1 Un daut passieed, aus Jesus met dise Räd to Enj wia, veleet Hee Galiläa un kjeem en de Jäajenden von Judäa aun de aundre Sied däm Jordan. 2 Un Am foljden groote Volkjshäaden, un Hee heeld äant doa.

3 Dan kjeemen de Farisäa no Am, vesochten Am un säden to Am: Es eenem Maun daut erlaupt, daut hee sikj von siene Fru scheet wäajens irjent eene Uasoak? 4 Hee oba auntwuad un säd to äant: Hab jie nich jeläst, daut Hee, dee äant em Aunfank muak, äant Maun un Fru muak 1Mo 1:27 5 un säd: "Doawäajen woat een Mensch Voda un Mutta veloten un siene Fru aunhenjen, un dee twee woaren een Fleesch sennen"? 1Mo 2:24 6 Soo sent see nu nich mea twee, oba een Fleesch. Waut nu Gott toopjebrocht haft, saul de Mensch nich scheeden. 1Kor 7:10-11

7 See säden to Am: Wuarom haft Moses befolen, eenen Scheedungs-Breef to jäwen un ar gonen to loten? Mat 5:31; 5Mo 24:1 8 Hee säd to äant: Moses haft junt erlaupt von june Frues to scheeden, wäajens jun Hoathoatjet. Oba von Aunfank es daut nich soo jewast. 9 Ekj oba saj junt: Wäaemma sikj von siene Fru scheeden woat, buta wäajen Huararie, un eene aundre friet, dee brakjt de Ehe; un wäaemma sikj met eene Jeschiedne befriet, dee brakjt de Ehe. Mat 5:32; Luk 16:18 10 Siene Jinja säden to Am: Wan de Sach von däm Maun un siene Fru soo steit, dan es daut nich goot, to befrieen. 11 Oba Hee säd to äant: Nich aule foten dit Wuat, oba wäm daut jejäft es. 1Kor 7:7 12 Wiels daut jeft Eunuchs, dee vom Muttalief soo jebuaren sent, un daut jeft Eunuchs, dee von de Menschen veschnäden worden sent; un daut jeft Eunuchs, dee sikj selfst veschnäden haben wäajens daut Himmelrikj haulwen. Wäa daut foten kaun, dän lot daut foten!

13 Dan worden kjliene Kjinja no Am jebrocht, daut Hee siene Henj opp äant läd un bäd. Oba de Jinja schullen äant. 14 Oba Jesus säd: Lot de kjliene Kjinja no Mie komen un wäat äant nich, wiels ut soone es daut Himmelrikj. Mat 18:2-3 15 Un Hee läd äant siene Henj opp un jinkj von doa wieda.

16 Un kjikj, eena kjeem un säd no Am: Gooda Meista, waut fa Goodet saul ekj doonen, om daut eewje Läwen to haben? 17 Hee oba säd to am: Waut nanst du Mie goot? Doa es kjeena goot, buta eena, Gott. Oba wan du en daut Läwen nengonen west, dan hool de Jebooten. 18 Hee säd to Am: Woone? Jesus oba säd: "Du saust nich dootmoaken; du saust nich ehebräakjen; du saust nich stälen; du saust nich faulschet Zeichnis jäwen; 19 iea dienen Voda un Mutta"; un: "Du saust dienen Näakjsten leewen soo aus die selfst." 2Mo 20:12-16; 3Mo 19:18 20 De junga Maun säd to Am: Aul dise hab ekj jehoolen von miene Jugent aun; waut fält mie noch? 21 Jesus säd to am: Wan du west vollkomen sennen, dan go un vekjeep, waut du hast, un jeff daut de Oame, un du woascht een Schauz em Himmel haben; un komm, folj Mie no. Mat 6:20; Luk 12:33 22 Aus de junga Maun daut Wuat hieed, jinkj hee truarich wajch, wiels hee haud väle Jieta. Ps 62:11

23 Un Jesus säd to siene Jinja: Ekj saj junt woarhauftich: Een Rikja woat schwoa en daut Himmelrikj nenkomen. 24 Un Ekj saj junt noch eenmol: Daut es leichta fa eenen Kameel derch een Noteluag to gonen, aus daut een Rikja en Gott sien Rikj nenkjemt. 25 Aus de Jinja daut hieeden, vewundaden see sikj sea un säden: Wäa kaun dan jerat woaren? 26 Jesus oba kjikjt äant aun un säd: Bie de Menschen es daut onmäajlich, oba bie Gott es aules mäajlich. Hiob 42:2

27 Dan auntwuad Petrus un säd to Am: Kjikj, wie haben aules veloten un sent Die nojefolcht; waut hab wie doafäa? Mat 4:20-22 28 Jesus oba säd to äant: Ekj saj junt woarhauftich; jie, dee jie Mie nojefolcht sent, woaren en de Wadajeburt, wan de Menschensän opp däm Troon von siene Harlichkjeit setten woat, uk opp twalw Troonen setten un de twalw Stam von Israel rechten. Luk 22:28-30; 1Kor 6:2; Opb 3:21 29 Un wäaemma doa veloten haft, Hiesa ooda Breeda ooda Sestren ooda Voda ooda Mutta ooda Fru ooda Kjinja ooda Launt, om mien Nomens haulwen, dee woat daut hundatmol nämen un daut eewje Läwen oawen. 30 Oba väle von de Ieeschte woaren de Latste, un de Latste woaren de Ieeschte sennen.