1 Sie ekj nich een Apostel? Sie ekj nich frie? Hab ekj nich Jesus Christus, onsen Harn, jeseenen? Sent jie nich mien Woakj en däm Harn? Apj 9:3-5,15; 1Kor 15:8 2 Wan ekj fa aundre nich een Apostel sie, sie ekj emmahan eena fa junt, wiels daut Stampel von mien Apostelaumt sent jie en däm Harn. 1Kor 4:15; 2Kor 3:2-3

3 Dit es miene Veteidjunk fa dee, dee mie utforschen: 4 Hab wie nich een Rajcht, to äten un to drinkjen? Luk 10:8 5 Hab wie nich een Rajcht, eene Sesta met to fieren, eene Fru, soo aus uk de aundre Apostel un däm Harn siene Breeda un Kefas? Mat 8:14; Joh 1:42 6 Ooda haben bloos ekj un Barnabas nich een Rajcht, nich to oabeiden? Apj 4:36; 2Tess 3:7-9 7 Wäa jeit aus Soldot opp siene ieejne Kosten? Wäa plaunt eenen Wiengoaden un at nich von de Frucht? Ooda wäa weit eene Häad un näat sikj nich von de Malkj von de Häad? 8 Saj ekj dise Dinja menschlich? Ooda sajcht nich uk daut Jesaz soo? 5Mo 25:4; 1Tim 5:18 9 Wiels en Moses sien Jesaz steit jeschräwen: "Du saust däm Oss, dee doa drascht, nich de Frät vebinjen". Es Gott fa de Ossen besorcht? 10 Ooda sajcht Hee daut nich derchut wäajens ons? Wäajens ons, onen Twiewel, es daut jeschräwen, daut de Plieejenda opp Hopninj plieejen saul, un dee doa en Hopninj drascht, sull aun siene Hopninj deelnämen. 11 Wan wie junt daut Jeistliche jeseit haben, es daut dan een grootet Dinkj, wan wie jun Fleeschlichet arnten? Ree 15:27 12 Wan aundre dit Rajcht aun junt deelhauftich sent, sent wie nich noch ea? Oba wie haben dit Rajcht nich jebrukt, oba wie vedroagen aules, om daut wie Christus sien Evangelium nich een Hindanis moaken. Apj 20:33-35; 2Kor 11:9 13 Weet jie nich, daut dee, waut met de heilje Dinja oabeiden, von ut däm Tempel äten? Un dee aum Aultoa deenen, Poat aum Aultoa haben? 4Mo 18:24-32; 5Mo 18:1-3 14 Jrod soo haft de Har ve-ordent, daut dee, waut daut Evangelium prädjen, sellen vom Evangelium läwen. Luk 10:7; Gal 6:6

15 Oba ekj hab kjeene von dise Dinja jebrukt. Ekj hab dit uk nich jeschräwen, om daut et met mie soo woaren sull; wiels daut wia fa mie bäta, to stoawen, aus daut irjentwäa mien Low to nuscht moaken sull. Apj 18:3 16 Wiels wan ekj daut Evangelium vekjindj, hab ekj kjeen Low; wiels een Muss licht opp mie. Un wee mie, wan ekj daut Evangelium nich vekjindj! Jer 20:9 17 Wiels wan ekj dit wellich doo, dan hab ekj eenen Loon; oba wan ekj daut onwellich doo, es mie de Oppdrach doch aunvetrut. 1Kor 4:1 18 Waut es dan nu mien Loon? Daut biem Evangelium vekjindjen, ekj daut Evangelium von Christus emsonst väastal, soo daut ekj mien Rajcht aum Evangelium nich mesbruck.

19 Wiels wan ekj uk von aulem frie sie, hab ekj mie doch selfst fa aulem to eenem Kjnajcht jemoakt, soo daut ekj väle jewennen mucht. Mat 20:27; Ree 15:2 20 Un fa de Juden sie ekj aus een Jud jeworden, daut ekj de Juden mucht jewennen; fa dee, unja daut Jesaz, aus unja daut Jesaz, daut ekj dee jewennen mucht, dee unja daut Jesaz sent; 1Kor 10:33; Apj 16:3; 21:20-26 21 fa dee, onen Jesaz, aus onen Jesaz (wan ekj uk nich onen Jesaz ver Gott sie, oba unja Christus sien Jesaz), daut ekj dee mucht jewennen, dee onen Jesaz sent. Gal 2:3 22 To de Schwake sie ekj soo jeworden aus een Schwaka, om daut ekj de Schwake jewenn. Ekj sie fa aulen aules jeworden, om daut ekj opp aule Oat atelje rad. Ree 11:14 23 Oba ekj doo dit om daut Evangelium haulwen, om daut ekj aun daut deelhauftich woa.

24 Weet jie nich, daut dee, waut em Stadion ranen, ranen aula, oba eena kjricht dän Pries? Rant soo, daut jie dän kjrieen! Flp 3:14; 2Tim 4:7 25 Een jiedra oba, dee doa kjamft, enthelt sikj von aules; jane doonen daut, om eene vejenkjliche Kroon to kjrieen, oba wie eene Onvejenkjliche. 2Tim 2:4-5; 1Pe 5:4 26 Ekj ran aulsoo, nich aus onsecha; ekj feit soo, nich aus eena, dee de Loft schleit; 27 oba ekj bedwinj mienen Kjarpa un unjastal dän, daut ekj nich, nodäm ekj to aundre jeprädicht hab, selfst een Veschmätna woa. Ree 13:14