1 Oba aum Enj vom Sabat, aus de ieeschta Dach enne Wäakj aunfunk, kjeemen Maria Magdalena un de aundre Maria, daut Grauf to seenen. 2 Un kjikj, doa passieed een grootet Ieedbäben, wiels een Enjel vom Harn kjeem vom Himmel rauf, kjeem doa han un rold dän Steen von de Däa un sad sikj doabowen dol. 3 Un sien Jelot wia soo aus de Blitz un sien Kjleet witt aus Schnee. Mat 17:2; Apj 1:10 4 Ut Forcht fa am zettaden de Wajchta un worden soo aus Doodje.

5 Oba de Enjel säd to de Frues: Fercht junt nich! Ekj weet, daut jie Jesus, dän Jekjriezichten, sieekjen. 6 Hee es nich hia, wiels Hee es oppjestonen, soo aus Hee jesajcht haft. Komt häa un seet de Städ, wua de Har jeläajen haft. Mat 12:40; 16:21; 17:23; 20:19; Apj 5:36 7 Un got schwind han un sajcht siene Jinja, daut Hee von de Doodes oppjestonen es. Un kjikj, Hee jeit junt veraun no Galiläa; doa woa jie Am seenen. Kjikj, ekj hab junt daut jesajcht. Mat 26:32

8 Un see jinjen schwind vom Grauf met Forcht un groote Freid un randen, siene Jinja daut to sajen. 9 Un aus see jinjen, siene Jinja daut to berechten, kjikj, doa kjeem Jesus äant entjäajen un säd: Siet jejreest! See oba jinjen noda, hilden Am aun de Feet un bäden Am aun. 10 Dan säd Jesus to äant: Fercht junt nich! Got un sajcht miene Breeda, daut see sellen no Galiläa gonen; doa woaren see Mie seenen. Heb 2:11

11 Wäarent see oba hanjinjen, kjikj, atelje von de Woak kjeemen en de Staut nenn un berechten de Huagepriesta aules, waut passieet wia. 12 Un aus see met de Eltestasch vesaumelt wieren un Rot jehoolen hauden, jeewen see de Soldoten Jelt jenuach 13 un säden: Sajcht: Siene Jinja kjeemen enne Nacht un stoolen Am, wäarent wie schleepen. Mat 27:64 14 Un wan dit de Launt-Rejiera to hieren kjricht, dan well wie am tofräd-stalen un schaufen, daut jie kjennen onen Sorjen sennen. 15 Un see neemen daut Jelt un deeden soo, aus äant unjarecht wort. Un dise Räd es mank de Juden vespreet worden bat dän vondoagschen Dach.

16 De alw Jinja jinjen dan no Galiläa opp dän Boajch, wua Jesus äant bestalt haud. Mat 28:7 17 Un aus see Am sagen, follen see ver Am dol*; eenje oba twiewelden. 18 Un Jesus kjeem, räd met äant un säd: Mie es aule Vollmacht jejäft em Himmel un oppe Ieed. Mat 11:27; Efs 1:20-22; Dan 7:14 19 Dan got nu han un moakt aule Velkja to Jinja un deept äant en dän Nomen von däm Voda, von däm Sän un von däm Heiljen Jeist. Mrk 16:15-16 20 Lieet äant, aules to hoolen, waut Ekj junt befolen hab. Un kjikj, Ekj sie bie junt aule Dach bat aun daut Welt-Enj. Amen. Mat 18:20; Apj 1:8