 Un see säden wada to am: Waut haft Hee die jedonen? Woo muak Hee diene Uagen op? 27 Hee auntwuad äant: Ekj hab junt daut aul jesajcht, un jie haben goanich jehorcht; wuarom well jie daut wada hieren? Well jie uk siene Jinja woaren? 28 Dan schempten see am un säden: Du best sien Jinja; wie oba sent Moses siene Jinja. 29 Wie weeten, daut Gott to Moses jerät haft; von disem oba weet wie nich, wua Hee häa es. 30 Dan auntwuad de Mensch un säd to äant: Daut es doch wundalich, daut jie nich weeten, wua Hee häa es, un Hee haft miene Uagen opjemoakt. 31 Wie weeten oba, daut Gott nich opp Sinda horcht; oba wan wäa gottesferchtich es un sienen Wellen deit, dän hieet Hee. Ps 66:18; Spr 15:29; Jes 1:15 32 Von Eewichkjeit häa es nich jehieet worden, daut irjentwäa eenem Blintjebuarnen de Uagen opjemoakt haft. 33 Wan disa nich von Gott wia, kunn Hee nuscht doonen. 34 See auntwuaden un säden to am: Du best gaunz en Sinden jebuaren un lieescht ons? Un see staden am rut.

35 Jesus hieed, daut see am rutjestat hauden; un aus Hee am funk, säd Hee to am: Jleefst du aun Gott sien Sän? 36 Hee auntwuad un säd: Wäa es Hee, Har, soo daut ekj aun Am jleew? 37 Un Jesus säd to am: Du hast Am jeseenen, un dee met die rät, daut es dee. Joh 4:26 38 Hee oba säd: Ekj jleew, Har, un bäd Am aun.

39 Un Jesus säd: Ekj sie toom Jerecht en dise Welt jekomen, daut dee, dee nich seenen, seenent woaren, un dee doa seenen, blint woaren. Mat 13:11-15 40 Un atelje von de Farisäa, dee bie Am wieren, hieeden dit* un säden to Am: Sent wie dan uk blint? 41 Jesus säd to äant: Wan jie blint wieren, dan haud jie kjeene Sind; oba nu saj jie: Wie sent seenent, soo blift june Sind. Joh 15:22