1 Lot een Mensch ons doafäa hoolen, aus Christus siene Deena un Vewaulta von Gott siene Jeheemnissen. Tit 1:7 2 Un äwajens woat von de Vewaulta velangt, daut eena tru befungen woat. Luk 12:42 3 Fa mie oba es daut weinich, daut ekj von junt jerecht woa ooda von een menscheljet Jerecht; oba ekj recht uk nich mie selfst. 4 Wiels ekj weet von nuscht äwa mie selfst, doch doarenn sie ekj nich jerajchtfoadicht; oba de Har es daut, dee mie recht. 5 Doawäajen recht nuscht ver de Tiet, bat de Har kjemt, woona uk daut Vestoakne von de Diestanis aum Licht brinjen woat un de Rotschläaj von de Hoaten openboaren; dan woat eenem jiedren von Gott Low tookomen. 1Kor 3:8

6 Oba dit, Breeda, hab ekj opp mie un Apollos jediet, om junt-haulwen, om daut jie aun ons lieren, nich hecha to denkjen, aus waut jeschräwen steit, om daut jie junt nich oppblosen eena jäajen dän aundren. Ree 12:3 7 Wiels wäa trakjt die väa? Un waut hast du, daut du nich jekjräajen hast? Wan du daut oba jekjräajen hast, waut riemst du die, aus wan du daut nich jekjräajen hautst? 8 Jie sent aul saut jeworden, jie sent aul rikj jeworden, jie haben onen ons jeharscht; un wull Gott, daut jie harschten, om daut wie uk muchten met junt harschen. Opb 3:17,21 9 Wiels ekj denkj, daut Gott ons, de Apostel, aus de Latste hanjestalt haft, soo aus toom Doot bestemt; wiels wie sent eene Utstalunk jeworden fa de Welt un fa de Enjel un fa de Menschen. Ree 8:36; Heb 10:33 10 Wie sent Noaren om Christus sient-haulwen, oba jie sent weis en Christus; wie sent Schwake, jie oba Stoakje; jie Harliche, wie oba Ve-achte. 1Kor 3:18 11 Bat opp dise Stund hungat un darscht ons un sent noaktich un woaren jeschloagen un haben kjeene sechre Woninj; 2Kor 11:23-27 12 un wie oabeiden un wirkjen met onse ieejne Henj. Woat ons beschempt*, dan säajnen wie; woat ons vefolcht, dan hool wie ut; Mat 5:44; Apj 18:3; Ree 12:14; 1Kor 9:15 13 woat ons jelastat, dan ermon wie; wie sent daut Aufgank fa de Welt jeworden, daut Mell von aules, bat vondoag.

14 Ekj schriew dit nich, om junt to beschämen, oba ekj vemon junt aus miene leewe Kjinja. 15 Un wan jie uk tieen-dusent Belierungs-Meista hauden en Christus, hab jie oba nich väl Vodasch; wiels ekj hab junt en Christus Jesus derch daut Evangelium jebuaren. 1Kor 9:2; Gal 4:19 16 Doawäajen ermon ekj junt: Siet miene Nofolja! 1Kor 11:1 17 Doawäajens hab ekj Timotäus no junt jeschekjt, dee mien trua un leewa Sän es en däm Harn, dee junt erinren woat aun miene Wäaj, dee en Christus sent, soo aus ekj aulawäajen un en jieda Jemeent lia. Apj 16:1-3 18 Atelje oba sent oppjeblost, soo aus wan ekj nich no junt komen wudd. 19 Oba ekj woa boolt no junt komen, wan de Har well, un erkjanen, nich de Wieed von de Oppjeblosde, oba de Krauft. 20 Wiels Gott sien Rikj besteit nich en Wieed, oba en Krauft. 1Kor 2:4 21 Waut well jie? Sull ekj met däm Stock no junt komen, ooda en Leew un en däm Jeist von Saunftmoot? 2Kor 10:2