1 De Aunfank vom Evangelium von Jesus Christus, Gott sien Sän, 2 soo aus jeschräwen steit en de Profeeten: "Kjikj, Ekj schekj mienen Bootschofta ver dien Aunjesecht, dee dienen Wajch ver Die reedmoaken woat". Mal 3:1; Mat 11:10 3 "Eene Stemm von een Roopenda en de Wiltnis: Moakt däm Harn sien Wajch reed, un moakt siene Stäaj jlikj!" Jes 40:3 4 Johanes kjeem un deept en de Wiltnis un prädijd de Doop von de Busse fa de Sinden-Vejäwunk. 5 Un doa jinkj no am rut daut gaunze judische Launt un aul dee von Jerusalem, un see worden aula von am em Jordan-Riefa jedeept un bekjanden äare Sinden. 6 Johanes oba wia jekjleet met Kameelhoa, un eenen Ladagort om siene Lint, un hee eet Heischrakjen un willen Honnich. 7 Un hee prädijd un säd: Doa kjemt Eena no mie, dee stoakja es aus ekj, däm ekj daut nich wieet sie, doljebekjt ver Am, de Benja aun siene Schoo op to leesen. 8 Ekj deep junt met Wota; Hee oba woat junt met däm Heiljen Jeist deepen.

9 Un daut passieed en deeselwje Doag, daut Jesus von Nazaret ut Galiläa kjeem un sikj von Johanes em Jordan deepen leet. Luk 2:51 10 Un fuaz, aus Hee utem Wota stieech, sach Hee, daut de Himmel sikj deeld, un de Jeist kjeem rauf opp Am soo aus eene Duw. 11 Un eene Stemm kjeem vom Himmel: Du best mien leewa Sän, aun däm Ekj Wooljefaulen hab. Mrk 9:7 12 Un fuaz dreef de Jeist Am rut en de Wiltnis nenn. 13 Un Hee wia vieetich Doag en de Wiltnis un wort vom Soton vesocht; un Hee wia bie de Tieren, un de Enjel deenden Am.

14 Oba nodäm Johanes faustjenomen wia, kjeem Jesus en Galiläa nenn un prädijd daut Evangelium von Gott sien Rikj 15 un säd: De Tiet es erfelt, un Gott sien Rikj es dichtbie-jekomen. Doot Busse un jleeft aun daut Evangelium! Gal 4:4 16 Un aus Hee aum Galiläische Mäa jinkj, sach Hee Simon un sienen Brooda Andreas, dee daut Nat en daut Mäa schmeeten, wiels see wieren Fescha. 17 Un Jesus säd to äant: Folcht Mie no, un ekj woa junt to Menschenfescha moaken! 18 Un soofuaz veleeten see äare Nats un foljden Am. 19 Un aus Hee von doa een bät wieda-jinkj, sach Hee Jakobus, Zebedäus sien Sän, un sien Brooda Johanes, dee uk em Schepp wieren un flekjten äare Nats. 20 Un fuaz roopt Hee äant, un see leeten äaren Voda Zebedäus met de Aunjenomne em Schepp un jinjen Am hinjaraun.

21 Un see jinjen en Kapernaum nenn; un Hee kjeem fuaz aum Sabat en de Synagoge un lieed. 22 Un see staunden äwa siene Lia; wiels Hee lieed äant aus eena, dee Vollmacht haft un nich soo aus de Schreftjelieede. Mat 7:28-29 23 Un doa wia en äare Synagoge een Mensch met eenem onreinen Jeist, dee schrieech 24 un säd: Lot toch! Waut hab wie met Die to doonen, Jesus von Nazaret? Best Du jekomen, ons to vedoawen? Ekj weet, wäa Du best: Gott sien Heilja. Mrk 5:7 25 Un Jesus bedreiwd am un säd: Sie stomm un foa ut am rut. 26 Un de onreina Jeist kjwäld am un schrieech met lude Stemm un fua ut am rut. Mrk 9:26 27 Un see staunden aula, soo daut see sikj unjarenaunda fruagen un säden: Waut es dit? Waut es dit fa eene niee Lia? Wiels met Vollmacht jebitt Hee soogoa de onreine Jeista, un dee jehorchen Am! 28 Un de Norecht von am vespreed sikj fuaz en de gaunze Omjäajent von Galiläa.

29 Un fuaz jinjen see ut de Synagoge rut un kjeemen en daut Hus von Simon un Andreas, met Jakobus un Johanes. 30 Un Simon siene Schwieemutta lieech krank un haud Feeba. Un fuaz säden see Am daut von ar. 31 Un Hee jinkj han un recht ar opp, wäarent Hee äare Haunt hilt; un daut Feeba veleet ar fuaz, un see bedeend äant. 32 Aus daut Owent jeworden wia un de Sonn unjajegonen wia, brochten see aul de Kranke un Besätne no Am. 33 Un de gaunze Staut saumeld sikj ver de Däa. 34 Un Hee heeld väle, dee aun veschiedne Krankheiten lieden musten, un dreef väl Diewels rut un leet de Diewels nich räden, wiels see kjanden Am. Apj 16:17-18

35 Un tiedich, aus et noch sea diesta wia, stunt Hee opp un jinkj rut no eene eensome Städ un bäd doa. Mat 14:23; 26:36; Luk 5:16; 11:1 36 Un Simon un dee, waut met am wieren, jinjen Am hinjaraun. 37 Un aus see Am jefungen hauden, säden see to Am: Aulemaun sieekjt no Die! 38 Un Hee säd to äant: Lot ons en de näakjste Darpa gonen, daut ekj uk doa prädjen mucht; wiels doatoo sie Ekj rutjegonen. 39 Un Hee prädijd en äare Synagogen en gaunz Galiläa un dreef de Diewels rut.

40 Un doa kjeem een Leprakranka no Am, prachad Am un kjneed sikj ver Am dol un säd: Wan Du west, kaust Du mie reinjen. 41 Un Jesus erboarmd sikj äwa am, strakjt siene Haunt ut, schieed am aun un säd to am: Ekj well, sie jereinicht. 42 Un wäarent Hee räd*, veleet am de Leprakrankheit fuaz, un hee wia jereinicht. 43 Un Hee bedreiwd am un schekjt am fuaz wajch Mrk 3:12 44 un säd to am: See doano, daut du dit kjeenem sajchst; oba go han, wies die däm Priesta un opfa fa diene Reinjunk, waut Moses befolen haft, fa een Zeichnis to äant. 3Mo 14:2-32; Mrk 7:36 45 Hee oba jinkj rut un funk aun, daut väl to vekjindjen un de Sach soo to vespreeden, daut Jesus nich mea effentlich enne Staut gonen kunn, oba Hee wia buten en eensome Städen, un see kjeemen no Am von aule Sieden.