1 Waut sell wie dan nu sajen? Sell wie en de Sind bliewen, om daut de Jnod toonemt? Ree 3:5-8 2 Sea lang nich! Woo sell wie, dee wie to de Sind jestorwen sent, noch en ar läwen? 3 Weet jie nich, daut aula, dee wie en Jesus Christus jedeept sent, sent en sienen Doot jedeept? Gal 3:27 4 Soo sent wie nu met Am begroft worden derch daut Deepen en dän Doot, om daut wie, jrod soo aus Christus derch de Harlichkjeit vom Voda von de Doodje opperwakjt worden es, uk en een nieet Läwen waundlen sullen. Kol 2:12; 1Pe 3:21 5 Wiels wan wie met Am toop-jeplaunt* sent en de Änlichkjeit von sien Doot, soo woa wie uk daut en sien Opparstonen sennen. 6 Wie weeten dit, daut ons oola Mensch met Am jekjriezicht es, om daut de Kjarpa von de Sind to Enj jeit, daut wie de Sind nich mea deenen. Gal 5:24 7 Wiels wäa jestorwen es, dee es jerajchtfoadicht* von de Sind. 8 Wan wie nu met Christus jestorwen sent, dan jleew wie, daut wie uk met Am läwen woaren 9 un weeten, daut Christus, vom Doot opperwakjt, stoaft nich mea; de Doot harscht nich mea äwa Am. 10 Wiels daut Hee jestorwen es, es Hee eenmol to de Sind jestorwen; waut Hee oba läft, daut läft Hee fa Gott. Heb 9:26-28 11 Jrod soo uk jie, hoolt junt selfst doafäa, daut jie to de Sind jestorwen sent, oba fa Gott läwen en Christus Jesus, onsem Harn. 2Kor 5:15; 1Pe 2:24 12 Doawäajen lot nich de Sind harschen en junem stoaflichen Kjarpa, daut jie ar en äare Losten jehorchen. 1Mo 4:7 13 Jäft uk nich june Jlieda han fa de Sind aus Instrumenten von de Ojjerajchtichkjeit, oba jäft junt selfst Gott han, aus Läwendje von mank de Doodje, un jäft june Jlieda no Gott, aus Instrumenten von de Jerajchtichkjeit. Ree 12:1 14 Wiels de Sind woat nich äwa junt harschen, wiels jie nich unja daut Jesaz, oba unja de Jnod sent. Ree 5:17,21; 7:4-6; 1Joh 3:6

15 Waut dan? Sell wie sindjen, wiels wie nich unja daut Jesaz, oba unja de Jnod sent? Sea lang nich! 16 Weet jie nich, daut, wäm jie junt hanjäwen aus Kjnajchts däm to jehorchen, däm siene Kjnajchts sent jie, däm jie jehorchen, entwäda de Sind toom Doot, ooda däm Jehuarsom to de Jerajchtichkjeit? Joh 8:34 17 Oba Gott traft Dank, daut jie Kjnajchts von de Sind wieren, oba vom Hoaten jehuarsom jeworden sent no daut Väabilt von de Lia, dee junt äwajäft es. 18 Un nu, daut jie frie jeworden sent von de Sind, sent jie Kjnajchts fa de Jerajchtichkjeit jeworden. Joh 8:32 19 Ekj räd menschlich, wäajens de Schwakheit von jun Fleesch. Wiels jrod soo aus jie june Jlieda hanjestalt hauden aus Kjnajchts to de Onreinichkjeit un von Ojjerajchtichkjeit to Ojjerajchtichkjeit, soo stalt june Jlieda nu han aus Kjnajchts to de Jerajchtichkjeit fa de Heiljunk. 20 Wiels aus jie de Sind äare Kjnajchts wieren, dan wia jie frie von de Jerajchtichkjeit. 21 Waut fa Frucht haud jie dan, wuamet jie junt nu schämen? Wiels daut Enj doavon es de Doot. Ree 8:6,13 22 Oba nu, daut jie von de Sind frie un Gott siene Kjnajchts jeworden sent, hab jie june Frucht to de Heiljunk un aum Enj daut eewje Läwen. 23 Wiels de Sind äa Loon es de Doot; oba de Jnodengow von Gott es daut eewje Läwen en Christus Jesus, ons Har. 1Mo 2:17; Ree 5:12; Jak 1:15