1 Aus Hee vom Boajch raufstieech, foljden Am groote Volkjshäaden. 2 Un kjikj, een Leprakranka kjeem, bäd Am aun un säd: Har, wan Du west, kaust Du mie reinjen. 3 Un Jesus strakjt siene Haunt ut, schieed am aun un säd: Ekj well; sie jereinicht! Un fuaz wia hee von siene Leprakrankheit rein. 4 Un Jesus säd to am: See doano, daut du dit kjeenem sajchst, oba go han, wies die däm Priesta un brinj daut Opfa, daut Moses befolen haft, to een Zeichnis fa äant. 3Mo 14:2-32

5 Aus Jesus en Kapernaum nenkjeem, kjeem een Hauptmaun no Am, dee prachad Am 6 un säd: Har, mien Kjnajcht licht tus jelämt un sea jekjwält. 7 Un Jesus säd to am: Ekj well komen un am heelen. 8 De Hauptmaun auntwuad un säd: Har, ekj sie daut nich wieet, daut Du unja mien Dak kjemst; oba saj bloos een Wuat, dan woat mien Kjnajcht jesunt woaren. 9 Wiels ekj sie uk een Mensch, unja Autorität jestalt, un hab Soldoten unja mie; un ekj saj to disem: Go, un hee jeit; un toom aundren: Komm häa, un hee kjemt; un to mienem Kjnajcht: Doo dit, un hee deit daut. 10 Aus Jesus daut hieed, wundad Hee sikj un säd to dee, dee Am nofoljden: Ekj saj junt woarhauftich: Soonen grooten Gloowen hab Ekj nichmol en Israel jefungen. Mrk 6:6; Luk 18:8 11 Oba Ekj saj junt dit: Väle woaren vom Oosten un Wasten komen un met Abraham un Isaak un Jakob aum Desch setten em Himmelrikj; 12 oba de Kjinja von daut Rikj woaren rutjeschmäten woaren en de butaschte Diestanis; doa woat daut Hielen un daut Tänen-Kjnirschen sennen. Luk 13:28-29 13 Un Jesus säd to däm Hauptmaun: Go, un daut woat die soo woaren aus du jejleeft hast. Un krakjt en deeselwje Stund wort sien Kjnajcht jesunt. Mat 9:29; 15:28

14 Un aus Jesus en Petrus sien Hus kjeem, sach Hee, daut siene Schwieemutta lieech un Feeba haud. 1Kor 9:5 15 Un Hee schieed äare Haunt aun, un daut Feeba veleet ar. Dan stunt see opp un bedeend äant*. 16 Dan aus daut Owent jeworden wia, brochten see väle Besätne no Am, un Hee dreef de Jeista rut met sien Wuat un heeld aul de Kranke, 17 soo daut erfelt wort, waut derch dän Profeet Jesaja jesajcht es, dee doa säd: "Hee haft onse Schwakheiten opp sikj jenomen un onse Krankheiten jedroacht." Jes 53:4

18 Un aus Jesus groote Volkjshäaden rom sikj sach, befool Hee, äwa to foaren no de aundre Sied. 19 Un een Schreftjelieeda kjeem no Am un säd to Am: Meista*, ekj well die nofoljen, wuaemma Du hanjeist. 20 Un Jesus sajcht to am: De Fas haben Lajcha, un de Väajel unja däm Himmel haben Nasta, oba de Menschensän haft nich, wua Hee sienen Kopp hanlajen kaun. 2Kor 8:9 21 Un een aundra von siene Jinja säd to Am: Har, erlaub mie, ieescht han to gonen un mienen Voda to begrowen. Mat 10:37 22 Oba Jesus säd to am: Folj mie no, un lot de Doodje äare Doodes begrowen.

23 Un aus Hee en daut Schepp nenjestäajen wia, foljden siene Jinja Am no. 24 Un kjikj, een jewaultja Storm kjeem oppem Mäa opp, soo daut de Walen daut Schepp bedakjten, oba Hee schleep. 25 Un siene Jinja kjeemen no Am un wuaken Am opp un säden: Har, rad ons, wie komen om! 26 Un Hee säd to äant: Wuarom sent jie soo voll Forcht, Oo jie Kjliengloowsche? Dan stunt Hee opp un beschwicht de Wind un daut Mäa; un daut wort sea stell. Ps 89:10; Apj 27:22,34 27 Un de Menschen vewundaden sikj un säden: Waut es daut fa eena, daut Am soogoa de Wind un daut Mäa jehorchen?

28 Un aus Hee no de aundre Sied kjeem en de Gergesena äa Launt, bejäajenden Am twee, von Diewels besäten, dee ut de Jräwa rutkjeemen un wieren sea jefäadlich, soo daut kjeena dän Wajch gonen kunn. 29 Un kjikj, dee schrieejen: Waut hab wie met Die to doonen, Jesus, Du Gott sien Sän? Best Du jekomen, ons ver de Tiet to kjwälen? Luk 4:41; Jak 2:19; 2Pe 2:4 30 Doa wia oba wietauf von äant eene groote Häad Schwien, dee doa weiden. 31 Un de Diewels prachaden Am un säden: Wan Du ons rutdrifst, dan erlaub ons en de Häad Schwien nenn to foaren. 32 Un Hee säd to äant: Got! Un see kjeemen rut un fuaren en de Häad Schwien nenn. Un de gaunze Häad Schwien moaracht äwa dän Aufgrunt en daut Mäa nenn un kjeemen em Wota om. 33 De Hoads oba kleiwden ut un jinjen en de Staut nenn un vetalden aules un waut met de Besätne passieet wia. 34 Un kjikj, de gaunze Staut kjeem rut, Jesus to trafen. Un aus see Am sagen, prachaden see Am, äare Jäajent to veloten.