1 Un Hee stunt opp von doa un kjeem en de Jäajenden von Judäa, aun de aundre Sied vom Jordan. Un wada kjeemen Volkjs-Häaden no Am, un soo aus Hee jewant wia, lieed Hee äant wada. 2 Un de Farisäa kjeemen no Am un fruagen Am: Es eenem Maun daut erlaupt, siene Fru loos to loten*? Doamet vesochten see Am. 3 Hee oba auntwuad un säd to äant: Waut haft Moses junt jeboden? 4 See säden: Moses haft erlaupt, eenen Scheedungs-Breef to schriewen un ar gonen loten. 5Mo 24:1; Mat 5:31-32 5 Jesus oba auntwuad un säd to äant: Wäajens jun Hoathoatjet haft hee junt dit Jeboot jeschräwen; 6 oba vom Aunfank von de Schepfunk muak Gott äant Maun un Fru. 1Mo 1:27 7 "Doawäajen woat een Mensch sienen Voda un Mutta veloten un siene Fru aunhenjen, 1Mo 2:24 8 un dee twee woaren een Fleesch sennen"; soo sent see nich mea twee, oba een Fleesch. 9 Waut nu Gott toopjemoakt haft, saul de Mensch nich scheeden.

10 Un em Hus fruagen Am siene Jinja wada doaräwa. 11 Un Hee säd to äant: Wäaemma sikj von siene Fru scheeden woat un eene aundre friet, brakjt de Ehe aun ar; Luk 16:18; 1Kor 7:10-11 12 un wan eene Fru sikj von äarem Maun scheeden woat un eenen aundren friet, brakjt see de Ehe.

13 Un see brochten kjliene Kjinja no Am, daut Hee dee aunschieren sull; oba de Jinja schullen deejanje, dee äant brochten. 14 Oba aus Jesus daut sach, wort Hee sea ontofräd un säd to äant: Lot de kjliene Kjinja no Mie komen un wäat äant nich, wiels ut soone besteit Gott sien Rikj. 15 Ekj saj junt woarhauftich: Wäa Gott sien Rikj nich soo oppnemt aus een kjlienet Kjint, woat doa nich nenkomen. Mat 18:3 16 Un Hee neem de Kjinja opp en siene Oarms, läd äant de Henj opp un säajend äant.

17 Un aus Hee rutjegonen wia opp dän Wajch, rand eena un kjneed sikj ver Am han un fruach Am: Gooda Liera, waut saul ekj doonen, om daut eewje Läwen to oawen? 18 Jesus oba säd to am: Wuarom nanst du Mie goot? Kjeena es goot, buta eena, Gott. 19 Du weetst de Jebooten: "Du saust nich ehebräakjen; du saust nich dootmoaken; du saust nich stälen; du saust nich faulschet Zeichnis räden; du saust kjeenen aunschmäaren; iea dienen Voda un Mutta." 2Mo 20:12-17; 3Mo 19:13 20 Hee oba auntwuad un säd to Am: Meista, aul dise hab ekj jehoolen von miene Jugent aun. 21 Un Jesus kjikjt am aun, leewd am un säd to am: Eent fält die noch; go han un vekjeep, wautemma du hast, un jäw de Oame daut, dan woascht du een Schauz em Himmel haben, un komm, folj Mie no un nemm daut Kjriez opp die. Mat 10:38; Mrk 8:34 22 Hee oba wort betriept äwa dise Räd un jinkj truarich wajch; wiels hee haud väle Jieta. 23 Un Jesus kjikjt sikj rom un säd to siene Jinja: Woo schwoa woaren dee, waut Rikjtum haben, en Gott sien Rikj nenkomen! Ps 62:11; 1Tim 6:17 24 De Jinja oba vewundaden sikj äwa siene Wieed. Oba Jesus auntwuad wada un säd to äant: Kjinja, woo schwoa es daut fa dee, dee äa Vetruen opp dän Rikjtum saten, en Gott sien Rikj nenn to gonen! 25 Daut es leichta, daut een Kameel derch een Noteluag jeit, aus daut een Rikja en Gott sien Rikj nenkjemt. 26 Un see vewundaden sikj noch väl mea un säden unjarenaunda: Wäa kaun dan jerat woaren? 27 Oba Jesus kjikjt äant aun un säd: Bie Menschen es daut onmäajlich, oba nich bie Gott; wiels bie Gott sent aule Dinja mäajlich.

28 Petrus funk aun un säd to Am: Kjikj, wie haben aules veloten un sent Die nojefolcht. 29 Jesus auntwuad un säd: Ekj saj junt woarhauftich: Doa es nich eena, dee doa veloten haft Hus ooda Breeda ooda Sestren ooda Voda ooda Mutta ooda Fru ooda Kjinja ooda Akasch, om mient-haulwen un om daut Evangelium, 30 dee nich hundat mol soo väl kjricht, hia en dise Tiet, Hiesa un Breeda un Sestren un Mitta un Kjinja un Akasch, met Vefoljungen, un en de tookjinftje Welt daut eewje Läwen. 31 Oba väle von de Ieeschte woaren de Latste sennen, un de Latste woaren de Ieeschte sennen.

32 See wieren oba oppem Wajch nopp no Jerusalem, un Jesus jinkj veropp; un see wieren erstaunt, un wäarent see nofoljden, ferchten see sikj. Un Hee neem de Twalw wada tosied un funk aun, äant to sajen, waut Am passieren wudd: Mrk 9:31 33 Kjikj, wie gonen nopp no Jerusalem, un de Menschensän woat de Huagepriesta un Schreftjelieede äwajäft woaren; dee woaren Am toom Doot ve-uadeelen un de Heiden äwajäwen. 34 Un dee woaren Am vespotten un Am veheiwen un Am aunspieen un Am dootmoaken, un aum dredden Dach woat Hee oppstonen.

35 Un Jakobus un Johanes, Zebedäus siene Säns, jinjen no Am un säden: Meista, wie wellen, daut Du daut fa ons deist, wuano wie Die froagen woaren. 36 Hee oba säd to äant: Waut well jie, daut Ekj fa junt doonen saul? 37 See säden to Am: Jeff ons, daut wie, eena aun diene rajchte un eena aun diene linkje Sied setten kjennen, en diene Harlichkjeit. 38 Jesus oba säd to äant: Jie weeten nich, no waut jie froagen. Kjenn jie dän Drinkj drinkjen, dän Ekj drinkj, un met de Doop jedeept woaren, wuamet Ekj jedeept woa? Mrk 14:36; Luk 12:50 39 Un see säden to Am: Daut kjenn wie. Jesus oba säd to äant: Jie woaren woll dän Drinkj drinkjen, dän Ekj drinkj, un jedeept woaren met de Doop, wuamet Ekj jedeept woa; Apj 12:2; Opb 1:9 40 oba daut Setten aun miene rajchte un aun miene linkje Sied, steit Mie nich too, to jäwen; oba daut woat däm toodeel, fa dän daut reedjemoakt es. 41 Un aus de Tieen daut hieeden, fungen see aun, äwa Jakobus un Johanes ontofräd to woaren. 42 Oba Jesus roopt äant no sikj un säd to äant: Jie weeten, daut dee, waut jeräakjent woaren, mank de Heiden to rejieren, harschen äwa äant, un dee äare Groote eewen Jewault äwa äant. Luk 22:25-27 43 Oba soo saul daut nich mank junt sennen; leewa, wäa mank junt well groot sennen, dee saul jun Deena sennen; 44 un wäa mank junt well de Väaschta sennen, dee saul fa aulem Kjnajcht sennen. Mrk 9:35; 1Pe 5:3 45 Wiels soogoa de Menschensän kjeem nich, bedeent to woaren, oba to deenen, un sien Läwen aus Leesunk fa väle to jäwen.

46 Un see kjeemen no Jericho. Un aus Hee ut Jericho rutjinkj met siene Jinja un eene groote Volkjshäad, saut de blinja Bartimäus, däm Timäus sien Sän, aum Wajch un prachad. 47 Un aus hee hieed, daut et Jesus von Nazaret wia, funk hee aun to schrieen un to sajen: Jesus, Du David sien Sän, erboarm Die äwa mie! 48 Un väle beschwichten am, daut hee sull stell sennen. Hee oba schrieech noch väl mea: Du David sien Sän, erboarm Die äwa mie! 49 Un Jesus stunt stell un leet am roopen. Un see roopten dän Blinjen un säden to am: Sie jetroost, sto opp, Hee roopt die! 50 Un hee schmeet sien Kjleet von sikj, stunt opp un kjeem no Jesus. 51 Un Jesus auntwuad un säd to am: Waut west du, daut Ekj die doonen saul? De Blinja säd to Am: Rabbuni*, daut ekj seenent woa. 52 Un Jesus säd to am: Go han! Dien Gloowen haft die jeheelt. Un fuaz wort hee seenent un foljd Jesus no oppem Wajch.