1 Wiels daut Himmelrikj es soo aus met eenem Maun, eenem Wirtschofta, dee aum Zemorjes rutjinkj, Oabeida to meeden en sienen Wiengoaden. 2 Un aus hee met de Oabeida fa eenen Denarius aus Dachloon äwareen-jekomen wia, schekjt hee äant en sienen Wiengoaden. 3 Un aus hee om de dredde* Stund rutjinkj, sach hee aundre opp däm Moakjt-Plauz mässich* stonen, 4 un hee säd to äant: Got jie uk en dän Wiengoaden, un waut rajcht es, well ekj junt jäwen. 5 Un see jinjen han. Un hee jinkj wada rut om de saste un om de näajende Stund un deed krakjt soo. 6 Aus hee oba om de alwde Stund rutjinkj, funk hee aundre doa mässich stonen un säd to äant: Wuarom sto jie hia dän gaunzen dach mässich? 7 See säden to am: Wiels ons kjeena jemeet haft. Hee säd to äant: Got jie uk en dän Wiengoaden, un waut rajcht es, woa jie kjrieen.

8 Aus daut dan ieescht Owent wort, säd de Har von däm Wiengoaden to sienem Vewaulta: Roop de Oabeida un betol äant dän Loon un fang biem Latsten aun un soo bat dän Ieeschten. 9 Un dan kjeemen dee, dee om de alwde Stund jemeet wieren un kjrieejen jieda eenen Denarius. 10 Aus oba de ieeschte kjeemen, dochten see, see wudden mea kjrieen; un see kjrieejen uk jieda eenen Denarius. 11 Un aus see dän kjrieejen, grunsten see jäajen dän Wirtschofta 12 un säden: Dise Latste haben mau eene Stund jeoabeit, un du hast äant ons jlikj jemoakt, dee wie de Doages-Laust un Hett jedroacht haben. 13 Hee oba auntwuad un säd to eenem von äant: Frint, ekj doo die kjeen Orrajcht. Best du die nich met mie eenich jeworden fa eenen Denarius? 14 Nemm daut dienje un go! Ekj oba well disem Latsten sooväl jäwen aus die. 15 Es mie daut nich erlaupt, met daut Mienje to doonen, waut ekj well? Kjikjst du doawäajen bees*, wiels ekj soo goot sie? Ree 9:16,21 16 Soo woaren de Latste de Ieeschte un de Ieeschte de Latste sennen; wiels väle sent beroopen, oba weinje sent uterwält.

17 Un aus Jesus noppjinkj no Jerusalem, neem Hee de twalw Jinja opp däm Wajch oppoat un säd to äant: 18 Kjikj, wie gonen nopp no Jerusalem, un de Menschensän woat aun de Huagepriesta un Schreftjelieede äwajäft woaren, un dee woaren Am toom Doot ve-uadeelen. Mat 16:21; 17:22-23; Joh 2:13 19 Dee woaren Am de Heiden äwajäwen, toom vespotten, priejlen un kjriezjen; un aum dredden Dach woat Hee wada oppstonen.

20 Dan kjeem de Mutta von Zebedäus siene Kjinja met äare Säns no Am aunbädent, om waut von Am to bedden. Mat 10:2 21 Hee oba säd to ar: Waut west du? See säd to Am: Saj, daut dise, miene twee Säns, en dien Kjennichrikj setten kjennen, eena to diene rajchte Sied un eena to diene Linkje. Mat 19:28 22 Oba Jesus auntwuad un säd: Jie weeten nich, no waut jie froagen. Kjenn jie dän Drinkj drinkjen, dän Ekj drinkjen woa, un jedeept woaren met de Doop, wuamet Ekj jedeept woa? See säden to Am: Daut kjenn wie. Mat 26:39 23 Un Hee säd to äant: Jie woaren woll mienen Drinkj drinkjen un jedeept woaren met de Doop, wuamet Ekj jedeept woa; oba aun miene rajchte un aun miene linkje Sied setten, es nich miene Sach, to jäwen, oba daut es fa dee, dee daut von mienem Voda reedjemoakt es. Apj 12:2

24 Un aus de tieen daut hieeden, worden see oajalich äwa de twee Breeda. Luk 22:24-27 25 Oba Jesus roopt äant no sikj un säd: Jie weeten, daut de Leidasch von de Heiden äwa äant harschen, un de Groote eewen Jewault äwa äant. 26 Mank junt oba saul daut nich soo sennen; oba wäa mank junt groot sennen well, dee saul jun Deena sennen; Mat 23:11; 1Kor 9:19 27 un wäa mank junt de Väaschta sennen well, dee saul jun Kjnajcht sennen. Mrk 9:35 28 Jrod soo aus de Menschensän nich kjeem, bedeent to woaren, oba to deenen un sien Läwen aus Leesunk fa väle to jäwen. Flp 2:7; 1Pe 1:18-19

29 Un aus see von Jericho rutjinjen, foljd Am eene groote Volkjshäad. 30 Un kjikj, twee Blinje sauten aum Wajch; aus see hieeden, daut Jesus vebie-jinkj, schrieejen see un säden: Erboarm die äwa ons, Har, du David sien Sän! 31 Oba de Volkjshäad beschwicht äant, daut see sullen stell sennen. Oba see schrieejen bloos soo väl dolla un säden: Har, du David sien Sän, erboarm Die äwa ons! 32 Un Jesus stunt stell, roopt äant un säd: Waut well jie haben, daut Ekj junt doonen saul? 33 See säden to Am: Har, daut onse Uagen opjemoakt woaren. 34 Un Jesus jaumad daut äwa äant, schieed äare Uagen aun, un fuaz worden äare Uagen wada seenent, un see foljden Am.