1 Un Hee funk wada aun to lieren aum Mäa. Un doa vesaumeld sikj eene groote Volkjshäad bie Am, soo daut Hee en daut Schepp stieech un oppem Mäa saut, un de gaunze Volkjshäad wia aum Mäa oppem Launt. 2 Un Hee lieed äant väl en Jlikjnissen; un Hee säd to äant en siene Lia: 3 Horcht häa! Kjikj, doa jinkj de Seimaun rut, to seien. 4 Un daut passieed, wäarent hee seid, foll ateljet aun dän Wajch, un de Väajel vom Himmel kjeemen un freeten daut opp. 5 Aundret foll opp Steenajet, wua daut nich väl Ieed haud; un daut jinkj fuaz opp, wiels daut nich deepe Ieed haud. 6 Un aus de Sonn oppjinkj, wort daut vebrent; un wiels daut nich Wartlen haud, vedrieejd daut. 7 Un aundret foll manke Dornen, un de Dornen wossen opp un stekjten daut, un daut brocht kjeene Frucht. 8 Oba aundret foll en goode Ieed un brocht Frucht, dee doa oppwoss un tooneem, un ateljet brocht dartich, ateljet zastich un ateljet hundat mol soo väl. 9 Un Hee säd to äant: Wäa Uaren haft toom Hieren, däm lot hieren!

10 Un aus Hee auleen wia, dee waut rom Am wieren, met de Twalw, fruagen Am äwa dit Jlikjnis. 11 Hee säd to äant: Junt es daut jejäft worden, daut Jeheemnis von Gott sien Rikj to vestonen; oba to dee, dee buten sent, woat aules en Jlikjnissen väajelajcht, 12 soo daut see seenent seenen, un nich venämen; un hierent hieren, un nich vestonen; daut see nich met eenmol omkjieren un äant de Sinden vejäft woaren. Jes 6:9-10

13 Un Hee säd to äant: Vesto jie dit Jlikjnis nich? Un woo woa jie aul de Jlikjnissen dan vestonen? 14 De Seimaun seit daut Wuat. 15 Un dit sent dee aun däm Wajch, wua daut Wuat jeseit woat, un wan see daut jehieet haben, kjemt de Soton fuaz un nemt daut Wuat wajch, waut en äare Hoaten jeseit wia. 16 Un jrod soo uk dise, waut opp daut Steenaje jeseit wort: Daut sent dee, wan see daut Wuat hieren, fuaz met Freid oppnämen. 17 Un see haben kjeene Wartel en sikj; daut helt mau fa ne korte Tiet, wiels wan Triebsaul un Vefoljunk oppkomen wäajens daut Wuat, sent see fuaz jestat. 18 Un dit sent dee, waut mank de Dornen jeseit woaren: Dit sent dee, waut daut Wuat hieren, 19 un de Sorjen von dise Tiet un de Aunschmäararie vom Rikjtum un de Bejia no aundre Dinja komen nenn un stekjen daut Wuat, un daut woat onfruchtboa. 20 Un dit sent dee, waut opp goode Ieed jeseit sent: Dee daut Wuat hieren un oppnämen un brinjen Frucht, atelje dartich, atelje zastich un atelje hundat mol soo väl.

21 Un Hee säd to äant: Woat de Laump jebrocht, om dee unja een Jefäss ooda unja een Bad to stalen? Es dee nich, om opp eenen Laumpenhoola to stalen? Mat 5:15; Luk 11:33 22 Wiels doa es nuscht vestoaken, daut nich openboa woat uk kjeen Jeheemnis, daut nich verendach kjemt. Mat 10:26-27; Luk 12:2 23 Wan wäa Uaren haft toom Hieren, däm lot hieren! 24 Un Hee säd to äant: Siet väasechtich, waut jie hieren; met de Mot, wuamet jie mäten, woat junt jemäten woaren, un junt, dee jie hieren, woat noch biejelajcht woaren. Mat 7:2 25 Wiels wäa doa haft, däm woat jejäft woaren; un wäa nich haft, von däm woat uk noch daut jenomen woaren, waut hee haft. Mat 13:12-13

26 Un Hee säd: Met Gott sien Rikj es daut jrod soo, aus wan een Mensch Sot opp de Ieed schmitt 27 un schlapt un oppsteit Nacht un Dach; un daut Sot jeit opp un waust, un hee weet nich woo. Jak 5:7 28 Wiels de Ieed brinjt ut sikj selfst Frucht, ieescht de Stud, dan de Wopp, un dan dän vollen Kuarn en de Wopp. 29 Wan oba de Frucht sikj doastalt, schekjt hee fuaz daut Säakjel, wiels de Arnt es jekomen. Joel 3:13

30 Un Hee säd: Met waut sell wie Gott sien Rikj vejlikjen, ooda en waut fa een Jlikjnis sell wie ons daut väastalen? 31 Daut es soo aus een Sampkuarn, daut, wan daut oppe Ieed jeseit woat, es daut kjlanste von aul daut Sot oppe Ieed; 32 un wan daut jeseit es, jeit daut opp un woat jrata aus aule Kjreita un kjricht groote Asta, soo daut de Väajel unja däm Himmel unja sienem Schauten nasten. 33 Un met väl soone Jlikjnissen räd Hee to äant daut Wuat, doano aus see fäich wieren daut to hieren. 34 Oba onen Jlikjnis räd Hee nich to äant; oppoat to siene Jinja oba erkjläad Hee aules.

35 Un aun däm Dach, aus daut Owent jeworden wia, säd Hee to äant: Lot ons äwafoaren no de aundre Sied. 36 Un aus see de Volkjshäad entloten hauden, neemen see Am, soo aus Hee wia, en daut Schepp; un doa wieren uk aundre kjliene Schäp bie Am. 37 Doa kjeem een stoakja Wintstorm opp, un de Walen schluagen en daut Schepp nenn, soo daut et aul feld. 38 Un Hee wia em Hinjadeel un schleep opp een Kjessen; un see wuaken Am opp un säden to Am: Meista, sorcht Die daut nich, daut wie omkomen? 39 Un Hee wuak opp, bedreiwd dän Wint un säd to daut Mäa: Sie stell un vestomm! Dan läd de Wint sikj, un daut wort sea stell. 40 Un Hee säd to äant: Wuarom sent jie soo forchtsom? Woo hab jie kjeenen Gloowen? 41 Un see ferchten sikj met groote Forcht un säden unjarenaunda. Wäa dan es disa, daut Am soogoa de Wint un daut Mäa jehorchen?