1 Siet miene Nofolja, soo aus ekj uk Christus siena sie.

2 Un nu, ekj low junt, Breeda, daut jie en aules mie enjedenkj sent un de Ordnungen hoolen, jrod soo aus ekj junt dee äwajäft hab. 3 Ekj well oba, daut jie weeten, daut Christus es daut Haupt von jieda Maun, de Maun oba es daut Haupt von de Fru, Gott oba es Christus sien Haupt. 1Mo 3:16; 1Kor 3:23; Efs 5:23 4 Jieda Maun, dee doa bät ooda profezeit, wäarent hee waut oppem Haupt haft, ve-onieet sien Haupt. 5 Jieda Fru oba, dee doa bät ooda profezeit met een onbedakjtet Haupt, ve-onieet äa Haupt; wiels daut es jrod soo, aus wan see jeschoaren wia. 6 Wiels wan eene Fru nich bedakjt es, dan lot ar jeschoaren woaren. Oba wan et eene Schaund es fa eene Fru, veschnäden ooda jeschoaren to sennen, dan lot ar bedakjt woaren. 7 De Maun saul en Werkjlichkjeit nich daut Haupt bedakjen, wiels hee es Gott sien Bilt un Harlichkjeit; oba de Fru es däm Maun siene Harlichkjeit. 1Mo 1:27 8 Wiels de Maun es nich von de Fru, oba de Fru von däm Maun. 1Mo 2:21-23 9 De Maun wort uk nich wäajens de Fru jeschaufen, oba de Fru wäajens* dän Maun. 10 Doawäajen sull de Fru eene Macht opp daut Haupt haben, wäajens de Enjel. 11 Dannoch es nich de Fru onen dän Maun, uk nich de Maun onen de Fru en däm Harn. 12 Wiels jrod soo aus de Fru vom Maun es, soo kjemt uk de Maun derch de Fru; oba aules von Gott. 13 Be-uadeelt en junt selfst, auf et aunstendich es, daut eene Fru onbedakjt ver Gott bät? 14 Ooda lieet junt nich uk de Natua, daut, wan een Maun lange Hoa haft, daut es eene Oniea fa am? 15 Wan oba eene Fru lange Hoa haft, es ar daut eene Iea; wiels de Hoa sent ar jejäft fa eene Dakj. 16 Wan oba irjentwäa denkjt, striedarisch to sennen, wie haben nich soone Jewanheit, uk nich Gott siene Jemeenten.

17 Oba wäarent ekj dit orden, low ekj daut nich, daut jie nich toom Bätren, oba toom Schlajchtren, toopkomen. 18 Wiels ieeschtens, wan jie toopkomen en de Jemeent, hia ekj, daut doa Spoolungen mank junt sent; un toom Deel jleew ekj daut. 1Kor 1:12; 3:3 19 Wiels doa motten uk Sekten mank junt sennen, soo daut de Aunjenomne mank junt openboa woaren. Mat 18:7; 1Joh 2:19 20 Wan jie nu opp eene Städ toopkomen, es daut nich, om däm Harn sien Owentmol to äten. 21 Wiels een jiedra nemt biem Äten daut ieeschte sien ieejnet Owentkost, un eena es hungrich, un de aundra es bedrunken. Jud 1:12 22 Waut? Hab jie nich Hiesa, om doabennen to äten un to drinkjen? Ooda ve-acht jie Gott siene Jemeent un beschämen dee, dee nuscht haben? Waut sull ekj to junt sajen? Sull ekj junt lowen? En dit low ekj junt nich. Jak 2:5-6 23 Wiels ekj hab daut vom Harn jekjräajen, waut ekj uk junt äwajäft hab, daut de Har Jesus, en de Nacht, en dee Hee verot wort, neem Hee daut Broot, Mat 26:26-28; Mrk 14:22-24; Luk 22:19-20 24 un aus Hee jedankt haud, bruak Hee daut un säd: Nämt un ät; daut es mien Kjarpa, dee fa junt jebroaken es; dit doot to mien Aundenkjen. 25 Opp deeselwje Wies neem Hee uk daut Kuffel nom Owentmol un säd: Dit Kuffel es daut Niee Testament en mien Bloot; doot dit, soo foaken aus jie daut drinkjen, to mien Aundenkjen. 26 Wiels soo foaken aus jie dit Broot äten un dit Kuffel drinkjen, vekjindj jie däm Harn sien Doot, bat Hee kjemt. Mat 26:29

27 Wäaemma nu onwirdichlich dit Broot at ooda dit Kuffel drinkjt, dee es schuldich aun däm Harn sien Kjarpa un sien Bloot. 1Kor 11:22 28 De Mensch oba sull sikj selfst priefen un soo von daut Broot äten un von daut Kuffel drinkjen. Mat 26:22 29 Wiels wäa onwirdichlich at un drinkjt, dee at un drinkjt sikj selfst toom Jerecht, wiels hee däm Harn sien Kjarpa nich unjascheet. 1Kor 10:16-17 30 Doawäajens sent väle Schwake un Kranke mank junt, un een Schoof schlopen. 31 Wiels wan wie ons selfst rechten, dan wudd wie nich jerecht woaren. 32 Wan wie oba jerecht woaren, dan woa wie vom Harn jestroft, soo daut wie nich met de Welt vedaumt woaren. Spr 3:11-12 33 Doawäajens, miene Breeda, wan jie toopkomen, om to äten, wacht eena no däm aundren. 34 Wan oba wäm hungat, lot am tus äten, soo daut jie nich toom Jerecht toopkomen. Daut äwaje well ekj ordnen, wan ekj kom.