1 Doa es auljemeen to hieren, daut doa Huararie mank junt es, un soone Huararie, dee nich mol mank de Heiden erwänt woat, daut eena sien Voda siene Fru haft. 3Mo 18:8 2 Un jie sent oppjeblost un haben nich leewa jetruat, om daut dee, dee daut Woakj jedonen haft, ut june Medd wajchjedonen wort. 1Kor 4:6-8 3 Wiels ekj, wan uk em Kjarpa aufwäsent, oba em Jeist jäajenwuatich, hab aul, aus jäajenwuatich, je-uadeelt, dän, dee daut Woakj jedonen haft: Kol 2:5 4 Em Nomen von ons Har Jesus Christus, wan jie vesaumelt sent, un mien Jeist, met de Krauft von ons Har Jesus Christus, Mat 16:19; 18:18; 2Kor 13:10 5 soonen aus daut däm Soton to äwajäwen, toom Vedoawen von daut Fleesch, daut de Jeist mucht jerat woaren aun däm Harn Jesus sien Dach. 1Tim 1:20 6 Jun Riemen es nich goot. Weet jie nich, daut een beskje Suadieech dän gaunzen Dieech vesuat? Gal 5:9 7 Doawäajens schauft dän oolen Suadieech rut, daut jie een niea Dieech sent, soo aus jie onjesuat sent. Wiels uk ons Passa, Christus, es fa ons jeopfat. 2Mo 12:3-20; 17:3; Jes 53:7; 1Pe 1:19 8 Doawäajens lot ons daut Fast hoolen, nich met oolem Suadieech, uk nich em Suadieech von de Schlajchtichkjeit un de Boosheit, oba met daut onjesuade Broot von de Reinheit un Woarheit.

9 Ekj hab junt en däm Breef jeschräwen, daut jie nich met Huara omgonen; 10 oba nich derchut met de Huara von dise Welt ooda de Jiezje ooda de Reiba ooda de Jettadeena; sest must jie ut de Welt rutgonen. 11 Oba nu hab ekj junt jeschräwen, kjeenen Omgank to haben, wan doa wäa een Brooda jenant woat un es een Huara ooda een Jiezja ooda een Jettadeena ooda een Lastra ooda een Drinkja ooda een Reiba; met soonem sell jie uk nich äten. 2Tess 3:6 12 Wiels waut hab ekj to rechten aun dee, dee doa buten sent? Doo jie nich dee rechten, dee bennen sent? 13 Oba dee doa buten sent, woat Gott rechten. Doot dän Beesen von mank junt rut. 5Mo 13:6; Mat 18:17