1 Un Jesus auntwuad un räd wada derch Jlikjnissen to äant un säd: 2 Daut Himmelrikj es soo aus een Mensch, een Kjennich, dee fa sienen Sän eene Kjast muak. Joh 3:29 3 Un hee schekjt siene Kjnajchts rut, de Enjelodne to de Kjast to roopen; un see wullen nich komen. 4 Dan schekjt hee wada aundre Kjnajchts un säd: Sajcht de Enjelodne: Kjikj, miene Moltiet hab ekj reed; miene Ossen un Mastvee sent jeschlacht, un aules es reed. Komt to Kjast! 5 Oba see achten daut nich un jinjen han, eena opp sienen Aka, dee aundra no sien Jeschaft, 6 un de äwaje jreepen siene Kjnajchts, behaundelden äant schentlich un muaken äant doot. Mat 21:35 7 Aus de Kjennich daut hieed, wort Hee doll un schekjt siene Millitäa rut un brocht dise Merda om un stekjt äare Staut aun. Mat 24:2 8 Dan säd hee to siene Kjnajchts: De Kjast es woll reed, oba de Enjelodne wieren daut nich wirdich. 9 Soo got nu han no de Utjenj von de Gaussen, un lot en to de Kjast, sooväl aus jie finjen. 10 Un de Kjnajchts jinjen rut opp de Gaussen un brochten aul dee toop, dee see fungen, beides Beese un Goode, un daut Kjasthus wort jefelt von Enjelodne. Mat 13:47 11 Oba aus de Kjennich nenkjeem, de Enjelodne to beseenen, sach hee doa een Mensch, dee nich een Kjastkjleet aunjetrocken haud, Opb 19:8 12 un hee säd to am: Frint, woo best du hia nenjekomen un hast doch kjeen Kjastkjleet aun? Hee oba wort sproakloos. 13 Dan säd de Kjennich to de Deena: Binjt am Henj un Feet, nämt am wajch un schmiet am rut en de butaschte Diestanis! Doa woat daut Hielen un daut Tänen-Kjnirschen sennen. 14 Wiels väle sent beroopen, oba weinje sent uterwält.

15 Dan jinjen de Farisäa un hilden Rot, woo see Am en siene Räd to Faul brinjen kunnen. 16 Un see schekjten äare Jinja met de Herodiauna* no Am un säden: Meista, wie weeten, daut Du woarhauftich best un lieescht Gott sien Wajch en Woarheit, un besorchst Die wäajen kjeenem, wiels Du sitst de menschelje Persoon nich aun. Joh 3:2 17 Saj ons, waut denkjst Du: Es daut rajcht, däm Kjeisa dän Taks to jäwen, ooda nich? 18 Oba aus Jesus äare Boosheit moakjt, säd Hee: Jie Heichla, waut vesieekj jie Mie? 19 Wiest Mie daut Taksjelt! Dan rieekjten see Am eenen Denarius han. 20 Un Hee säd to äant: Wäms Bilt un Enschreft es dit? 21 See säden to Am: Däm Kjeisa siene. Dan säd Hee to äant: Dan jäft däm Kjeisa, waut däm Kjeisa sient es un Gott, waut Gott sient es. Ree 13:1,7 22 Un aus see daut hieeden, vewundaden see sikj un leeten Am toch un jinjen wajch.

23 Aun däm Dach kjeemen de Saduzäa no Am, waut doa sajen, daut jeft kjeene Opparstonunk, un fruagen Am Apj 4:1-2; 23:6,8 24 un säden: Meista, Moses haft jesajcht: "Wan irjentwäa onen Kjinja stoaft, dan saul sien Brooda siene Fru frieen un sienem Brooda Nokomenschoft erwakjen." 5Mo 25:5-6 25 Nu wieren bie ons säwen Breeda. De ieeschta befried sikj un storf, un wiels hee nich Nokomen haud, leet* hee siene Fru sienem Brooda. 26 Krakjt soo uk de tweeda un de dredda, bat dän säwenden. 27 Tolatst, no aul dee, storf uk de Fru. 28 Nu en de Opparstonunk, wäms Fru woat see sennen von de säwen? Wiels see haben ar aula jehaut. 29 Oba Jesus auntwuad un säd to äant: Jie erren, wiels jie nich de Schreften, uk nich Gott siene Krauft kjanen. 30 Wiels en de Opparstonunk frieen see nich un woaren uk nich jejäft toom befrieen, oba see sent soo aus Gott siene Enjel em Himmel. 31 Waut oba daut Oppstonen von de Doodje aunjeit, hab jie nich jeläst, waut to junt jesajcht es von Gott, dee doa sajcht: 2Mo 3:6,15 32 "Ekj sie Abraham sien Gott un Isaak sien Gott un Jakob sien Gott"? Hee es nich de Doodje, oba de Läwendje äa Gott. 33 Un aus de Volkjshäaden daut hieeden, staunden see äwa siene Lia.

34 Oba aus de Farisäa hieeden, daut Hee de Saduzäa daut Mul jestopt haud, vesaumelden see sikj. 35 Un doa fruach eena von äant, een Jesaz-Jelieeda, un vesocht Am un säd: 36 Meista, woont es daut jratste Jeboot em Jesaz? 37 Jesus oba säd to am: "Du saust dän Harn, dienen Gott leewen, met dien gaunzet Hoat un met diene gaunze Seel un met dien gaunzet Vestaunt". 5Mo 6:5 38 Dit es daut ieeschte un jratste Jeboot. 39 Un daut tweede es daut jlikj: "Du saust dienen Näakjsten leewen soo aus die selfst". 3Mo 19:18 40 Aun dise twee Jebooten henjt daut gaunze Jesaz un de Profeeten. Ree 13:9-10

41 Aus nu de Farisäa vesaumelt wieren, fruach Jesus äant 42 un säd: Waut denkj jie von Christus? Wäms Sän es Hee? See säden to Am: David siena. Jes 11:1; Joh 7:42 43 Hee säd to äant: Woosoo nant David Am dan em Jeist "Har", aus hee säd: 44 "De Har haft to mienem Harn jesajcht: Sat Die to miene Rajchte, bat Ekj diene Fiend fa diene Feet to eene Footbenkj hanlaj." Ps 110:1; Mat 26:64 45 Wan aulsoo David Am Har nant, woo es Hee dan sien Sän? 46 Un kjeena kunn Am een Wuat auntwuaten; uk woagd sikj von däm Dach aun, kjeena mea, Am to froagen.