1 Sträft no de Leew; un iewat fa de jeistliche Gowen, oba väl mea, daut jie muchten profezeien. 2 Wiels wäa en eene Tung rät, rät nich to Menschen, oba to Gott; wiels kjeena vesteit am, oba em Jeist rät hee Jeheemnissen. Apj 2:4; 10:46 3 Wäa oba profezeit, rät to de Menschen fa de Oppbuunk un Ermonunk un toom Troost. 4 Wäa en eene Tung rät, but sikj selfst opp; wäa oba profezeit, but de Jemeent opp. 5 Ekj wudd, daut jie aula en Tungen räden, oba väl mea, daut jie profezeiden; wiels wäa doa profezeit, es jrata, aus wäa met Tungen rät, buta, daut hee daut uk utlajcht, om daut de Jemeent de Oppbuunk kjricht. 1Kor 12:8

6 Nu oba, Breeda, wan ekj no junt kom un en Tungen räd, waut wudd ekj junt nutzen, wan ekj nich to junt räd, entwäda derch Openboarunk ooda derch Erkjantnis ooda derch Profezeiunk ooda derch Lia? 7 Soogoa Dinja onen Läwen, dee een Jelud jäwen, auf Fleet ooda Hoap, wan dee nich eenen Unjascheet en äare Teen jäwen, woo saul eena weeten, waut jepiept ooda jehoapt woat? 8 Wiels uk wan de Trompeet eenen ondietlichen Toon jeft, wäa saul sikj fa dän Kaumf reedmoaken? 9 Jrod soo uk jie, wan jie nich met de Tung vestentliche Wieed jäwen, woo saul eena weeten, waut jerät woat? Wiels jie woaren en dän Wint räden. 10 Doa sent soo väle Sorten von Stemmen en de Welt, un kjeene von dee es onen eene Bediedunk. 11 Wan ekj aulsoo nich de Meeninj von de Stemm weet, dan woa ekj fa dän Rädna een Utlenda sennen, un de Rädna woat fa mie een Utlenda sennen. 12 Jrod soo uk jie, wäarent jie om de jeistliche Gowen iewren, sieekjt, daut jie muchten Äwafluss haben, fa de Jemeent äa Oppbuen.

13 Doawäajen, wäa en eene Tung rät, dee bäd doafäa, daut hee daut mucht utlajen. 1Kor 12:10 14 Wiels wan ekj en eene Tung bäd, bät mien Jeist, oba mien Senn es onfruchtboa. 15 Woo es et dan? Ekj well met däm Jeist bäden, oba ekj well uk met däm Senn bäden. Ekj well em Jeist Psalmen sinjen, oba ekj well uk met däm Senn Psalmen sinjen. Efs 5:19 16 Sest, wan du met däm Jeist lofst, woo saul dee, dee aun de Städ von däm Onjelieeden steit, opp dien Danken daut Amen sajen, wiels hee nich vesteit, waut du sajchst? 17 Wiels du dankst secha goot, oba de aundra woat nich oppjebut. 18 Ekj dank mienem Gott, daut ekj mea met Tungen räd, aus jie aula. 19 Oba en de Jemeent well ekj leewa fief Wieed räden met mienem Senn, soo daut ekj aundre unjarecht, aus tieen-dusent Wieed en eene Tung.

20 Breeda, siet nich Kjinja em Vestentnis, oba aun daut Beese siet Kjinja, oba aum Vestentnis siet Vollkomne. Efs 4:14 21 Em Jesaz steit jeschräwen: "Ekj well met aundre Tungen un aundre Leppen to dit Volkj räden, un dee woaren uk soo nich no Mie horchen, sajcht de Har". Jes 28:11-12 22 Doawäajens sent de Tungen to een Tieekjen, nich fa de Jleewende, oba fa de Onjleewende. De Profezeiunk oba es nich fa de Onjleewende, oba fa de Jleewende. 23 Wan nu de gaunze Jemeent opp eene Städ toopkjemt un aula met Tungen räden, un doa komen Onjelieede ooda Onjleewende nenn, wudden dee nich sajen, daut jie onsennich sent? 24 Oba wan jie aula profezeien, un doa kjemt eena nenn, waut nich jleeft ooda een Onjelieeda, dee es von aulem äwazeicht un von aulem jerecht; 25 un aulsoo woat daut Vestoakne von sien Hoat openboa woaren, un aulsoo wudd hee opp sien Aunjesecht faulen un Gott aunbäden un erkjläaren, daut Gott woarhauftich mank junt es. Joh 16:8

26 Woo es et dan, Breeda? Wan jie toopkomen, een jiedra von junt haft eenen Psalm, haft eene Lia, haft eene Tung, haft eene Openboarunk, haft eene Utlajunk; lot aules fa de Oppbuunk jedonen woaren. 1Kor 12:8-10; Efs 4:12 27 Wan irjentwäa met eene Tung rät, lot et twee ooda aum mieeschten dree sennen, un no de Rieej, un eena lajcht daut ut. 28 Oba wan doa kjeen Utlaja es, dan saul hee en de Jemeent stell sennen, oba lot am to sikj selfst un to Gott räden. 29 Un de Profeeten lot twee ooda dree räden, un de aundre lot daut be-uadeelen. Apj 17:11; 1Tess 5:21 30 Wan oba eenem aundren, dee doa bie-sett, waut openboat woat, dan saul de ieeschta stell sennen. 31 Wiels jie kjennen aula, eena nom aundren, profezeien, soo daut see aula lieren un aula jetreest woaren. 32 Un de Jeista von de Profeeten sent de Profeeten unjadon. 33 Wiels Gott es nich een Gott von Onordnunk, oba von Fräd, soo aus en aul de Jemeenten von de Heilje. 1Kor 14:40

34 June Frues lot stell sennen en de Jemeenten, wiels daut es äant nich erlaupt to räden, oba unjadon to sennen, soo aus uk daut Jesaz sajcht. 1Mo 3:16; 1Tim 2:11-12 35 Wan see oba waut lieren wellen, dan sellen see Tus äare Mana froagen; wiels daut es eene Schaund fa Frues, en de Jemeent to räden. 36 Ooda es Gott sien Wuat von junt jekomen? Ooda es daut auleen no junt jekomen? 37 Wan irjentwäa denkjt, een Profeet to sennen ooda jeistlich, dän lot erkjanen, waut ekj junt schriew; wiels daut sent Jebooten von däm Harn. 1Joh 4:6 38 Es oba irjentwäa onweetent, dän lot onweetent sennen. 39 Doawäajens, Breeda, iewat, to profezeien, un vebeet nich, en Tungen to räden. 40 Lot aules ierlich un en Ordnunk toogonen. 1Kor 14:33; Kol 2:5