1 Un Hee jinkj wada en de Synagoge nenn; un doa wia een Mensch, dee eene vedrieejde Haunt haud. 2 Un see luaden opp Am, auf Hee am uk aum Sabat heelen wudd, om daut see Am vekloagen kunnen. 3 Un Hee säd to däm Mensch, waut de vedrieejde Haunt haud: Sto opp un kom hia enne Medd. 4 Un Hee säd to äant: Es daut erlaupt, aun de Sabaten Goodet to doonen ooda Beeset to doonen, daut Läwen to raden ooda doot to moaken? See oba wieren stell. 5 Un wäarent hee opp äant romkjikjt met Oaja, betriept wäajen äare hoatnakje Hoaten, säd Hee to däm Mensch: Strakj diene Haunt ut! Un hee strakjt dee ut, un siene Haunt wort wada jesunt häajestalt soo aus de aundre. 6 Un de Farisäa jinjen rut un hilden fuaz Rot met de Herodiauna jäajen Am, woo see Am ombrinjen kunnen.

7 Un Jesus jinkj wajch met siene Jinja aun daut Mäa; un eene groote Häad foljd Am von Galiläa un von Judäa Mat 4:25 8 un von Jerusalem un von Idumäa un von jantsied Jordan; un dee rom Tierus un Sidon, eene groote Häad, aus see jehieet hauden, woo väl Hee deed, kjeem no Am. 9 Un Hee säd to siene Jinja, daut see een Schepkje sullen reedstonen haben fa Am wäajen de Volkjshäad, daut see Am nich bedrenjen sullen. 10 Wiels Hee heeld väle, soo daut aule, dee doa Ploagen hauden, Am aunfollen, om Am aun to schieren. 11 Un wan de onreine Jeista Am sagen, follen see ver Am dol, schrieejen un säden: Du best Gott sien Sän. Luk 4:41 12 Un Hee bedreiwd äant sea, daut see Am nich sullen bekaunt moaken. Mrk 1:43-44

13 Un Hee stieech opp dän Boajch un roopt no sikj wäm Hee wull; un see kjeemen no Am. 14 Un Hee bestald twalw, daut see bie Am sennen sullen, daut Hee äant utschekjen kunn, om to prädjen 15 un Macht to haben, Krankheiten to heelen un de Diewels rut to driewen. 16 Un Hee jeef Simon dän Bienomen Petrus; 17 un Jakobus, Zebedäus sien Sän, un Johanes, de Brooda von Jakobus, un Hee jeef äant dän Bienomen Boanerges, daut meent: Donnasäns; Luk 9:54 18 un Andreas un Filippus un Bartolomäus un Matäus un Tomas un Jakobus, däm Alfäus sien Sän, un Tadäus un Simon, de Kanaanita, 19 un Judas Iskariot, dee Am uk veroot.

20 Un see kjeemen no een Hus, un doa kjeem wada ne Volkjshäad toop, soo daut see nich mol Broot äten kunnen. 21 Un aus de Sienje daut hieeden, jinjen see rut, om Am faust to hoolen*, wiels see säden: Hee es buta sikj. Mrk 6:4; Joh 7:5; 8:48

22 Un de Schreftjelieede, dee von Jerusalem raufjekomen wieren, säden: Hee haft dän Beelzebub, un derch dän bowaschten von de Diewels drift Hee de Diewels rut. Mat 9:34 23 Un Hee roopt äant no sikj un räd en Jlikjnissen to äant: Woo kaun Soton dän Soton rutdriewen? 24 Un wan een Rikj met sikj selfst oneenich woat, kaun daut Rikj nich bestonen. 25 Un wan een Hus met sikj selfst oneenich woat, kaun daut Hus nich bestonen. 26 Un wan de Soton jäajen sikj selfst oppsteit un oneenich woat, kaun hee nich bestonen, oba nemt een Enj. 27 Kjeena kaun en eenem Stoakjen sien Hus nengonen un siene Jieta plindren, wan hee nich ieescht dän Stoakjen binjt, un dan woat hee sien Hus plindren. 28 Ekj saj junt woarhauftich: Aule Sinden woaren de Menschenkjinja vejäft woaren, un Lastrungen, wuamet see lastren; 29 oba wäaemma jäajen dän Heiljen Jeist lastat, haft en Eewichkjeit kjeene Vejäwunk, oba es daut eewje Jerecht schuldich. Heb 6:4-6 30 Wiels see säden: Hee haft eenen onreinen Jeist. Joh 10:20

31 Dan kjeemen siene Mutta un siene Breeda; see oba stunden buten un schekjten no Am un roopten Am. 32 Un eene Volkjshäad saut rom Am. Un see säden to Am: Kjikj, diene Mutta un diene Breeda buten sieekjen no Die. 33 Un Hee auntwuad äant un säd: Wäa es miene Mutta ooda miene Breeda? 34 Un aus Hee runtom no dee em Kjreis kjikjt, dee rom Am sauten, säd hee: Kjikj, miene Mutta un miene Breeda! 35 Wiels wäaemma Gott sien Wellen deit, es mien Brooda un miene Sesta un Mutta.