1 Dan vesaumelden sikj bie Am de Farisäa un eenje von de Schreftjelieede, dee von Jerusalem jekomen wieren. 2 Un aus see eenje von siene Jinja met onreine, daut es, met onjewoschne Henj sagen Broot äten, beschuljden see äant. 3 (Wiels de Farisäa un aul de Juden äten nich, buta wan see sikj ieescht jrintlich* de Henj jewoschen haben, wiels see hoolen äare Eltestasch äare Ordnunk; 4 un wan see vom Moakjt-Plauz komen, äten see nich, onen sikj ieescht to wauschen, un väl aundre Dinja sent doa, dee see aunjenomen haben to hoolen, soo aus daut Wauschen von Kuffels un Kaunen, bronsne Jefässa un Deschen.) Mat 23:25

5 Dan fruagen de Farisäa un Schreftjelieede Am: Wuarom waundlen diene Jinja nich no de Ordnunk von de Eltestasch, oba äten daut Broot met onjewoschne Henj? 6 Hee oba auntwuad un säd to äant: Fein haft Jesaja von junt Heichla jeprofezeit, soo aus jeschräwen steit: "Dit Volkj ieet Mie met de Leppen, oba äa Hoat es wietauf von Mie. Jes 29:13 7 Oba vejäfs bäden see Mie aun, wiels see lieren soone Lieren, dee Menschen-Jebooten sent." 8 Wiels jie veloten Gott sien Jeboot, un hoolen de Menschen-Ordnunk, soo aus daut Kaunen un Kuffels Wauschen, un väl soone änliche Dinja doo jie. 9 Un Hee säd to äant: Sea fein sat jie Gott sien Jeboot tosied, om june Ordnunk to hoolen. 10 Wiels Moses haft jesajcht: "Iea dienen Voda un diene Mutta"; un: "Wäa Voda ooda Mutta flieekjt saul dän Doot stoawen." 2Mo 20:12; 21:17; 1Tim 5:4-8 11 Oba jie sajen: Wan een Mensch to däm Voda ooda to de Mutta sajcht: "Korban," (eene Opfagow es daut), wautemma die von mie togood komen sull; 12 un soo lot jie am nuscht mea fa sienen Voda ooda siene Mutta doonen, 13 un soo moak jie Gott sien Wuat to nuscht derch june Ordnunk, dee jie äwarieekjt haben; un väl soone änliche Dinja doo jie.

14 Un Hee roopt aul daut Volkj no sikj un säd to äant: Horcht aula no Mie un moakjt! 15 Doa es nuscht von buten, waut en dän Mensch nenjeit, daut am ve-onreinjen kaun; oba waut von am rutkjemt, daut es et, waut dän Mensch ve-onreinicht. Apj 10:14-15 16 Wäa Uaren haft toom hieren, däm lot hieren!

17 Un aus Hee vom Volkj wajchjegonen wia, en een Hus nenn, fruagen siene Jinja Am äwa dit Jlikjnis. 18 Un Hee säd to äant: Sent jie uk soo onvestendich? Bejriep jie nich, daut aules, waut von buten en dän Mensch nenjeit, am nich ve-onreinjen kaun? 19 Wiels daut jeit nich en sien Hoat nenn, oba en sien Buck, un daut jeit rut en dän Aufgank, soo woat aul daut Äten jereinicht. 20 Un Hee säd: Waut ut däm Mensch rutjeit, daut ve-onreinicht dän Mensch; 21 wiels von bennen ut daut Menschenhoat, komen beese Jedanken, Ehebruchs, Huararieen, Morts, 22 Stälarieen, Habsucht*, Boosheit, Hinjalest, Fleescheslost, beeset Uag*, Lastrunk, Stolt, Domheit. 23 Aul dise schlajchte Dinja komen von bennen rut un ve-onreinjen dän Mensch.

24 Un Hee stunt opp von doa un jinkj en de Jrensen von Tierus un Sidon, un jinkj en een Hus un wull haben, daut et kjeena weeten sull un kunn doch nich vestoaken sennen. 25 Wiels eene Fru haud von Am jehieet, wäms kjliene Dochta eenen onreinen Jeist haud, kjeem un foll ver siene Feet. 26 De Fru wia oba eene griechische, ut Syro-Feenizien, von Jeburt; un see prachad Am, daut Hee dän Diewel von äare Dochta rutdriewen sull. 27 Oba Jesus säd to ar: Lot de Kjinja ieescht saut woaren; wiels daut es nich goot, de Kjinja äa Broot to nämen un de Hunj daut väa to schmieten. 28 See oba auntwuad un säd to Am: Jo, Har; oba soogoa de Hunjkjes unja däm Desch äten de Kjinja äare Kjreemels. 29 Un Hee säd to ar: Wäajens dit Wuat haulwen go han; de Diewel es ut diene Dochta rutjefoaren. 30 Un see jinkj han no äa Hus un funk, dän Diewel rutjefoaren un de Dochta oppem Bad ligjen.

31 Un Hee veleet de Jrensen von Tierus un Sidon wada un kjeem aun daut galiläische Mäa, medden derch de Omjäajenden von de Tieen-Städa. Mrk 5:20 32 Un see brochten eenen Doofen no Am, dee schwoa räden kunn un prachaden Am, daut Hee am de Haunt opplajen sull. 33 Un Hee neem am von de Volkjshäad oppoat un läd siene Finjasch en siene Uaren un spieech un tukst am aun de Tung, 34 un kjikjt nopp nom Himmel, un Hee seft un säd to am: Hefata! Daut meent: Moak die op! 35 Un fuaz worden siene Uaren opjemoakt, un de Baunt von siene Tung wort jeleest, un hee räd krakjt. 36 Un Hee jeboot äant, daut see daut to kjeenem sajen sullen; oba je mea Hee äant daut jeboot, soo väl mea muaken see daut bekaunt. Mrk 1:43-45 37 Un see staunden äwa aule Moten un säden: Hee haft aules goot jemoakt; Hee moakt de Doofe hieren un de Stomme räden.