1 Ekj well junt, Breeda, oba nich onweetent hoolen, daut onse Vodasch aula unja de Wolkj wieren un aula derch daut Mäa jinjen 2Mo 13:21; 14:22 2 un sent aula opp Moses jedeept en de Wolkj un en daut Mäa 3 un aula eeten dautselwje jeistliche Äten 2Mo 16:4,35; 5Mo 8:3 4 un aula drunken dänselwjen jeistlichen Drinkj; wiels see drunken ut eenem jeistlichen Steen, dee metfoljd, un dee Steen wia Christus. 2Mo 17:6 5 Oba aun väle von äant haud Gott kjeen Jefaulen, wiels see worden en de Wiltnis hanjestrakjt. 4Mo 14:22-32 6 Oba dise Dinja sent onse Väabilda jeworden, daut wie ons nich sullen no beese Dinja jelesten loten, jrod soo aus uk jane sikj jelesten leeten. 4Mo 11:4 7 Woat uk nich Jettadeena, soo aus atelje von dee, soo aus jeschräwen steit: "Daut Volkj sad sikj dol, to äten un to drinkjen, un stunt opp, to spälen". 2Mo 32:6 8 Lot ons uk nich Huararie driewen, soo aus atelje von dee Huararie dreewen un follen en eenem Dach dree-un-twintich dusent. 4Mo 25:1,9 9 Lot ons uk nich Christus vesieekjen, jrod soo aus atelje von äant Am vesochten un worden von Schlangen omjebrocht. 4Mo 21:4-6 10 Grunst uk nich, soo aus atelje von dee grunsten un worden omjebrocht von däm Venichta. 4Mo 14:2,35-36; Heb 3:11,17

11 Aul dise Dinja passieeden to jane aus Väabilda; un dee sent fa onse Woarnunk jeschräwen, opp woone de Enja von de Welt jekomen es. 1Pe 4:7 12 Doawäajens, wäa doa meent, hee steit, saul opp-paussen, daut hee nich felt. 13 Junt haft noch kjeene Vesieekjunk jenomen, aus mau menschliche; oba Gott es tru, dee daut nich tooloten woat, daut jie äwa june Krauft vesocht woaren, oba woat met de Vesieekjunk uk eenen Utwajch moaken, soo daut jie daut vedroagen kjennen. Ps 68:20; 2Pe 2:9

14 Doawäajens, miene Jeleewde; flicht von däm Aufjetta-Deenst. 1Joh 5:21 15 Ekj räd aus to Vestendje; recht jie, waut ekj saj. 16 Daut jesäajende Kuffel, daut wie säajnen, es daut nich de Jemeenschoft von Christus sien Bloot? Daut Broot, daut wie bräakjen, es daut nich de Jemeenschoft von Christus sien Kjarpa? Mat 26:27; Apj 2:42; 1Kor 11:23-26 17 Wiels soo aus een Broot es, sent wie väle een Kjarpa; wiels wie aula aun een Broot deelhauftich sent. Ree 12:5; 1Kor 12:27 18 Kjikjt no Israel nom Fleesch. Sent nich dee, dee de Opfasch äten, Poatna von däm Aultoa? 3Mo 7:6 19 Waut saj ekj dan? daut de Aufgott irjentwaut es? ooda daut daut Aufjetta-Jeopfadet irjentwaut es? 1Kor 8:4 20 Oba daut, waut de Heiden opfren, daut opfren see fa de Diewels un nich fa Gott. Ekj well oba nich, daut jie Jemeenschoft haben met de Diewels. 21 Jie kjennen nich daut Kuffel von däm Harn un daut Kuffel von de Diewels drinkjen; jie kjennen nich aum Harn sien Desch deelhauftich sennen un aum Desch von de Diewels. Mat 6:24; 2Kor 6:15-16 22 Ooda reiz wie dän Harn toom Aufgonst? Sent wie stoakja aus Hee?

23 Aules es mie erlaupt, oba nich aules es nitzlich. Aules es mie erlaupt, oba nich aules but opp. 1Kor 6:12 24 Kjeena sull sien Ieejnet sieekjen, oba een jiedra, däm aundren sient. Ree 15:2; Flp 2:4 25 Aules, waut opp däm Fleesch-Moakjt vekoft woat, daut ät, onen to froagen, wäajens daut Jewessen haulwen. Ree 14:2-10,22 26 Wiels "de Ieed jehieet däm Harn un äare Vollheit". Ps 24:1; 5Mo 10:14 27 Wan junt oba irjentwäa von de Onjleewende enlot un jie wellen hangonen, dan ät, wautemma junt väajesat woat, un froacht nuscht, om daut Jewessen haulwen. 28 Oba wan irjentwäa to junt sajcht: Dit es Aufjetta-Jeopfadet, dan ät nich, om däm sient-haulwen, dee daut aunwees, un om daut Jewessen haulwen; wiels däm Harn jehieet de Ieed un äare Vollheit. 1Kor 8:7 29 Ekj saj daut oba nich von dien ieejnet Jewessen, oba von däm aundren sient; wiels wuarom sull miene Frieheit von eenem Aundren sien Jewessen jerecht woaren? 30 Wan ekj met Dankboakjeit deelnäm, wuarom woa ekj jelastat äwa daut, wuafäa ekj dank? 1Tim 4:4

31 Auf jie dan nu äten ooda drinkjen ooda waut jie doonen, doot aules to Gott siene Iea. Kol 3:17 32 Siet kjeen Aunstoos, nich to de Juden, nich to de Griechen uk nich to Gott siene Jemeent. Ree 14:13 33 Jrod soo aus ekj aulem en aules to jefaulen sieekj un nich mienen ieejnen Nutzen sieekj, oba väle aundre äaren, om daut see jerat woaren. 1Kor 9:20-22