1 Paulus, beroopen toom Apostel von Jesus Christus, derch Gott sien Wellen, un Sostenes, de Brooda, 2 aun Gott siene Jemeent, dee en Korint es, de Jeheilichte en Christus Jesus, de beroopne Heilje met aul dee, dee opp jieda Städ dän Nomen von ons Har Jesus Christus aunroopen, beides, äaren un onsen. Apj 9:14; 18:1-17; 1Kor 6:11 3 Jnod met junt un Fräd von Gott, onsem Voda, un däm Harn Jesus Christus!

4 Ekj dank mienem Gott emma om junt-haulwen fa Gott siene Jnod, dee junt jejäft es en Christus Jesus, 5 daut jie en aules sent rikj jemoakt worden en Am, en aule Lia un en aule Erkjantnis, 6 doano aus daut Zeichnis von Christus es en junt bestädicht worden, 7 soo daut junt daut aun kjeene Gow fält un wachten opp de Openboarunk von ons Har Jesus Christus, Tit 2:13; 2Pe 3:13-14 8 dee junt uk woat bestädjen batem Enj, soo daut jie schultloos sent aun däm Dach von ons Har Jesus Christus. Flp 1:6; 1Tess 3:13 9 Gott es tru, derch wäm jie beroopen sent to de Jemeenschoft von sien Sän Jesus Christus, ons Har. 1Tess 5:24

10 Ekj ermon junt oba, Breeda, derch dän Nomen von ons Har Jesus Christus, daut jie aula dautselwje räden un daut doa nich Spoolungen mank junt sent, oba daut jie vollkomen en dämselwjen Senn un en deeselwje Meeninj sent. Ree 15:5; 1Kor 11:18; Flp 2:2 11 Wiels mie es bekaunt jeworden von junt, miene Breeda, derch dee von Chloe, daut Striedarieen mank junt sent. 12 Ekj saj nu dit, daut mank junt een jiedra sajcht: Ekj sie fa Paulus: Un ekj fa Apollos: Un ekj fa Kefas: Un ekj fa Christus. Joh 1:42; Apj 8:24-27; 1Kor 3:4 13 Es Christus jetrant? Wort Paulus fa junt jekjriezicht? ooda word jie opp Paulus sien Nomen jedeept? 14 Ekj dank Gott, daut ekj kjeenem von junt jedeept hab, buta Krispus un Gajus, Apj 18:8; Ree 16:23 15 daut kjeena sajen kaun, daut ekj opp mienen Nomen jedeept hab. 16 Ekj hab oba uk daut Hus von Stefanas jedeept; sest weet ekj nich, auf ekj noch irjent aundre jedeept hab. 1Kor 16:15 17 Wiels Christus haft mie nich jeschekjt, to deepen, oba daut Evangelium to vekjindjen; nich met Wieed von Weisheit, soo daut Christus sien Kjriez nich nutzloos jemoakt woat.

18 Wiels daut Wuat vom Kjriez es eene Domheit fa dee, dee veloaren gonen; oba fa ons, dee wie jerat woaren, es daut eene Krauft von Gott. Ree 1:16; 2Kor 4:3 19 Wiels daut steit jeschräwen: "Ekj well de Weisheit von de Weise ombrinjen un daut Vestentnis von de Vestendje tosied saten". Jes 29:14 20 Wua es de Weisa? Wua es de Schreftjelieeda? Wua es de Weisa von dise Welt? Haft nich Gott de Weisheit von dise Welt to Noaheit jemoakt? Mat 11:25; Ree 1:22 21 Wiels wäajens de Welt en äare Weisheit Gott en siene Weisheit nich erkjand, jefoll Gott daut, derch de Domheit von de Prädicht deejanje to raden, dee doaraun jleewen. 22 Wäajen de Juden fodren een Tieekjen, un de Griechen sieekjen no Weisheit; Mat 12:38; Joh 4:48; Apj 17:18-21 23 oba wie prädjen Christus jekjriezicht, fa de Juden een Aunstoos un fa de Griechen* ne Domheit; Apj 17:32; Gal 5:11; 1Kor 2:14 24 oba dee, dee beroopen sent, beid, Juden uk Griechen, Christus, Gott siene Krauft un Gott siene Weisheit. Kol 2:3 25 Wiels Gott siene Noaheit es weisa aus de Menschen, un Gott siene Schwakheit es stoakja aus de Menschen.

26 Wiels jie seenen june Beroopunk, Breeda: Doa sent nich väl Weise nom Fleesch, nich väl Majchtje, nich väl Stotliche. Joh 7:48; Jak 2:1-5 27 Oba daut Noarische von de Welt haft Gott jewält, om de Weise to Schaund to moaken; un daut Schwake von de Welt haft Gott jewält, om daut Stoakje to Schaund to moaken; 28 un daut Jerinje von de Welt un waut ve-acht es, haft Gott jewält, un waut doa nuscht es, om daut tonicht to moaken, waut doa es, 29 om daut sikj ver Am kjeen Fleesch riemt. Ree 3:27; Efs 2:9 30 Oba von Am sent jie en Christus Jesus, Dee fa ons von Gott jemoakt es, Weisheit un Jerajchtichkjeit un Heilichkjeit un Erleesunk; Jer 23:5-6; Joh 17:19; 2Kor 5:21 31 om daut, soo aus jeschräwen steit: "Wäa sikj riemt, däm lot sikj en däm Harn riemen." Jer 9:22-23; 2Kor 10:17