1 Dan kjeemen Schreftjelieede un Farisäa von Jerusalem no Jesus un säden: 2 Wuarom äwaträden diene Jinja de Eltestasch äare Ordnunk? Wiels see wauschen sikj nich de Henj, wan see Broot äten. Luk 11:38 3 Hee oba auntwuad un säd to äant: Wuarom äwaträd jie Gott sien Jeboot wäajens june Ordnunk? 4 Wiels Gott haft jeboden un sajcht: "Iea dienen Voda un diene Mutta" un: "Wäa Voda ooda Mutta flieekjt, saul dän Doot stoawen". 2Mo 20:12; 21:17; 5Mo 5:16; 3Mo 20:9 5 Oba jie sajen: Wäa toom Voda ooda to de Mutta sajcht: "Daut es eene Weigow, waut die von mie sull togood komen", dee es frie; Spr 28:24; 1Tim 5:8 6 un ieet sienen Voda un siene Mutta nich, soo hab jie Gott sien Jeboot oppjehowen wäajens june Ordnunk. 7 Jie Heichla, Jesaja haft von junt gaunz rajcht jeprofezeit, wan hee sajcht: Jes 29:13 8 "Dit Volkj nodat sikj Mie met äa Mul un ieet Mie met de Leppen, oba äa Hoat es wietauf von Mie. 9 Oba vejäfs bäden see Mie aun, wiels see lieren soone Lieren, dee Menschen-Jebooten sent."

10 Un Hee roopt de Volkjshäad no sikj un säd to äant: Horcht un vestot! 11 Nich daut, waut toom Mul nenjeit, ve-onreinicht dän Mensch; oba waut utem Mul rutkjemt, daut ve-onreinicht dän Mensch. Apj 10:15; 1Tim 4:4; Tit 1:15

12 Dan kjeemen siene Jinja no Am un säden: Weetst Du, daut de Farisäa sikj oajaden, aus see daut Wuat hieeden? 13 Hee oba auntwuad un säd: Jieda Plaunt, dee mien himlischa Voda nich jeplaunt haft, woat utjeräten woaren. Apj 5:38 14 Lot äant toch. See sent blinje Blinjenleida! Un wan een Blinja dän Blinjen leit, faulen see beid en daut Loch nenn. Mat 23:24; Luk 6:39; Ree 2:19

15 Petrus oba auntwuad un säd to Am: Erkjläa ons dit Jlikjnis. 16 Oba Jesus säd: Sent jie uk noch emma onvestendich? 17 Moakj jie noch nich, daut aules, waut toom Mul nenjeit, en dän Buck nenkjemt un en dän Aufgank rutjeschmäten woat? 18 Oba waut utem Mul rutkjemt, daut kjemt von utem Hoat un ve-onreinicht dän Mensch. 19 Wiels von utem Hoat komen beese Jedanken, Morts, Ehebruch, Huararieen, Stälen, faulsche Zeichnissen, Lastrungen. 1Mo 8:21 20 Dit es et, waut dän Mensch ve-onreinicht; oba met onjewoschne Henj äten, daut ve-onreinicht dän Mensch nich.

21 Un Jesus jinkj von doa wajch un jinkj en de Jäajenden von Tierus un Sidon. 22 Un kjikj, eene kanaanitische Fru kjeem von dee Jäajenden un schrieech no Am un säd: Erboarm Die äwa mie, Har, du David sien Sän! Miene Dochta es oajch besäten. 23 Oba Hee auntwuad ar kjeen Wuat. Dan kjeemen siene Jinja, prachaden Am un säden: Lot ar gonen, wiels see schricht ons hinjaraun. 24 Hee oba auntwuad un säd: Ekj sie nich jeschekjt, aus bloos no de veloarne Schop vom Hus Israel. Mat 10:5-6; Ree 15:8 25 See kjeem oba un foll ver Am dol un säd: Har, halp mie! 26 Hee oba auntwuad un säd: Daut es nich goot, daut eena de Kjinja äa Broot nemt un schmitt daut ver de Hunjkjes. 27 Oba see säd: Jo, Har, un doch äten de Hunjkjes de Kjreemels, waut von äare Haren äa Desch faulen. 28 Dan auntwuad Jesus un säd to ar: Oo Fru, dien Gloowen es groot; die saul daut woaren, waut du velangst. Un äare Dochta wort en deeselwje Stund jesunt. Mat 8:10,13

29 Un Jesus jinkj von doa wieda un kjeem aun daut galiläische Mäa; un Hee stieech opp dän Boajch un sad sikj doa dol. 30 Un doa kjeemen groote Volkjshäaden no Am, dee hauden Lome, Blinje, Stomme, Kjräpels un väle aundre bie sikj, un see schmeeten dee ver Jesus siene Feet han, un Hee heeld dee, 31 soo daut sikj de Volkjshäaden vewundaden, aus see sagen, daut Stomme räden, Kjräpels jesunt worden, Lome jinjen un Blinje seenen kunnen; un see lowden dän Gott von Israel.

32 Dan roopt Jesus siene Jinja no sikj un säd: Mie jaumat daut äwa de Volkjshäad, wiels see sent hia nu aul dree Doag bie Mie jewast un haben nuscht to äten; un Ekj well äant nich hungrich wajchschekjen, daut see nich opp däm Wajch veschmachten. Mat 14:13-21 33 Un siene Jinja säden to Am: Wua kjenn wie hia en de Wiltnis soo väl Broot häakjrieen, om soone groote Volkjshäad saut to moaken? 34 Un Jesus säd to äant: Woo väl Brood hab jie? See säden: Säwen un een poa Feschkjes. 35 Un Hee befool daut Volkj, sikj opp de Ieed dol to saten. 36 Un hee neem de säwen Brood un de Fesch, dankt, bruak un jeef dee no siene Jinja un de Jinja no de Volkjshäad. 37 Un see eeten aula un worden saut un lausen toop, waut von Brocken äwableef, säwen Kjarw voll. 38 Dee doa jejäten hauden, wieren vea dusent Mana, onen Frues un Kjinja.

39 Un aus hee de Volkjshäaden haud gonen loten, stieech Hee en daut Schepp un kjeem en de Jäajent von Magdala.