1 Un see kjeemen no de aundre Sied vom Mäa en de Jäajent von de Gadarena. 2 Un aus Hee ut daut Schepp jestäajen wia, bejäajend Am fuaz ut de Jräwa een Mensch met eenem onreinen Jeist, 3 dee siene Woninj en de Jräwa haud; un kjeena kunn am binjen, uk nich emol met Kjäden. 4 Wiels hee wia aul foaken met Spaunsels un met Kjäden jebungen jewast, un de Kjäden wieren von am veräten worden un de Feetspaunsels vereef hee, un kjeena kunn am bandjen. 5 Un hee wia aule Tiet, Nacht un Dach, opp de Boaj un en de Jräwa, schrieech un vewund sikj selfst met Steena. 6 Aus hee oba Jesus von wietauf sach, rand hee un schmeet sikj ver Am dol, 7 un met lude Stemm schrieech hee un säd: Waut hab ekj met Die to doonen, Jesus, du Sän vom aulahechsten Gott. Ekj beschwia Die bie Gott, kjwäl mie nich! Mrk 1:24 8 Wiels Hee säd to am: Foa du rut, du onreina Jeist, ut däm Mensch! 9 Un Hee fruach am: Waut es dien Nomen? Hee auntwuad un säd: Legion es mien Nomen, wiels wie sent väle. 10 Un hee prachad Am sea, daut Hee äant nich ut de Jäajent rutschekjen wudd. 11 Doa wia bie de Boaj eene groote Häad Schwien, dee grosden doa. 12 Un aul de Diewels prachaden Am un säden: Schekj ons en de Schwien, daut wie kjennen en dee nenfoaren. 13 Un Jesus erlaubd äant daut fuaz. Un dee onreine Jeista fuaren rut un fuaren en de Schwien nenn, un de Häad schmeet sikj vom Eewa rauf en daut Mäa nenn (daut wieren bie twee-dusent); un dee vesoopen em Mäa.

14 Un de Schwienshoad randen un säden daut en de Staut un oppem Launt. Un see jinjen rut, om to seenen, waut passieet wia. 15 Un see komen no Jesus un seenen dän Besätnen setten, dee de Legion haud, jekjleet un veninftich, un see ferchten sikj. 16 Un dee daut jeseenen hauden, vetalden äant, woo daut jeworden wia met däm Besätnen un von de Schwien. 17 Un see fungen aun Am to prachren, daut Hee ut äare Jrensen veloten sull.

18 Un aus Hee en daut Schepp stieech, prachad Am, dee besäten jewast wia, daut hee mucht bie Am sennen. 19 Oba Jesus leet am nich un säd to am: Go han no dien Hus un no de Dienje un saj äant, waut fa Grootet de Har aun die jedonen haft un sikj äwa die erboarmt haft. 20 Un hee jinkj han un funk aun en de Tieen-Städa to vekjindjen, waut fa Grootet Jesus aun am jedonen haud; un see vewundaden sikj aula. Mrk 7:31

21 Un aus Jesus wada em Schepp no de aundre Sied äwajefoaren wia, vesaumeld sikj eene groote Volkjshäad bie Am, un Hee wia aum Mäa. 22 Un kjikj, doa kjeem eena von de Synagogen-Väastona, met Nomen Jairus, un aus hee Am sach, foll hee ver siene Feet 23 un prachad Am sea un säd: Miene kjliene Dochta es aum Stoawen; ekj bedd Die, daut Du kjemst un lajchst ar de Henj opp, daut see jesunt woat un läwen kaun. 24 Un Hee jinkj met am, un eene groote Volkjshäad foljd Am un drenjd Am.

25 Un doa wia eene Fru, dee aul twalw Joa eenen Blootfluss haud 3Mo 15:19-27 26 un haud väl jeläden von väle Doktasch, un haud aul äa Hab-un-goot vebrukt, onen daut ar daut jeholpen haud, oba wia leewa schlemma jeworden. 27 Aus see von Jesus hieed, kjeem see en* daut Volkj von hinjen un schieed sien Kjleet aun; 28 wiels see säd: Wan ekj bloos sien Kjleet aunschieren kaun, dan woa ekj jesunt sennen. 29 Un fuaz vedrieejd äare Bloot-Kjwal, un see moakjt aum Kjarpa, daut see von de Ploag jeheelt wia. 30 Un Jesus erkjand fuaz aun sikj selfst, daut Krauft von Am rutjegonen wia un dreid sikj om em Volkj un säd: Wäa haft miene Kjleeda aunjeschieet? Luk 6:19 31 Un siene Jinja säden to Am: Du sitst, daut de Volkjshäad Die drenjt, un Du frajchst: Wäa haft Mie aunjeschieet? 32 Un Hee kjikjt sikj rom, to seenen, wäa daut jedonen haud. 33 Oba de Fru, voll Forcht un Zetren, wist, waut met ar passieet wia, kjeem un foll ver Am dol un säd Am de gaunze Woarheit. 34 Hee oba säd to ar: Dochta, dien Gloowen haft die jeheelt; go en Fräd un sie jesunt von diene Ploag!

35 Wäarent Hee noch räd, kjeemen eenje von däm Synagogen-Väastona siene un säden: Diene Dochta es jestorwen; wuarom bemieechst du noch wieda dän Meista? 36 Oba fuaz, aus Jesus daut Wuat hieed, waut jerät wia, säd Hee to däm Synagogen-Väastona: Fercht die nich, jleew bloos! 37 Un Hee leet kjeenem met Am metkomen, buta Petrus un Jakobus un Johanes, Jakobus sien Brooda. Mat 17:1 38 Un Hee kjemt en daut Hus von däm Synagogen-Väastona un sitt een Jetimmel un dee doa roaden un lud hielden. 39 Un aus Hee nenjekomen wia, säd Hee to äant: Wuarom moak jie een Jetimmel un roaren? Daut Kjint es nich jestorwen, oba schlapt. Joh 11:11 40 Un see lachten Am ut. Aus Hee oba aule rutjedräwen haud, nemt Hee dän Voda von daut Kjint un de Mutta un dee bie Am wieren un jeit doa nenn, wua daut Kjint lieech. 41 Un Hee foot daut Kjint bie de Haunt un säd to ar: Talita kumi! Daut es äwasat: Mejalkje, Ekj saj die, sto opp! Luk 7:14; Apj 9:40 42 Un fuaz stunt daut Mejalkje opp un jinkj, wiels daut wia twalw Joa oolt. Un see staunden met een grootet Staunen. 43 Un Hee jeboot äant strenj, daut dit kjeena weeten sull, un säd, ar sull waut to äten jejäft.