1 Un aus see sikj Jerusalem nodaden un no Betfage aun dän Oliewen-Boajch kjeemen, schekjt Jesus twee Jinja 2 un säd to äant: Got en daut Darp nenn, daut ver junt licht, un fuaz woa jie eene Äselin aunjebungen finjen un een Falm bie sikj; leest dee loos un brinjt Mie dee häa. 3 Un wan junt irjentwäa waut sajcht, dan sell jie sajen: De Har brukt dee; dan woat hee dee fuaz schekjen. Mat 26:18 4 Dit es oba passieet, soo daut erfelt wort, waut derch dän Profeet jesajcht es, dee doa säd: Sach 9:9 5 "Sajcht de Dochta Zion: Kjikj, dien Kjennich kjemt saunftmootich no die un rittat opp eene Äselin un opp een Falm, daut Lausttia äa Junget."

6 Un de Jinja jinjen han un deeden, soo aus Jesus äant befolen haud, 7 un brochten de Äselin un daut Falm un läden äare Kjleeda opp dee un saden Am doanopp*. 8 Oba väle von de Volkjshäad spreeden äare Kjleeda opp dän Wajch; aundre hakten Asta von de Beem un streiden dee opp dän Wajch. 2Kje 9:13 9 Un de Volkjshäaden, dee veropp jinjen un nofoljden, schrieejen un säden: Hosiana*, David sien Sän! Jeloft es dee, dee em Nomen vom Harn kjemt! Hosiana em Hechsten! Ps 118:25-26 10 Un aus Hee en Jerusalem nenkjeem, wia de gaunze Staut oppjeräajcht un säd: Wäa es disa? 11 Un de Volkjshäaden säden: Disa es Jesus, de Profeet von Nazaret ut Galiläa.

12 Un Jesus jinkj en Gott sien Tempel nenn un dreef aul dee rut, dee doa em Tempel vekoften un koften, un Hee stelpt de Jeltwakjsla äare Deschen om, uk de Duwenhendla äare Benkjen, 13 un säd to äant: Daut steit jeschräwen: "Mien Hus saul een Bädhus heeten"; oba jie haben eene Reibaheel doarut jemoakt. Jes 56:7; Jer 7:11

14 Un doa kjeemen Blinje un Lome em Tempel no Am, un Hee heeld äant. 15 Oba aus de Huagepriesta un de Schreftjelieede de Wunda sagen, dee Hee deed, un de Kjinja, dee em Tempel schrieejen un säden: Hosiana, David sien Sän! worden see oajalich 16 un säden to Am: Hieescht du, waut dise sajen? Jesus oba säd to äant: Jo! Hab jie noch niemols jeläst: "Ut daut Mul von Kjinja un Sulinja hast du een Low reedjemoakt"? Ps 8:2 17 Un Hee veleet äant, jinkj ut de Staut rut no Betanien un bleef doa to Nacht.

18 Aus Hee tiedich Zemorjes trigj no de Staut kjeem, hungad Am. 19 Un aus Hee eenen Fiejenboom aum Wajch sach, jinkj Hee no däm un funk nuscht aus bloos Bläda doaraun. Un Hee säd to däm: Niemols mea saul von die Frucht waussen en Eewichkjeit! Un fuaz vedrieejd de Fiejenboom. Luk 13:6 20 Aus de Jinja daut sagen, vewundaden see sikj un säden: Woo es de Fiejenboom soo fuaz vedrieecht? 21 Jesus auntwuad un säd to äant: Ekj saj junt woarhauftich: Wan jie Gloowen haben un nich twiewlen, dan woa jie nich bloos soont doonen, aus met däm Fiejenboom, oba, wan jie to disem Boajch sajen: Häw die opp un schmiet die en daut Mäa! soo woat daut woaren. Mat 17:20 22 Un aules, wua jie em Jebäd no froagen, wan jie jleewen, woa jie kjrieen.

23 Un aus Hee en dän Tempel kjeem, kjeemen de Huagepriesta un de Eltestasch no Am, wäarent Hee lieed un säden: Derch waut fa Vollmacht deist Du dise Dinja, un wäa haft Die dise Vollmacht jejäft? Joh 2:18; Apj 4:7 24 Jesus auntwuad un säd to äant: Ekj well junt uk een Wuat froagen; wan jie Mie daut sajen, well Ekj junt uk sajen, derch waut fa Vollmacht Ekj dise Dinja doo: 25 Wuahäa wia Johanes siene Doop? Vom Himmel ooda von Menschen? Dan äwaläden see bie sikj selfst un säden: Wan wie sajen: Vom Himmel, dan woat Hee to ons sajen: Wuarom jleewd jie am dan nich? 26 Oba wan wie sajen: Von Menschen, fercht wie de Volkjshäad, wiels aule hoolen Johanes fa eenen Profeet. Mat 14:5 27 Un see auntwuaden Jesus un säden: Wie weeten daut nich. Dan säd Hee to äant: Dan saj Ekj junt uk nich, derch waut fa Vollmacht Ekj dise Dinja doo.

28 Oba waut denkj jie? Een Mensch haud twee Säns. Un hee jinkj no däm ieeschten un säd: Sän, go han, oabeid vondoag en mienem Wiengoaden. 29 Hee auntwuad un säd: Ekj well nich. Oba nohäa wort am daut leet, un hee jinkj. 30 Un hee jinkj no däm tweeden un säd to däm krakjt soo. Dee auntwuad oba un säd: Jo, Har, un jinkj nich. Mat 7:21 31 Woona von de beid haft däm Voda sien Wellen jedonen? See säden to Am: De ieeschta. Jesus säd to äant: Ekj saj junt woarhauftich: De Taks-Kollakjta un Huaren gonen ea en Gott sien Rikj nenn aus jie. Luk 18:9-14 32 Wiels Johanes kjeem no junt en däm Wajch von Jerajchtichkjeit, un jie jleewden am nich. Oba de Taks-Kollakjta un Huaren jleewden am; un wan jie daut uk noch jeseenen haben, kjieed jie doch nich om, am to jleewen. Luk 7:29

33 Horcht een aundret Jlikjnis: Doa wia een Wirtschofta, dee plaunt eenen Wiengoaden, bud doa eenen Tun rom, growd doabennen een Wienpras-Loch, bud eenen Torm, vepacht dän aun Wiengoadna un reisd utem Launt. Jes 5:1-2 34 Aus nu de Tiet von de Frucht dichtbie kjeem, schekjt hee siene Kjnajchts no de Wiengoadna, siene Frucht en to nämen. 35 Oba de Wiengoadna neemen siene Kjnajchts un schluagen dän eenen, dän aundren muaken see doot, dän dredden steenijden see. 36 Un wada schekjt hee aundre Kjnajchts, mea noch aus de ieeschte, un see behaundelden äant krakjt soo. 37 Tolatst schekjt hee sienen Sän no äant un säd: Fa mienen Sän woaren see Respakjt haben. 38 Oba aus de Wiengoadna dän Sän sagen, säden see to sikj unjarenaunda: Dit es de Oaw; komt, well wie am dootmoaken un sien Oafgoot nämen! Mat 26:3-5; Joh 1:11 39 Un see neemen am, schmeeten am utem Wiengoaden rut un muaken am doot. 40 Wan nu de Har von däm Wiengoaden kjemt, waut woat Hee met dise Wiengoadna doonen? 41 See säden to Am: Hee woat de Beese jreslich ombrinjen un dän Wiengoaden aun aundre Wiengoadna vepachten, dee am de Frucht to äare Tieden aufjäwen woaren. 42 Jesus säd to äant: Hab jie niemols en de Schreften jeläst: "Dän Steen, dän de Bulied veschmäten haben, dee es toom Haupt-Akjsteen jeworden? Daut es vom Harn passieet un es wundaboa en onse Uagen?" Ps 118:22-23; Apj 4:11; 1Pe 2:4-8

43 Doawäajen saj Ekj junt: Gott sien Rikj woat von junt jenomen un eene Nazion jejäft woaren, dee siene Frucht brinjt. 44 Un wäa opp disen Steen felt, woat veschmatat woaren; opp wäm hee oba felt, dän woat hee vemolen.

45 Un aus de Huagepriesta un de Farisäa siene Jlikjnissen hieeden, moakjten see, daut Hee von äant räd. 46 Un aus see Am sochten faust to nämen, ferchten see sikj oba fa de Volkjshäaden, wiels dee Am fa eenen Profeet hilden.