1 Oba äwa de jeistliche Gowen, well ekj junt, Breeda, nich onweetent loten. 2 Jie weeten, aus jie Heiden wieren, word jie no de stomme Aufjetta jefieet, doano aus jie jeleit worden. Hab 2:18-19 3 Doawäajen lot ekj junt weeten, daut kjeena, dee derch Gott sien Jeist rät, sajcht: Veflucht es Jesus! un kjeena kaun sajen: Jesus es de Har, aus bloos derch dän Heiljen Jeist. Mrk 9:39; 1Joh 4:3

4 Doa sent Veschiedenheiten von Gowen, oba deeselwja Jeist; Efs 4:4-6,11; Ree 12:6 5 un doa sent Veschiedenheiten von Deensten, oba deeselwja Har; 1Kor 12:28 6 un doa sent Veschiedenheiten von Wirkjungen, oba daut es deeselwja Gott, dee aules en aulem wirkjt. 7 Oba to eenem jiedren es de Openboarunk vom Jeist fa aulen toom Nutzen jejäft. 1Kor 14:26 8 Wiels eenem woat derch dän Jeist daut Wuat von Weisheit jejäft; däm aundren, daut Wuat von Erkjantnis derch dänselwjen Jeist; 9 eenem aundren de Gloowen derch dänselwjen Jeist; eenem aundren de Gowen fa Heelungen derch dänselwjen Jeist; 10 eenem aundren Wunda-Wirkjungen; eenem aundren Profezeiunk; eenem aundren, Unjascheedungen von Jeista; eenem aundren oba Sorten von Sproaken; eenem aundren de Utlajunk von Sproaken. Apj 2:4; 1Kor 14:1-40 11 Aul dit oba wirkjt dee eena un deeselwja Jeist, dee eenem jiedren besondasch toodeelt, soo aus Hee well. Ree 12:3; Efs 4:7

12 Wiels jrod soo aus de Kjarpa eent es un haft väle Jlieda, un aule Jlieda von däm eenen Kjarpa, wan see uk väle sent, sent een Kjarpa: Jrod soo es uk Christus. 13 Wiels wie sent derch eenen Jeist aula en eenen Kjarpa nenjedeept, auf Juden ooda Griechen, auf Sklowen ooda Friee, un aula sent to eenem Jeist jedrenjt. Gal 3:28 14 Wiels de Kjarpa es nich een Jliet, oba väle. 15 Wan de Foot wudd sajen: Wiels ekj nich de Haunt sie, sie ekj nich von däm Kjarpa; es dee doawäajen nich von däm Kjarpa? 16 Un wan daut Ua wudd sajen: Wiels ekj nich een Uag sie, sie ekj nich von däm Kjarpa; es daut doawäajen nich von däm Kjarpa? 17 Wan de gaunza Kjarpa Uag wia, wua bleef daut Jehia? Wan de Gaunza Jehia wia, wua bleef daut Rikjen? 18 Nu oba haft Gott jieda eenselnet Jliet jesat en däm Kjarpa, soo aus Am daut jefollen haft. 19 Un wan dee aula een Jliet wieren, wua bleef de Kjarpa? 20 Nu oba sent doa väl Jlieda, oba een Kjarpa. 21 Un daut Uag kaun nich to de Haunt sajen: Ekj bruck die nich; ooda wada de Kopp to de Feet: Ekj bruck junt nich. 22 Oba väl mea, de Jlieda von däm Kjarpa, dee ons aum schwaksten schienen, sent needich; 23 un dee ons schienen onierlicha to sennen aum Kjarpa, dise omjäw wie met jratre Iea, un de Onaunstendje haben eene rikjre Scheenheit; 24 wiels onse Aunstendje fält daut nich; oba Gott haft dän Kjarpa toopjestalt, endäm Hee daut Mangelhaufte mea Iea jejäft haft, 25 soo daut doa kjeene Spoolunk em Kjarpa wia, oba daut de Jlieda eent fa daut aundre äwareen sorjen. 26 Un wan een Jliet litt, dan lieden aule Jlieda met; un wan een Jliet jeieet woat, dan freien sikj aule Jlieda met. 27 Jie oba sent Christus sien Kjarpa un Jlieda, een jiedra oppoat. Ree 12:5

28 Un Gott haft atelje jesat en de Jemeent: Ieeschtens Apostel, tweedens Profeeten, dreddens Lierasch, dan Wunda-Wirkja, dan Gowen toom Heelen, Helpa, Rejiera, Sorten von Sproaken*. Efs 4:11-12 29 Sent see aula Apostel? Sent see aula Profeeten? Sent see aula Lierasch? Sent see aula Wunda-Wirkja? 30 Haben see aula Gowen toom Heelen? Räden see aula met Tungen? Doonen see aula utlajen? 31 Sträft oba no de baste Gowen; un ekj wies junt noch eenen väl bätren Wajch. 1Kor 14:1,12