1 Seet junt väa, daut jie june Aulmoosen nich ver de Menschen jäwen, om von äant jeseenen to sennen; wiels dan hab jie kjeenen Loon von junem Voda em Himmel. 2 Wan du nu Aulmoosen jefst, saust du nich ver die trompeeten loten, soo aus de Heichla daut en de Synagogen un opp de Gaussen doonen, om von de Menschen jeloft to woaren. Ekj saj junt woarhauftich: See haben äaren Loon aul wajch. 1Kor 13:3 3 Oba wan du Aulmoosen jefst, lot diene linkje Haunt nich weeten, waut de Rajchte deit, Mat 25:37-40; Ree 12:8 4 soo daut diene Aulmoosen em Jeheemen sent, un dien Voda, dee em Jeheemen sitt, woat die daut effentlich beloonen.

5 Un wan du bätst, saust du nich soo sennen aus de Heichla; wiels see stonen un bäden jieren en de Synagogen un opp de Gaussen-Akjen, om von de Menschen jeseenen to woaren. Ekj saj junt woarhauftich: See haben äaren Loon wajch. 6 Oba du, wan du bätst, go en diene Bennastow un moak de Däa too un bäd to dienem Voda em Jeheemen. Un dien Voda, dee en daut Jeheeme sitt, woat die doafäa effentlich beloonen. 7 Un wan jie bäden, sell jie nich väl blaubren soo aus de Heiden; wiels dee meenen, see woaren jehieet, wan see väl Wieed brucken. Jes 1:15 8 Doawäajen sell jie nich soo sennen aus dee; wiels jun Voda weet, waut jie brucken, ea jie Am bedden. 9 Doawäajen sell jie soo bäden: Ons Voda, dee du em Himmel best! Dien Nomen saul jeheilicht woaren. Hes 36:23 10 Lot dien Rikj komen. Lot dien Wellen oppe Ieed jedonen woaren soo aus em Himmel. Luk 22:42 11 Ons needjet Broot jeff ons vondoag. 12 Un vejeff ons onse Schulden, soo aus wie onse Schildna vejäwen. Mat 18:21-35 13 Un fia ons nich enne Vesieekjunk, oba lees ons vom Beesen. Wiels dient es daut Rikj un de Krauft un de Harlichkjeit enne Eewichkjeit. Amen! 1Chr 29:11-13; Joh 17:15; 1Kor 10:13

14 Wiels wan jie de Menschen äare Fäla vejäwen, dan woat jun himlischa Voda junt uk vejäwen. Mrk 11:25 15 Oba wan jie de Menschen äare Fäla nich vejäwen, dan woat jun Voda junt june Fäla uk nich vejäwen.

16 Un wan jie fausten, sell jie nich sua kjikjen soo aus de Heichla. Wiels see vestalen äare Jesechta, om ver de Menschen to schienen, aus wan see fausten. Ekj saj junt woarhauftich: See haben äaren Loon wajch. Jes 58:5-6 17 Oba wan du fausten deist, dan saulw dien Kopp en un wausch die daut Jesecht, 18 soo daut du nich ver de Menschen schienst met dien Fausten, oba ver dienem Voda, dee em Jeheemen es. Un dien Voda, dee doa en daut Jeheeme sitt, woat die doafäa effentlich beloonen.

19 Jie sellen junt nich Schaza saumlen oppe Ieed, wua Motten un Rosta dee vefräten, un wua de Stäla derchgrowen un stälen. 20 Oba saumelt junt Schaza em Himmel, wua nich Motten uk nich Rosta dee vefräten, un wua de Stäla nich nogrowen un stälen. Mat 19:21; Kol 3:1-2 21 Wiels wua jun Schauz es, doa woat uk jun Hoat sennen.

22 Daut Licht fa dän Kjarpa es daut Uag. Wan nu dien Uag eenfeltich es, woat de gaunza Kjarpa licht sennen. 23 Oba wan dien Uag bees es, dan woat dien gaunza Kjarpa diesta sennen. Wan nu daut Licht, waut en die es, Diestanis es, woo groot woat dan de Diestanis sennen! Joh 11:10

24 Kjeena kaun twee Haren deenen; wiels entwäda hee woat eenen haussen un dän aundren leewen, ooda hee woat dän eenen aunhenjen un dän aundren ve-achten. Du kaust nich Gott deenen un däm Mammon*. Jak 4:4 25 Doawäajen saj Ekj junt: Sorcht nich om jun Läwen, waut jie äten un waut jie drinkjen sellen; uk nich om junen Kjarpa, waut jie auntrakjen sellen. Es daut Läwen nich mea aus daut Äten? un de Kjarpa mea aus de Kjleedunk? Flp 4:6; 1Pe 5:7 26 Kjikjt no de Väajel vom Himmel; dee seien nich un arnten nich un saumlen nuscht en de Spikjasch, un jun Voda em Himmel foodat dee doch. Sent jie nich väl bäta aus dee? Mat 10:29-31; Luk 12:6-7 27 Oba wäa von junt kaun siene Hecht derch Sorjen eene Ell* biesaten?

28 Un wuarom moak jie junt Sorjen äwa de Kjleedunk? Kjikjt no de Lelje opp de Stap, woo dee waussen. Dee oabeiden nich uk spennen dee nich, 29 un doch saj Ekj junt, selfst Salomo wia en aul siene Harlichkjeit nich soo aunjetrocken aus eene von dise. 1Kje 10:1-29 30 Wan oba Gott daut Graus von de Stap, daut vondoag doa steit un morjen en dän Owen jeschmäten woat, soo kjleet: wudd Hee junt daut nich väl mea doonen, Oo jie Kjliengloowsche? 31 Doawäajen sell jie nich sorjen un sajen: Waut sell wie äten? ooda waut sell wie drinkjen? ooda wuamet sell wie ons kjleeden? 32 Wiels no daut aules sieekjen de Heiden; oba jun himlischa Voda weet, daut jie daut aula brucken. 33 Oba sieekjt daut ieeschte no Gott sien Rikj un no siene Jerajchtichkjeit, un aul dise Dinja woat junt biejelajcht woaren. 1Kje 3:13-14; Ps 37:4,25; Ree 14:17 34 Doawäajen sell jie nich fa dän Morjen sorjen, wiels dee Morjen woat fa sikj selfst sorjen. Jieda Dach haft jenuach met siene ieejne Ploag. 2Mo 16:19