1 Un Hee funk aun to äant en Jlikjnissen to räden: Een Maun plaunt eenen Wiengoaden, sad doa eenen Tun rom, growd een Wienpras-Loch, bud eenen Torm un vepacht dän aun Wiengoadna un reisd utem Launt. Jes 5:1-2 2 Aus daut Tiet wia, schekjt hee eenen Deena no de Wiengoadna, daut hee von de Wiengoadna von de Frucht von däm Wiengoaden kjrieen wudd. 3 Dee oba jreepen am, schluagen am un schekjten am ladich wajch. 4 Un wada schekjt hee eenen aundren Deena; dän vewunden see dän Kopp met Steena schmieten, un schekjten am beschämt wajch. 2Chr 36:16 5 Un hee schekjt wada eenen aundren, un dän muaken see doot; un väle aundre, eenje schluagen see, dee aundre muaken see doot. 6 Nu haud hee noch eenen Sän, sienen Jeleewden; dän schekjt hee tolatst uk no äant un säd: See woaren fa mienen Sän Respakjt haben. 7 Oba de Wiengoadna säden unjarenaunda: Dit es de Oaw; komt, lot ons am dootmoaken, dan woat daut Oafgoot ons sennen! 8 Un see neemen am un muaken am doot un schmeeten am ut däm Wiengoaden rut. Heb 13:12 9 Waut woat de Har von däm Wiengoaden dan doonen? Hee woat komen un de Wiengoadna ombrinjen un dän Wiengoaden aundre jäwen. 10 Hab jie noch nich dise Schreft jeläst: "De Steen, dän de Bulied veschmäten haben, dee es toom Haupt-Akjsteen jeworden. Ps 118:22-23 11 Dit es vom Harn jeworden, un daut es wundaboa en onse Uagen"? 12 Un see sochten Am to jriepen, oba ferchten sikj fa daut Volkj, wiels see wisten, daut Hee daut Jlikjnis opp äant jerät haud. Un see veleeten Am un jinjen wajch.

13 Un see schekjten no Am atelje von de Farisäa un von de Herodiauna, om Am en siene Räd to fangen. 14 Un dee kjeemen un säden to Am: Liera, wie weeten, daut Du woarhauftich best un Du best om kjeenen bekjemmat, wiels Du sitst nich daut Aunjesecht von Menschen, oba Du lieescht Gott sien Wajch en Woarheit. Es daut rajcht, däm Kjeisa Taks to jäwen, ooda nich? Sell wie jäwen, ooda sell wie nich jäwen? 15 Oba Hee moakjt äa Jeheichel un säd to äant: Wuarom vesieekj jie Mie? Brinjt Mie eenen Denarius*, daut Ekj dän seenen kaun. 16 Un see brochten eenen, un Hee säd to äant: Wäms Bilt un Enschreft es dit? See säden to Am: Däm Kjeisa siene. 17 Un Jesus auntwuad un säd to äant: Jäft däm Kjeisa, waut däm Kjeisa sient es un Gott, waut Gott sient es! Un see vewundaden sikj äwa Am. Ree 13:1,7

18 Un dan kjeemen de Saduzäa no Am, dee doa sajen, daut jeft kjeene Opparstonunk; un dee fruagen Am un säden: 19 Meista, Moses haft ons jeschräwen: Wan irjent eenem sien Brooda stoaft un hinjalat eene Fru un hinjalat kjeene Kjinja, dan saul sien Brooda däm siene Fru nämen un am Nokomenschoft erwakjen. 5Mo 25:5-6 20 Doa sent säwen Breeda jewast. De ieeschta neem eene Fru; un aus hee storf, hinjaleet hee kjeenen Nokomen. 21 Un de tweeda neem ar un storf un hinjaleet uk kjeenen Nokomen; un de dredda krakjt soo. 22 Un dee säwen neemen ar un hinjaleeten kjeenen Nokomen. Tolatst no aul dee storf uk de Fru. 23 Un nu en de Opparstonunk, wan see oppstonen woaren, wäms Fru von äant woat see sennen? Wiels de säwen haben ar to Fru jehaut. 24 Jesus auntwuad un säd to äant: Err jie nich doawäajen, wiels jie nich de Schreften uk nich Gott siene Krauft kjanen? 25 Wiels wan see von de Doodje oppstonen, woaren see nich frieen, un woaren uk nich jejäft toom befrieen, oba see sent soo aus de Enjel em Himmel. 26 Waut oba de Doodes aunbelangt, daut see oppstonen, hab jie nich en Moses sien Buak jeläst von daut Bosch, wua Gott to am säd: "Ekj sie Abraham sien Gott un Isaak sien Gott un Jakob sien Gott"? 2Mo 3:6 27 Hee es nich de Doodje äa Gott, oba de Läwendje äa Gott. Doawäajen err jie sea.

28 Un doa kjeem eena von de Schreftjelieede han, dee jehieet haud, woo see sikj enaunda befruagen un sach, daut Hee äant fein je-auntwuat haud un fruach Am: Woon Jeboot es daut ieeschte von aule? 29 Un Jesus auntwuad am: Daut ieeschte von aul de Jebooten es: "Horch, Israel, de Har, ons Gott, es een eensja Har; 30 un du saust dän Harn, dienen Gott, leewen met dien gaunzet Hoat un met diene gaunze Seel un met dien gaunzet Vestaunt un met aul diene Krauft." Dit es daut ieeschte Jeboot. 5Mo 6:4-5 31 Un daut tweede es daut jlikj: "Du saust dienen Näakjsten leewen soo aus die selfst." Jrata aus dise es kjeen aundret Jeboot. 3Mo 19:18 32 Un de Schreftjelieeda säd to Am: Rechtich, Meista, Du hast de Woarheit jerät; wiels doa es een Gott, un doa es kjeen aundra buta Am; Luk 20:39-40 33 un Am leewen von gaunzem Hoaten, von gaunzem Vestentnis un von de gaunze Seel un von aul de Krauft, un dän Näakjsten soo aus sikj selfst leewen, es mea aus aule Brauntopfasch un Schlachtopfasch. 1Sa 15:22; Hos 6:6; Mat 9:13 34 Un aus Jesus sach, daut hee vestendich je-auntwuat haud, säd Hee to am: Du best nich wiet von Gott sien Rikj. Un wieda wuach sikj kjeena mea Am waut to froagen. Apj 26:27-29

35 Un Jesus auntwuad un säd, aus Hee em Tempel lieed: Woo sajen de Schreftjelieede, daut de Christus David sien Sän es? Jes 11:1; Joh 7:42; Ree 1:3 36 David selfst säd doch derch dän Heiljen Jeist: "De Har haft to mienem Harn jesajcht: Sat Die to miene Rajchte, bat Ekj diene Fiend fa diene Feet to eene Footbenkj hanlaj." 2Sa 23:2; Ps 110:1 37 Aulsoo nant David selfst Am Har; wuahäa es Hee dan sien Sän? Un de groote Volkjshäad* hieed Am jieren.

38 Un Hee säd to äant en siene Lia: Heet junt fa de Schreftjelieede, dee jieren en lange Kjleeda romgonen un jleichen de Bejreessungen opp de Moakjt-Plaza 39 un de väaschte Setten en de Synagogen un de ieeschte Plaza bie de Gaustjebotts. 40 See fräten de Wätfrues äare Hiesa un toom Schien moaken see lange Jebäda. Dise woaren een schwandret Jerecht kjrieen. Jak 1:27

41 Un Jesus sad sikj dol jäajenäwa däm Gotteskausten un kjikjt, woo daut Volkj Jelt en dän Gotteskausten läd. Un väle Rikje läden doa väl nenn. 2Kje 12:10 42 Un doa kjeem eene oame Wätfru un läd twee Koppasch* nenn; daut es een Zent*. 43 Un Hee roopt siene Jinja no sikj un säd to äant: Ekj saj junt woarhauftich: Dise oame Wätfru haft mea en dän Gotteskausten enjelajcht aus aul dee, dee doa enjelajcht haben. 44 Wiels aula haben ut äa Äwafluss enjelajcht; dise oba haft von äare Oamoot aules, waut see haud, äa gaunzet Läwens-Meddel, enjelajcht.