1 Recht nich, daut jie nich jerecht woaren. Ree 2:1; 1Kor 4:5; Jak 4:12 2 Wiels met daut Jerecht, wuamet jie rechten, woa jie jerecht woaren; un met de Mot, wuamet jie mäten, woat junt jemäten woaren. Jes 33:1; Mrk 4:24 3 Oba wuarom sitst du dän Spletta*, dee en dien Brooda sien Uag es, oba dän Baulkjen en dien ieejnet Uag moakjst du nich? 4 Ooda woo kaust du to dienem Brooda sajen: Lot mie dän Spletta ut dien Uag trakjen, un kjikj, een Baulkjen es en dien ieejnet Uag? 5 Du Heichla! Trakj ieescht dän Baulkjen ut dien ieejnet Uag, dan woascht du kloa seenen kjennen, dän Spletta ut dien Brooda sien Uag to trakjen.

6 Jäft de Hunj nich daut Heilje, un schmiet june Parlen nich ver de Schwien, daut see dee nich met äare Feet veklunjen un sikj omdreien un junt verieten. Mat 10:11

7 Froacht, un junt woat jejäft woaren; sieekjt, un jie woaren finjen; klopt aun, un junt woat opjemoakt woaren. Jer 29:13-14; Mrk 11:24; Joh 14:13 8 Wiels een jiedra, dee doa frajcht, kjricht, un wäa doa sieekjt, finjt, un wäa doa aunklopt, däm woat opjemoakt woaren. 9 Ooda woon Mensch es doa von junt, wan sien Sän no Broot frajcht, am eenen Steen doafäa jeft? 10 Ooda, wan hee no eenem Fesch frajcht, daut Hee am wudd eene Schlang jäwen? 11 Wan jie nu, dee jie bees sent, weeten june Kjinja goode Gowen to jäwen, wooväl mea woat jun Voda em Himmel deejanje goode Dinja jäwen, dee Am doano froagen? Jak 1:17 12 Aulsoo, aules, waut jie wellen, daut junt de Menschen doonen sellen, daut doot jie äant uk; wiels daut es daut Jesaz un de Profeeten. Mat 22:36-40; Ree 13:8-10; Gal 5:14

13 Got derch de enje Puat. Wiels de Puat es wiet un de Wajch es breet, dee en daut Vedoawen fieet, un väle sent daut, dee doa nengonen. Luk 13:24 14 Wiels de Puat es enj un de Wajch es schmaul, dee toom Läwen fieet, un daut sent weinich, dee dän finjen. Mat 19:24; Apj 14:22

15 Seet junt väa ver de faulsche Profeeten, dee en Schops-Kjleeda no junt komen, oba ennalich sent see rietende Wilw. Mat 24:4-5,24; 2Kor 11:13-15 16 Aun äare Frucht sell jie äant erkjanen. Saumelt eena Wiendruwen von Dornen ooda Fiejen von de Distlen? Gal 5:19-22 17 Jrod soo, een jieda gooda Boom brinjt goode Frucht, oba een schlajchta Boom brinjt schlajchte Frucht. Mat 12:33 18 Een gooda Boom kaun nich schlajchte Frucht brinjen, un een schlajchta Boom kaun nich goode Frucht brinjen. 19 Jieda Boom, dee nich goode Frucht brinjt, woat aufjehakt un en daut Fia jeschmäten. Mat 3:10; Joh 15:2,6 20 Doawäajen, aun äare Frucht sell jie äant erkjanen.

21 Dee woaren nich aula en daut Himmelrikj komen, dee to Mie sajen: Har, Har! Oba, wäa dän Wellen von mien Voda deit, dee em Himmel es. Ree 2:13; Jak 1:22 22 Väle woaren aun janem Dach to Mie sajen: Har, Har, hab wie nich en dienem Nomen jeprofezeit un en dienem Nomen Diewels rutjedräwen un en dienem Nomen väle jewaultje Woakjen jedonen? Jer 27:15 23 Un dan woa Ekj to äant bekjanen: Ekj hab junt noch niemols jekjant: Wajch von Mie, dee jie Jesazlooset wirkjen! Mat 25:12,41; 2Tim 2:19

24 Doawäajen, een jiedra, dee dise miene Wieed hieet un deit dee, dän well Ekj met eenem kluaken Maun vejlikjen, dee sien Hus opp dän Steengrunt bud. 25 Un de Plauzräajen foll un de Wotastreem kjeemen un de Wint blosd un schluach jäajen daut Hus, un daut foll nich, wiels daut opp dän Steen jejrint wia. 26 Un een jiedra, dee dise miene Wieed hieet un deit dee nich, woat met eenem tierichten Maun vejlikjt woaren, dee sien Hus opp dän Saunt bud. 27 Un de Plauzräajen foll un de Wotastreem kjeemen un de Wint blosd un schluach jäajen daut Hus, un daut foll, un sien Faul wia groot.

28 Un daut passieed, aus Jesus met dise Räd derch wia, staunden de Menschen äwa siene Lia; Apj 2:12 29 wiels Hee lieed äant aus eena, dee Vollmacht* haft, un nich soo aus de Schreftjelieede. Joh 7:16,46