1 Aus Jesus jebuaren wia en Betlehem en daut judische Launt, en de Doag von däm Kjennich Herodes, kjikj, doa kjeemen Weise Mana utem Oosten no Jerusalem un säden: Luk 2:1-7 2 Wua es de niejebuarna Kjennich von de Juden? Wiels wie haben sienen Stiern jeseenen em Oosten un sent jekomen, Am aun to bäden. 4Mo 24:17

3 Aus de Kjennich Herodes daut hieed, veschrock hee, un gaunz Jerusalem met am. 4 Un hee vesaumeld aule Huagepriesta un Schreftjelieede von daut Volkj un forscht von äant no, wua de Christus sull jebuaren woaren. 5 See säden to am: En Betlehem von Judäa; wiels soo steit derch dän Profeet jeschräwen: Mich 5:2; Joh 7:42 6 "Un du, Betlehem en daut judische Launt, best goanich daut Kjlanste mank Juda äare Rejiera; wiels ut die woat een Leida rutkomen, dee mien Volkj Israel rejieren* woat"! Jes 9:7; Jes 40:10-11; Joh 10:11

7 Dan roopt Herodes sikj de weise Mana heemlich un forscht äant jeneiw ut, to woone Tiet daut Stiern verendach jekomen wia, 8 un hee schekjt äant no Betlehem un säd: Got un forscht jeneiw no daut Kjint. Un wan jie daut jefungen haben, dan sajcht mie daut, soo daut ekj uk komen kaun, daut aun to bäden.

9 Un aus see dän Kjennich jehieet hauden, jinjen see han, un kjikj, daut Stiern, waut see em Oosten jeseenen hauden, jinkj ver äant, bat daut kjeem un äwa däm Plauz stell stunt, wua daut Kjint wia. 10 Aus see daut Stiern sagen, freiden see sikj met sea groote Freid. 11 Un aus see en daut Hus nenjekomen wieren, sagen see daut Kjint met siene Mutta Maria. Un see follen dol un bäden Am aun un muaken äare Schaza op un jeewen Am Jeschenkja: Golt, Weiruak un Mirren. Ps 72:10,15; Jes 60:6 12 Un wiels see em Droom wieren aunjewäsen worden, nich wada no Herodes trigj to gonen, jinjen see opp eenen aundren Wajch trigj en äa Launt.

13 Aus see opp däm Trigjwajch wieren, kjikj, doa kjeem een Enjel vom Harn no Josef em Droom un säd: Sto opp, nemm daut Kjint un siene Mutta un flicht en Ägipten nenn, un bliew doa, bat ekj die sajen woa. Wiels Herodes woat daut Kjint sieekjen, daut om to brinjen. 14 Dan stunt hee opp, neem daut Kjint un siene Mutta enne Nacht un reisd en Ägipten nenn. 15 Un bleef doa, bat Herodes jestorwen wia, soo daut erfelt wort, waut von däm Harn es jesajcht worden derch dän Profeet, dee doa säd: "Ut Ägipten hab Ekj mienen Sän jeroopt." Hos 11:1,2; 2Mo 4:22-23

16 Aus Herodes sach, daut de Weise Mana am aunjeschmäat hauden, wort hee sea doll un schekjt no Betlehem un no de gaunze Omjäajent un leet aul de Junkjes dootmoaken, dee twee Joa un doarunja wieren, no de Tiet, dee hee von de weise Mana jeneiw utjeforscht haud. 17 Dan wort erfelt, waut doa es jesajcht worden derch dän Profeet Jeremia, dee doa sajcht: Jer 31:15 18 "Eene Stemm es en Rama jehieet worden, väl Hielen un Kloagen un Roaren; Rahel hielt äwa äare Kjinja un well sikj nich treesten loten, wiels see nich mea sent." 1Mo 35:19; Jer 31:15

19 Oba aus Herodes ieescht jestorwen wia, kjikj, doa kjeem een Enjel vom Harn no Josef em Droom en Ägipten 20 un säd: Sto opp, nemm daut Kjint un siene Mutta, un trakj no daut Launt Israel, wiels dee sent jestorwen, dee daut Kjint nom Läwen stunden. 2Mo 4:19 21 Dan stunt hee opp, neem daut Kjint un siene Mutta un kjeem en daut Launt Israel. 22 Aus hee oba hieed, daut Archelaus en sien Voda Herodes siene Städ äwa Judäa rejieed, fercht hee sikj, doa han to gonen; un aus hee em Droom jettlich aunjewäsen wort, jinkj hee en de Jäajent von Galiläa. 23 Un hee kjeem un wond en eene Staut, dee Nazaret heet; soo daut erfelt wort, waut derch de Profeeten jesajcht es: "Hee saul Nazarena heeten." Luk 2:39; Joh 1:46; Jes 11:1