1 Äwa de Aufjetta-Opfasch weet wie, daut wie aula Erkjantnis haben. De Erkjantnis blost opp, oba de Leew but opp. Apj 15:29 2 Wan oba irjentwäa denkjt, hee weet waut, dee weet noch nuscht, woo hee weeten sull. Gal 6:3 3 Wan oba wäa Gott leeft, dee es von Am erkjant. 1Kor 13:12; Gal 4:9 4 Waut oba daut Äten von Aufjetta-Jeopfadet aunbelangt, weet wie, daut een Aufgott nuscht es en de Welt un daut doa kjeen aundra Gott es, aus mau Eena. 5Mo 6:4 5 Wan doa uk soone sent, dee Jetta jenant woaren, auf em Himmel ooda oppe Ieed (soo aus daut uk väle Jetta un väle Haren jeft), Ps 136:2-3; Ree 8:38-39; 1Kor 10:19-20 6 oba fa ons es doa een Gott, de Voda, von wäm aule Dinja sent un wie fa Am; un een Har Jesus Christus, derch wäm aule Dinja sent un wie derch Am. 2Mo 20:3; Mal 2:10; Joh 1:3; 1Kor 12:5-6; Efs 4:5-6; Kol 1:16

7 Oba dise Erkjantnis es nich en aulem; wiels atelje äten daut, met daut Jewessen von däm Aufgott, bat nu noch, aus Aufjetta-Jeopfadet, un äa Jewessen, daut schwak es, woat ve-onreinicht. 1Kor 10:28 8 Oba Äten loft ons nich ver Gott. Wan wie äten, sent wie doawäajens nuscht bäta; wan wie nich äten, sent wie doawäajens nuscht weinja. Ree 14:17 9 Paust opp, daut dise june Frieheit nich een Aunstoos woat fa de Schwake. Gal 5:13 10 Wiels wan die wäa, dee du Erkjantnis hast, em Jetta-Tempel aum Desch setten sitt, woat sien Jewessen nich, wäarent hee schwak es, vestoakjt woaren, de Aufjetta-Opfasch to äten? 11 Un derch diene Erkjantnis woat de schwaka Brooda omkomen, fa dän Christus jestorwen es. Ree 14:15 12 Wan jie oba soo jäajen de Breeda sindjen un äa schwaket Jewessen velazen, dan sindj jie jäajen Christus. 13 Doawäajens, wan daut Äten mienen Brooda stat, dan well ekj niemols mea Fleesch äten, daut ekj mienen Brooda nich steet. Ree 14:21