1 Un Hee stieech en daut Schepp un fua äwa un kjeem en siene ieejne Staut. 2 Un kjikj, see brochten eenen Jelämden no Am, dee opp een Bad lach. Un aus Jesus äaren Gloowen sach, säd Hee to däm Jelämden: hab Moot, mien Sän, diene Sinden sent die vejäft. 3 Un kjikj, atelje von de Schreftjelieede säden bie sikj selfst: Disa lastat. Mat 26:65 4 Un aus Jesus äare Jedanken sach, säd Hee: Wuarom denkj jie Beeset en june Hoaten? Joh 2:25 5 Waut es dan nu leichta to sajen: Die sent diene Sinden vejäft, ooda to sajen: Sto opp un go? 6 Oba daut jie weeten, daut de Menschensän Vollmacht haft, oppe Ieed Sinden to vejäwen, (dan sajcht Hee to däm Jelämden): Sto opp, nemm dien Bad un go no dien Hus! Joh 17:2 7 Un hee stunt opp un jinkj no sien Hus. 8 Aus de Menschen daut sagen, vewundaden see sikj un lowden Gott, dee de Menschen soone Macht jejäft haud.

9 Aus Jesus von doa wieda-jinkj, sach Hee eenen Maun em Taks-Hus setten, dee heet Matäus. Un Hee säd to am: Folj Mie no! Un hee stunt opp un foljd Am. Mat 10:3 10 Un daut passieed, aus Hee em Hus aum Desch saut, kjikj, doa kjeemen väl Taks-Kollakjta un Sinda un sauten met Jesus un siene Jinja toop aum Desch. 11 Un aus de Farisäa daut sagen, säden see to siene Jinja: Wuarom at jun Meista met de Taks-Kollakjta un Sinda? 12 Oba aus Jesus daut hieed, säd Hee to äant: De Stoakje brucken nich eenen Dokta, oba de Kranke. Hes 34:16 13 Oba got un lieet, waut dit meent: "Ekj well Boarmherzichkjeit un nich Opfa." Wiels Ekj sie nich jekomen, de Jerajchte to roopen, oba de Sinda, to de Busse. 1Sa 15:22; Hos 6:6; Mat 2:7; 18:10-11

14 Dan kjeemen Johanes siene Jinja no Am un säden: Wuarom doo wie un de Farisäa soo foaken fausten, un diene Jinja fausten nich? Luk 18:12 15 Un Jesus säd to äant: Kjennen de Briegaums-Mana truarich sennen, soolang de Briegaum bie äant es? Oba doa woaren Doag komen, wan de Briegaum woat von äant wajchjenomen sennen, un dan woaren see fausten. Joh 3:29 16 Oba kjeena sat een nieet Flekj Zeich opp een oolet Kjleet; wiels daut niee Flekj ritt doch vom Kjleet, un daut Loch woat jrata. Ree 7:6 17 Eena jitt uk nich nieen Wien en oole Ladasch; aundasch verieten de Ladasch, un de Wien rant ut, un de Ladasch woaren vebrukt; oba nieen Wien woat en niee Ladasch jegoten, un dan blift beides goot.

18 Wäarent Hee dise Dinja met äant räd, kjikj, doa kjeem een Äwaschta, dee foll ver Am dol un säd: Miene Dochta es jrod jestorwen; oba komm un laj diene Haunt opp ar, dan woat see läwen. 19 Un Jesus stunt opp un foljd am, uk siene Jinja. 20 Un kjikj, eene Fru, dee aul twalw Joa eenen Blootfluss jehaut haud, kjeem von hinjen un schieed sien Kjleet aum Soom aun. 21 Wiels see säd en sikj selfst: Wan ekj bloos sien Kjleet aunschieren kaun, woa ekj jeheelt woaren. Mat 14:36 22 Oba Jesus dreid sikj om un sach ar, un Hee säd: Sie jetroost, Dochta; dien Gloowen haft die jeheelt. Un de Fru wia von deeselwje Stund aun jeheelt. 23 Un aus Jesus en däm Äwaschten sien Hus kjeem un de Fleetenspäla sach un de Menschen een Jetimmel muaken, 24 säd Hee to äant: Got fuat! wiels daut Mejalkje es nich jestorwen, oba daut schlapt. Un see lachten Am ut. Joh 11:11 25 Oba aus de Volkjshäad rutjedräwen wia, jinkj Hee nenn, foot ar aun de Haunt, un daut Mejalkje stunt opp. 26 Un de Norecht von dit vespreed sikj en daut gaunze Launt.

27 Un aus Jesus von doa wieda-jinkj, foljden Am twee Blinje, schrieejen un säden: Erboarm die äwa ons, Du David sien Sän! Mat 20:30 28 Aus Hee nu en daut Hus nenkjeem, kjeemen de Blinje no Am. Un Jesus säd to äant: Jleew jie, daut Ekj daut doonen kaun? See säden to Am: Jo, Har! Apj 14:9 29 Dan schieed Hee äare Uagen aun un säd: Junt saul daut soo woaren aus jun Gloowen es. Mat 8:13 30 Un äare Uagen worden opjemoakt. Un Jesus jeboot äant strenj un säd: Seet, daut et kjeena woat enwoaren. Mat 8:4 31 Oba see jinjen rut un muaken Am en daut gaunze Launt bekaunt.

32 Oba aus see rutjinjen, kjikj, dan brochten see eenen Mensch no Am, dee wia stomm un von eenem Diewel besäten. 33 Un aus de Diewel rutjedräwen wia, räd de Stomma; un de Volkjshäaden vewundaden sikj un säden: Soowaut es en Israel noch niemols jeseenen worden. 34 Oba de Farisäa säden: Hee drift de Diewels rut derch dän Bowaschten von de Diewels. Mat 12:24-32

35 Un Jesus jinkj derch aul äare Städa un Darpa, lieed en äare Synagogen un prädijd daut Evangelium vom Rikj un heeld jieda Krankheit un jieda Jebräakjnis mank de Menschen. 36 Aus Hee de Volkjshäaden sach, wort hee ennalich bewäajcht äwa äant, wiels see wieren meed un vestreit soo aus Schop, dee kjeenen Hoad haben. 1Kje 22:17; Hes 34:5; Mrk 6:34 37 Dan säd Hee to siene Jinja: De Arnt es werkjlich groot, oba de Oabeida sent mau weinich. 38 Doawäajen prachat däm Harn von de Arnt, daut Hee Oabeida en siene Arnt utschekjt. Luk 10:2