1 Dan säd Hee to de Jinja: Daut es onmäajlich, daut nich Oajanissen komen; wee oba däm, derch wäm see komen! 2 Daut wudd am bäta sennen, wan een Molsteen om sienen Hauls jehongen wort un en daut Mäa jeschmäten, aus daut hee eent von dise Kjliene beleidjen wudd. 3 Heet junt selfst: Wan oba dien Brooda jäajen die sindicht, vemon am; un wan hee Busse deit, vejeff am. Mat 18:15 4 Un wan hee säwenmol dän Dach jäajen die sindicht un säwenmol dän Dach trigj-kjemt un to die sajcht: Ekj doo Busse; dan saust du am vejäwen. Mat 18:21-22

5 Un de Apostel säden to däm Harn: Vemia ons dän Gloowen! 6 De Har oba säd: Wan jie Gloowen hauden soo aus een Sampkuarn, dan wudd jie to disem Mulbäaboom sajen: Wartel die ut un veplaunt die en daut Mäa; un hee wudd junt jehorchen. Mat 17:20; 21:21

7 Oba wäa von junt, dee eenen Kjnajcht haft, dee doa plieecht ooda Vee heet, wan dee von de Stap trigj-kjemt, wudd to am sajen: Kom fuaz häa un sat die aum Desch? 8 Wudd hee nich ea to am sajen: Moak daut reed, waut ekj to Owentkost äten woa, un binj die daut Schalduak om un deen mie, bat ekj jejäten un jedrunken hab; un nohäa saust du äten un drinkjen? 9 Dankt hee däm Kjnajcht, wiels hee deed, waut hee am befolen haud? Ekj jleew nich! 10 Jrod soo uk jie, wan jie aules jedonen haben, waut junt befolen es, sajcht: Wie sent onnutzboare Kjnajchts; wie haben jedonen, waut wie to doonen schuldich wieren. 1Kor 9:16

11 Un daut passieed, aus Hee no Jerusalem reisd, daut Hee medden derch Samaria un Galiläa jinkj. Luk 9:51; 13:22 12 Un aus Hee en een jewesset Darp nenjinkj, bejäajenden Am tieen leprakranke Mana, dee von wietauf stunden 3Mo 13:45-46 13 un hoowen äare Stemm opp un säden: Jesus, Liera, hab Metleet met ons! 14 Un aus Hee äant sach, säd Hee to äant: Got han un wiest junt de Priesta! Un daut passieed, wäarent see jinjen, worden see rein. Luk 5:14 15 Eena oba von äant, aus hee sach, daut hee wia jeheelt worden, kjeem trigj un lowd Gott met lude Stemm 16 un foll opp sien Jesecht ver siene Feet un dankt Am; un hee wia een Samarita. 17 Dan auntwuad Jesus un säd: Sent nich tieen rein jeworden? Wua sent oba de näajen? 18 Haft sikj sest kjeena jefungen, dee trigj-kjeem un jeef Gott de Iea, aus mau dis Framda? 19 Un Hee säd to am: Sto opp, un go han; dien Gloowen haft die jerat. Luk 7:50

20 Un aus Hee von de Farisäa jefroacht wort, wanea Gott sien Rikj komen wudd, auntwuad Hee äant un säd: Gott sien Rikj kjemt nich met de Beoobachtunk; Joh 18:36 21 see woaren uk nich sajen: Kjikj hia! Ooda: Kjikj doa! Wiels kjikj, Gott sien Rikj es en junt. 22 Dan säd Hee to de Jinja: Doa woaren Doag komen, wua jie wenschen woaren, eenen von däm Menschensän siene Doag to seenen, un jie woaren dän nich seenen. 23 Un see woaren to junt sajen: Kjikj hia! Kjikj doa! Got nich han, folcht äant uk nich. Luk 21:8 24 Wiels jrod soo aus de Blitz von een Enj unjarem Himmel blizt un schient bat aum aundre Enj unjarem Himmel, soo woat uk de Menschensän sennen aun sienem Dach. 25 Oba Hee mott ieescht väl lieden un von dise Jennerazion veschmäten woaren. Luk 9:22

26 Un soo aus daut en Noah siene Doag wia, soo woat daut uk en däm Menschensän siene Doag sennen: 1Mo 6:9-7:23 27 See eeten, see drunken, see befrieden sikj un worden jejäft toom befrieen, bat aun dän Dach, aus Noah en de Arche nenjinkj, un de Sintflut kjeem un brocht äant aula om. 28 Jrod soo aus daut uk passieed en Loot siene Doag: See eeten, see drunken, see koften, see vekoften, see plaunten, see buden; 1Mo 19:15,24-25 29 oba aun däm Dach, aus Loot ut Sodom jinkj, räajend daut Fia un Schwäwelblitt vom Himmel un brocht äant aula om. 30 Jrod soo woat daut uk aun däm Dach sennen, wan de Menschensän woat openboat woaren. 31 Wäa aun däm Dach oppem Husdak es un siene Dinja em Hus haft, saul nich raufstieen, dee to holen; jrod soo uk, wäa oppe Stap es, saul nich trigjkomen. 32 Denkjt aun Loot siene Fru! 1Mo 19:26 33 Wäa siene Seel sieekjt to raden, dee woat dee velieren; un wäa dee velieren woat, woat dee behoolen. Luk 9:24 34 Ekj saj junt: En jane Nacht woaren twee en een Bad sennen; eena woat jenomen woaren, un de aundra woat jeloten woaren. 35 Twee woaren toop molen; eene woat jenomen woaren, un de aundre woat jeloten woaren. 36 Twee woaren opp de Stap sennen; eena woat jenomen woaren, un de aundra woat jeloten woaren. 37 Un see auntwuaden un säden to Am: Wua, Har? Un Hee säd to äant: Wua de Kjarpa es, doa saumlen sikj de Odlasch.