1 Aun dämselwjen Dach jinkj Jesus von daut Hus rut un sad sikj aum Mäa dol. 2 Un bie Am saumelden sikj groote Volkjshäaden, daut Hee en daut Schepp stieech un sikj dolsad, un de gaunze Volkjshäad stunt aum Straunt. 3 Un Hee räd väl to äant en Jlikjnissen un säd: Kjikj, de Seimaun jinkj rut toom Seien. 4 Un aus hee seid, foll eenjet aun dän Wajch, un de Väajel kjeemen un freeten daut opp. 5 Aundret foll opp steenaje Ieed, wua daut nich väl Ieed haud, un daut jinkj fuaz opp, wiels daut nich deepe Ieed haud. 6 Aus oba de Sonn oppjinkj, vebrend daut, un wiels daut nich Wartlen haud, vedrieejd daut. 7 Aundret foll manke Dornen; un de Dornen wossen opp un stekjten daut. 8 Oba aundret foll opp goode Ieed un brocht Frucht; eenjet brocht hundat, eenjet zastich un eenjet dartich mol soo väl. 9 Wäa Uaren haft toom Hieren, däm lot hieren.

10 Dan kjeemen de Jinja un säden to Am: Wuarom rätst Du to äant en Jlikjnissen? 11 Hee oba auntwuad un säd to äant: Wiels junt daut jejäft es, de Jeheemnissen vom Himmelrikj to vestonen, jane oba es daut nich jejäft. 1Kor 2:10 12 Wiels wäa doa haft, däm woat jejäft woaren, un Hee woat Äwafluss haben; wäa oba nich haft, von däm woat noch daut jenomen woaren, waut hee haft. Spr 9:9; Mat 25:28-29; Mrk 4:25; Luk 8:18 13 Doawäajen räd Ekj to äant en Jlikjnissen. Wiels seenent, seenen see nich, un hierent, hieren see nich un vestonen uk nich. 14 Un en dee es Jesaja siene Profezeiunk erfelt, dee doa sajcht: "Met daut Hieren woa jie hieren un nich vestonen, un seenent woa jie seenen un nich venämen; Jes 6:9-10 15 wiels daut Hoat von dit Volkj es vehoatelt, un met de Uaren hieren see schwoa, un äare Uagen haben see toojeschloten; soo daut see nich met eenmol met de Uagen seenen un met de Uaren hieren un met daut Hoat vestonen un sikj bekjieren, un ekj äant heelen wudd." Joh 9:39

16 Oba seelich sent june Uagen, wiels dee seenen, un june Uaren, wiels dee hieren. Luk 10:23-24 17 Wiels Ekj saj junt woarhauftich: Daut väle Profeeten un Jerajchte haben jewenscht to seenen, waut jie seenen, un haben daut nich jeseenen, un to hieren, waut jie hieren, un haben daut nich jehieet. 1Pe 1:10

18 Dan horcht nu no daut Jlikjnis von däm Seimaun: 19 Wan irjentwäa daut Wuat vom Rikj hieet un daut nich vesteit, dan kjemt de Beesa un fipst am daut wajch, waut en sien Hoat jeseit wia. Daut es dee, bie wäm daut aun däm Wajch jestreit wia. 20 Un waut opp daut Steenaje jestreit wia, daut es dee, dee daut Wuat hieet un fuaz met Freid oppnemt. 21 Oba hee haft kjeene Wartlen en sikj, oba helt mau eene korte Tiet. Oba wan Triebsaul ooda Vefoljunk wäajen daut Wuat oppkjemt, oajat am daut fuaz. 22 Un waut manke Dornen jestreit wia, daut es dee, dee daut Wuat hieet, oba de Sorjen von dit Läwen un de Veleidunk vom Rikjtum stekjen daut Wuat, un hee woat onfruchtboa. Mat 6:19-34; 1Tim 6:9 23 Oba waut opp goode Ieed jestreit wia, daut es dee, dee daut Wuat hieet un vesteit daut, dee dan uk Frucht brinjt, un eenje brinjen hundat, eenje zastich un eenje dartich mol soo väl.

24 Een aundret Jlikjnis läd Hee äant väa un säd: Daut Himmelrikj es met eenem Maun to vejlikjen, dee goodet Sot opp sienen Aka seid. 25 Aus de Menschen schleepen, kjeem sien Fient un seid Onkrut medden mank dän Weit un jinkj doavon. 26 Un aus de Plaunten oppkjeemen un Frucht brochten, dan kjeem daut Onkrut uk äwadäl. 27 Dan kjeemen däm Wirtschofta siene Deena un säden to am: Har, hast du nich goodet Sot opp dienen Aka jeseit? Wuahäa haft dee dan daut Onkrut? 28 Hee säd to äant: Daut haft een Fient jedonen. Dan säden de Deena to am: West du dan, daut wie hangonen un daut toopsaumlen? 29 Oba hee säd: Nä, daut jie nich, wäarent jie daut Onkrut toopsaumlen, uk dän Weit utrieten. 30 Lot beides toop bat dän Eifst waussen. Un en de Eifst-Tiet woa ekj to de Drascha sajen: Saumelt ieescht daut Onkrut un binjt daut en Goawen, daut to vebrennen. Oba dän Weit saumelt en mienen Spikja. Mat 3:12; 15:13; Opb 14:15

31 Een aundret Jlikjnis läd Hee äant väa un säd: Daut Himmelrikj es soo aus een Sampkuarn, daut een Maun neem un opp sienen Aka seid. 32 Daut es werkjlich daut kjlanste von aul daut Sot, oba wan daut ieescht jewossen es, es daut jrata aus de Kjreita un woat een Boom, soo daut de Väajel vom Himmel komen un sikj en siene Asta ennasten.

33 Een aundret Jlikjnis säd Hee to äant: Daut Himmelrikj es soo aus Suadieech, dän eene Fru neem un mank dree Mot* Mäl vestuak, bat dee gaunz derchjesuat wia.

34 Aul dit räd Jesus en Jlikjnissen to de Volkjshäaden, un onen Jlikjnis räd Hee nich to äant, 35 soo daut erfelt wort, waut derch dän Profeet jesajcht es, dee doa säd: "Ekj woa mien Mul en Jlikjnissen opmoaken; Ekj well Dinja vekjindjen, dee von de Welt-Gruntlajunk häa em Jeheemen jehoolen sent." Ps 78:2

36 Dan leet Jesus de Volkjshäaden gonen un jinkj en daut Hus nenn. Un siene Jinja kjeemen no Am un säden: Erkjläa ons daut Jlikjnis vom Onkrut opp däm Aka. 37 Un Hee auntwuad un säd to äant: Dee daut goode Sot seit, es de Menschensän. 38 De Aka es de Welt. Daut goode Sot sent de Kjinja vom Rikj, oba daut Onkrut sent de Kjinja von däm Beesen. Joh 8:44; 1Kor 3:9 39 De Fient, dee daut seid, es de Diewel. De Eifst es daut Welt-Enj. Un de Drascha sent de Enjel. 40 Jrod soo aus daut Onkrut jesaumelt un met Fia vebrent woat, soo woat daut uk sennen, wan dit Welt-Enj kjemt. Mat 24:31 41 De Menschensän woat siene Enjel rutschekjen, un see woaren saumlen ut sien Rikj aul de Oajanissen, un dee doa Jesazlooset doonen 42 un woaren äant en dän Fia-Owen schmieten. Doa woat daut Hielen un daut Tänen-Kjnirschen sennen. 43 Dan woaren de Jerajchte schienen aus de Sonn en äa Voda sien Rikj. Wäa doa Uaren haft toom hieren, däm lot hieren! Dan 12:3

44 Wada es daut Himmelrikj soo aus een vestoakna Schauz em Aka, dän een Mensch funk un vestuak un en siene Freid jinkj un aules vekoft, waut hee haud, un koft dän Aka. Mat 19:29; Luk 14:33; Flp 3:7

45 Wada es daut Himmelrikj met eenem Haundelsmaun to vejlikjen, dee no goode Parlen socht. 46 Dee dan, aus hee eene sea wieetvolle Parl funk, jinkj un vekoft aules, waut hee haud, un koft dee.

47 Wada es daut Himmelrikj soo aus een Nat, daut en daut Mäa jeschmäten woat un aule veschiedenste Sorten saumelt. Mat 22:9-10 48 Un wan daut ieescht voll es, schlapen see daut no däm Straunt, saden sikj dol un saumlen de Goode en Jefässa, un de Schlajchte schmieten see wajch. 49 Soo woat daut uk sennen aun daut Welt-Enj: De Enjel woaren rutgonen un de Beese von ut de Jerajchte äare Medd scheeden Mat 25:32 50 un woaren äant en dän Fia-Owen schmieten. Doa woat daut Hielen un daut Tänen-Kjnirschen sennen.

51 Jesus säd to äant: Hab jie dit aula vestonen? See säden to Am: Jo, Har. 52 Dan säd Hee to äant: Daut es wuarom jieda Schreftjelieeda, dee fa daut Himmelrikj jelieet es, soo es aus een Mensch, een Wirtschofta, dee ut siene Schauzkoma Oolet uk Nieet verendach brinjt.

53 Un daut passieed, aus Jesus dise Jlikjnissen verecht haud, jinkj Hee doa wajch. 54 Un aus Hee en siene Vodastaut kjeem, lieed Hee äant en äare Synagoge, soo daut see sikj vewundaden un säden: Wua haft disa soone Weisheit un soone Wundakrauft häa? 55 Es dit nich däm Holt-Oabeida sien Sän? Un heet siene Mutta nich Maria un siene Breeda Jakobus un Joses un Simon un Judas? 56 Un sent siene Sestren nich aula bie ons? Wuahäa haft Hee dit dan aula? Joh 6:42; 7:15,52 57 Un see oajaden sikj äwa Am. Oba Jesus säd to äant: Een Profeet es nich onen Iea, buta en siene Vodastaut un en sien ieejnet Hus. Joh 4:44 58 Un Hee deed doa nich väl Wundawoakjen wäajen äaren Ongloowen.