1 Un daut passieed, aus Jesus aul dise Räd verecht haud, säd Hee to siene Jinja: 2 Jie weeten, daut no twee Doag es daut Passafast*, un de Menschensän woat äwajäft, om jekjriezicht to woaren. 3 Dan vesaumelden sikj de Huagepriesta un de Schreftjelieede un de Eltestasch vom Volkj en däm Huagenpriesta sien Hoff, dee Kaifas heet, Mat 26:15 4 un berooden toop, woo see Jesus derch Lest jriepen un dootmoaken kunnen. 5 Oba see säden: Nich oppem Fast, daut et nich een Jetimmel mank daut Volkj jeft! Apj 1:18-19

6 Aus Jesus en Betanien wia en Simon, dän Leprakranken, sien Hus, 5Mo 23:19 7 kjeem eene Fru no Am, dee haud eene Alabasta-Buddel met sea diere Saulweelj un goot Am dee opp sien Kopp, aus Hee aum Desch saut. 8 Oba aus siene Jinja daut sagen, wieren see vedrisslich doaräwa un säden: Wuarom dit Vekwosen? 9 Dise Eelj haud kunt dia vekoft woaren un de Oame jejäft. 10 Oba aus Jesus daut moakjt, säd Hee to äant: Wuarom moak jie de Fru daut schwoa? Wiels see haft een goodet Woakj aun Mie jedonen. 11 Jie haben de Oame emma bie junt, oba Mie hab jie nich emma. 12 Doamet, daut see dise Saulweelj opp mienen Kjarpa jegoten haft, haft see Mie toom Bejrafnis reedjemoakt. Mat 26:63; Jes 53:7 13 Ekj saj junt woarhauftich: Wuaemma dit Evangelium woat jeprädicht woaren en de gaunze Welt, doa woat uk von daut jerät woaren, waut dise jedonen haft, to äa Aunjedenkj.

14 Dan jinkj eena von de twalw, met Nomen Judas Iskariot, no de Huagepriesta Joh 19:9 15 un säd: Waut well jie mie jäwen? un ekj woa Am junt veroden*. See vesechaden am dartich Selwastekja. Sach 11:12-13 16 Un von dan aun socht hee no Jeläajenheit, Am to veroden.

17 Aum ieeschten Dach von de onjesuade Brood kjeemen de Jinja no Jesus un säden to Am: Wua west du haben, daut wie fa Die reedmoaken, daut Passamol to äten? 18 Un Hee säd: Got en de Staut no eenem un sajcht to am: De Meista lat die sajen: Miene Tiet es nu dichtbie; ekj well bie die met miene Jinja daut Passamol hoolen. Joh 12:19 19 Un de Jinja deeden, soo aus Jesus äant befolen haud, un muaken daut Passa reed.

20 Aus daut Owent jeworden wia, sad Hee sikj met de Twalw aum Desch. 21 Un aus see eeten, säd Hee: Ekj saj junt woarhauftich: Eena von junt woat Mie veroden. Ps 41:9 22 Un see worden sea truarich un een jiedra von äant funk aun, Am to froagen: Har, sie ekj daut? 23 Hee oba auntwuad un säd: Dee met de Haunt met Mie em Schatel endukt, dee woat mie veroden. 24 De Menschensän jeit woll doahan, soo aus von Am jeschräwen steit; oba wee däm Mensch, derch wäm de Menschensän verot woat! Daut wia fa dän Mensch bäta, wan hee niemols jebuaren wia. 5Mo 21:6 25 Dan auntwuad Judas, dee Am veroot, un säd: Sie ekj daut, Rabbi? Hee säd to am: Du hast daut jesajcht.

26 Un aus see eeten, neem Jesus Broot, dankt un bruak daut un jeef de Jinja daut un säd: Nämt, ät; dit es mien Kjarpa. 1Kor 11:23-25 27 Un Hee neem daut Kuffel, un dankt, jeef äant daut un säd: Drinkjt aula doarut; 28 wiels dit es mien Bloot von däm nieen Bunt, daut fa väle vegoten woat fa de Sinden-Vejäwunk. 29 Oba Ekj saj junt: Ekj woa von nu aun nich mea von dise Frucht von de Wienstud drinkjen, bat aun janen Dach, wan Ekj dee nie met junt drinkjen woa en mien Voda sien Rikj.

30 Un aus see een Lowleet jesungen hauden, jinjen see rut no däm Oliewen-Boajch. Jes 50:6

31 Dan säd Jesus to äant: Jie woaren junt aula aun Mie steeten en dise Nacht; wiels daut steit jeschräwen: "Ekj woa dän Hoad schlonen, un de Schop von de Häad woaren vestreit woaren." Sach 13:7 32 Oba nodäm Ekj woa oppjestonen sennen, well Ekj ver junt no Galiläa gonen. 33 Dan auntwuad Petrus un säd to Am: Wan see sikj uk aula aun Die steeten, soo woa ekj niemols Aunstoos nämen. 34 Jesus säd to am: Ekj saj die woarhauftich: En dise Nacht, ea de Hon kjreit, woascht du Mie dreemol velieejen. Ps 69:22 35 Petrus säd to Am: Un wan ekj uk met Die stoawen must, ekj woa Die nich velieejen! Jrod soo säden uk aul de Jinja. Joh 19:24

36 Dan kjeem Jesus met äant no een Plauz, dee Getsemane heet, un Hee säd to de Jinja: Sat junt hia dol, wäarent Ekj wajchgo, om dort to bäden. 37 Un Hee neem met sikj Petrus un Zebedäus siene twee Säns, un Hee funk aun to truaren un sea bedrekjt to woaren. 38 Dan säd Hee to äant: Miene Seel es sea truarich, bat aum Doot; blieft hia un woakt met Mie! Jes 53:12 39 Hee jinkj noch een bät wieda un foll opp sien Jesecht, bäd un säd: Mien Voda, es daut mäajlich, dan lot dit Kuffel von Mie vebie-gonen; doch nich, soo aus Ekj well, oba soo aus Du west! Ps 22:8

40 Un Hee kjeem no de Jinja un funk äant enjeschlopen un säd to Petrus: Waut, kunn jie nich eene Stund met Mie woaken? Mat 26:61; Joh 2:19 41 Woakt un bät, daut jie nich en Vesieekjunk nenkomen! De Jeist es secha wellich, oba daut Fleesch es schwak.

42 Wada, toom tweedemol, jinkj Hee han, bäd un säd: Mien Voda, wan dit Kuffel nich von Mie vebie gonen kaun, onen daut Ekj daut drinkj, dan lot dien Wellen passieren! 43 Un Hee kjeem un funk äant wada enjeschlopen, wiels äant wieren de Uagen schwoa. Ps 22:8-9 44 Un Hee veleet äant, jinkj wada han un bäd toom dreddemol un säd deeselwje Wieed. 45 Dan kjeem Hee no siene Jinja un säd to äant: Schlopt nu un reift*; kjikj, de Stund es dichtbie jekomen, un de Menschensän woat en de Sinda äare Henj äwajäft. 46 Stot opp, lot ons gonen! Kjikj, dee Mie verot, es dichtbie. Ps 22:2

47 Un wäarent Hee noch räd, kjikj, doa kjeem Judas, eena von de Twalw, un met am eene groote Volkjshäad met Schwieets un Kjneppels, von de Eltestasch un Huagepriesta ut daut Volkj. 48 Dee Am oba veroot, haud äant een Tieekjen jejäft un jesajcht: Wäm ekj kussen woa, daut es dee; dän nämt faust. Ps 69:22 49 Un hee kjeem fuaz no Jesus un säd: Sie jejreest, Rabbi! un kust Am. 50 Jesus säd to am: Frint, towaut best du jekomen? Dan kjeemen see un läden de Henj aun Jesus un neemen Am faust. Ps 41:9; Ps 55:12-13 51 Un kjikj, eena von dee, dee bie Jesus wieren, strakjt siene Haunt ut, trock sien Schwieet rut un schluach däm Huagenpriesta sien Kjnajcht un hakt sien Ua auf. 2Mo 26:31-33; 2Chr 3:14 52 Dan säd Jesus to am: Stäakj dien Schwieet en siene Städ! Wiels aule, dee daut Schwieet nämen, woaren derch daut Schwieet omkomen. 53 Ooda meenst du, daut Ekj nich nu kunn mienen Voda bedden un Hee Mie fuaz mea aus twalw Legionen* Enjel schekjen wudd? 54 Woo wudden dan oba de Schreften erfelt woaren, daut dit mott soo sennen?

55 En deeselwje Stund säd Jesus to de Volkjshäad: Sent jie rutjegonen aus jäajen eenen Reiba, met Schwieets un Kjneppels, Mie faust to nämen? Däachlich hab Ekj bie junt em Tempel jesäten un jelieet, un jie haben Mie nich faustjenomen. Luk 8:2-3 56 Oba dit aula es passieet, daut de Profeeten äare Schreften erfelt worden. Dan veleeten Am aul de Jinja un randen wajch.

57 Dee oba Jesus faustjenomen hauden, leiden Am no Kaifas, däm Huagenpriesta, wua de Schreftjelieede un de Eltestasch vesaumelt wieren. 5Mo 21:22-23 58 Petrus oba foljd am vom Enj auf bat en däm Huagenpriesta sien Hoff un jinkj nenn un sad sikj bie de Kjnajchts dol, om daut Enj to seenen. 59 Oba de Huagepriesta un de Eltestasch un de gaunza Rot sochten no een faulschet Zeichnis jäajen Jesus, om Am doot to moaken. 60 Oba see fungen kjeent; wan uk väle faulsche Zeijen oppkjeemen, fungen see doch kjeent. Tolatst oba kjeemen twee faulsche Zeijen 61 un säden: Disa haft jesajcht: Ekj kaun Gott sien Tempel dolbräakjen un dän en dree Doag oppbuen. 62 Un de Huagapriesta stunt opp un säd to Am: Auntwuatst Du nuscht? Waut zeijen dise jäajen Die? 63 Jesus oba wia stell. Un de Huagapriesta auntwuad un säd to Am: Ekj beschwia Die bie däm läwendjen Gott, daut du ons sajchst, auf Du de Christus, Gott sien Sän best. Mat 20:19 64 Jesus säd to am: Du sajchst daut. Doch Ekj saj junt: Von nu aun woa jie dän Menschensän setten seenen bie de rajchte Haunt von de Macht un komen opp de Himmels-Wolkjen. 65 Dan vereet de Huagapriesta siene Kjleeda un säd: Hee haft jelastat! Waut bruck wie noch wieda Zeijen? Kjikj, nu hab jie sien Lastren jehieet. 66 Waut denkj jie? See auntwuaden un säden: Hee es dän Doot schuldich. 67 Dan spieejen see Am en daut Jesecht un schluagen Am met de Fusten; Aundre jeewen Am Bakenschläaj 68 un säden: Profezei ons, Christus, wäa es daut, dee Die schluach?

69 Petrus oba saut buten em Hoff; un een Deenstmäakje kjeem no am un säd: Du wieescht uk met Jesus, däm Galiläa. 70 Hee oba veluach daut ver äant aula un säd: Ekj weet nich, waut du sajchst. 71 Aus hee dan rutjinkj bat en dän Veraunda, sach am eene aundre un säd to dee, dee doa wieren: Disa wia uk met Jesus von Nazaret. 72 Un hee veluach daut wada met eenem Schwua*: Ekj kjan dän Mensch nich! 73 Boolt doaropp kjeemen dee Romstonende doa han un säden to Petrus: Woarhauftich, du best uk eena von äant, wiels diene Sproak verot die. 74 Dan funk hee aun to flieekjen un to schwieren: Ekj kjan dän Mensch nich! Un fuaz doaropp kjreid de Hon. 75 Un Petrus docht aun Jesus sien Wuat, waut Hee to am jesajcht haud: Ea de Hon kjreien woat, woascht du Mie dreemol velieejen. Un hee jinkj rut un hield bettalich.