1 Un de Farisäa un Saduzäa kjeemen no Am, vesochten Am un velangden, daut Hee äant sull een Tieekjen vom Himmel seenen loten. Mat 12:38 2 Oba Hee auntwuad un säd to äant: Wan de Owent kjemt, saj jie: Daut jeft scheenet Wada, wiels de Himmel es root. 3 Un aum Zemorjes: Vondoag kjemt een Owwada, wiels de Himmel es root un dunkel. Jie Heichla! De Aunsecht von däm Himmel vesto jie to dieden, oba nich de Tieekjens von de Tieden. Mat 11:4 4 Eene beese un ehebräakjarische Jennerazion foddat een Tieekjen; oba dee saul kjeen Tieekjen jejäft woaren, buta daut Tieekjen von däm Profeet Jona. Un Hee veleet äant un jinkj wajch. Mat 12:39-40

5 Un aus siene Jinja aun de aundre Sied aunkjeemen, hauden see vejäten, Broot met to nämen. 6 Jesus oba säd to äant: Seet doano un heet junt fa de Farisäa un Saduzäa äa Suadieech! Luk 12:1 7 Un see muaken sikj doaräwa Jedanken un säden: Daut es, wiels wie nich Broot metjenomen haben. 8 Aus Jesus daut moakjt, säd Hee to äant: Jie Kjliengloowsche, waut moak jie junt Jedanken doaräwa, daut jie nich Broot metjenomen haben? Mat 14:17-21 9 Vesto jie noch nich? Un denkj jie nich aun de fief Brood fa de fief-dusent un woo väl Kjarw jie doa opphoowen? Mat 15:34-38 10 uk nich aun de säwen Brood fa de vea-dusent, un woo väl Kjarw jie doa opphoowen? 11 Woosoo vesto jie nich, daut Ekj nich vom Broot jerät hab, oba daut jie junt heeden sellen fa de Farisäa un Saduzäa äa Suadieech? 12 Dan vestunden see, daut Hee nich jesajcht haud, daut see sikj sullen heeden fa dän Suadieech em Broot, oba fa de Farisäa un Saduzäa äare Lia.

13 Aus Jesus en de Jäajent von Cäsarea Filippi aunjekomen wia, fruach Hee siene Jinja un säd: Wäa sajen de Lied, daut Ekj, de Menschensän, sie? 14 Un see säden: Eenje sajen, Du best Johanes de Deepa; aundre oba, Elia; noch aundre, Jeremia ooda eena von de Profeeten. Mat 14:2; 17:10; Luk 7:16 15 Dan säd Hee to äant: Jie oba, wäa saj jie, daut Ekj sie? 16 Doa auntwuad Simon Petrus un säd: Du best de Christus, de Sän vom läwendjen Gott! Joh 6:69 17 Un Jesus auntwuad un säd to am: Seelich best du, Simon, Bar-Jona*. Wiels Fleesch un Bloot haft die daut nich jeopenboat, oba mien Voda em Himmel. Mat 11:27; Gal 1:15-16 18 Un Ekj saj die uk, daut du best Petrus, un opp disen Steen well Ekj miene Jemeent buen, un de Puaten von de Hal sellen ar nich unjakjrieen. Joh 1:42; Efs 2:20 19 Un Ekj woa die de Schlätels vom Himmelrikj jäwen, un waut du oppe Ieed binjen woascht, saul uk em Himmel jebungen sennen, un waut du oppe Ieed leesen woascht, saul uk em Himmel jeleest sennen. Mat 18:18 20 Dan befool Hee siene Jinja, daut see daut to kjeenem sajen sullen, daut Hee Jesus, de Christus wia. Mat 17:9

21 Von dan aun funk Jesus aun, siene Jinja to wiesen, daut Hee no Jerusalem gonen must un von de Eltestasch un Huagepriesta un Schreftjelieede väl lieden un dootjemoakt woaren un aum dredden Dach opperwakjt woaren. Mat 12:40; Joh 2:19 22 Dan neem Petrus Am tosied un funk aun, Am to bedreiwen un säd: Har, schoon Die selfst! Daut saul* Die nich passieren! 23 Hee oba dreid sikj om un säd to Petrus: Go hinja Mie, Soton, du best Mie een Oajanis! Wiels du denkjst nich, waut von Gott, oba waut von Menschen es.

24 Dan säd Jesus to siene Jinja: Wan Mie wäa nofoljen well, dee saul sikj selfst aufsajen, sien Kjriez opp sikj nämen un Mie nofoljen. Mat 10:38-39; 1Pe 2:21 25 Wiels wäa sien Läwen raden well, dee woat daut velieren; oba wäa sien Läwen om mient-haulwen velist, woat daut finjen. Opb 12:11 26 Wiels waut halpt eenem Mensch daut, wan hee de gaunze Welt jewennen wudd, oba siene ieejne Seel velieren wudd? Ooda waut kaun een Mensch fa een Tusch jäwen fa siene Seel? Luk 12:20; Ps 49:9 27 Wiels de Menschensän woat en sien Voda siene Harlichkjeit met siene Enjel toop komen un eenem jiedren betolen no siene Woakjen. Ree 2:6 28 Ekj saj junt woarhauftich: Doa sent eenje von dee, dee hia stonen, dee dän Doot nich schmakjen woaren, bat see woaren seenen dän Menschensän komen en sien Rikj. Mat 10:23