1 Ekj ermon junt nu, Breeda, derch Gott siene Erboarmungen, daut jie june Kjarpasch jäwen aus een läwendjet Opfa, heilich un Gott aunjenäm, aus jun veninftja Gottesdeenst. Ree 6:13 2 Un stalt junt nich met dise Welt jlikj, oba woat vewaundelt derch de Ernierunk von jun Senn, daut jie priefen* kjennen, woont Gott sien gooda, aunjenäma un vollkomna Wellen es. Efs 4:23; 5:10,17

3 Wiels ekj saj derch de Jnod, dee mie jejäft es, to eenem jiedren mank junt, nich hecha von sikj to denkjen, aus et jehieet to denkjen, oba soo to denkjen, aus et veninftich es, no de Mot vom Gloowen, dee Gott eenem jiedren toojedeelt haft. Mat 20:26; 1Kor 4:6; 12:11; Efs 4:7 4 Wiels jrod soo aus wie en eenem Kjarpa väl Jlieda haben, oba nich aule Jlieda haben dautselwje Woakj, 1Kor 12:12 5 soo sent wie väle een Kjarpa en Christus un jieda eena Jlieda vonenaunda. 1Kor 12:27; Efs 4:4,25 6 Oba wie haben veschiedne Gowen no de Jnod no, dee ons jejäft es; wan daut Profezeiunk es, dan lot ons profezeien no de Mot von däm Gloowen; 1Kor 4:7; 12:4; 1Pe 4:10 7 es daut een Deenst, dan lot ons en onsem Deenst deenen, ooda wäa lieet, en de Lia; 1Pe 4:11 8 ooda wäa ermont, en de Ermonunk; wäa doa jeft, lot am daut met de Eenfachheit doonen; wäa väasteit, en Flietichkjeit*; wäa Boarmherzichkjeit eeft, met Freidichkjeit. Mat 6:3; 2Kor 8:2; 9:7

9 Lot Leew onen Heichlarie sennen. Haust daut Beese, hoolt daut Goode faust. Amos 5:15; 1Tim 1:5 10 Leeft junt unjarenaunda met de Broodaleew. En de Iea trakjt dän näakjsten väa. Joh 13:4-15; Flp 2:3 11 Siet nich ful em Doonen; siet brennent em Jeist; deent däm Harn. Opb 3:15; Apj 18:25; Kol 3:23 12 Freit junt en de Hopninj; siet jeduldich en Triebsaul; hoolt aun em Jebäd. Luk 18:1-8; Kol 4:2; 1Tess 5:17 13 Nämt Deel aun de Heilje äa Bederfnis; sträft, gaustfrie to sennen. 3Joh 1:5-8; Heb 13:2 14 Säajent, dee junt vefoljen; säajent, un flucht nich. Mat 5:44; Apj 7:59; 1Kor 4:12 15 Freit junt met de Freiende, un hielt met de Hielende. Ps 35:13-14; 2Kor 11:29 16 Siet äwareen jesonnen unjarenaunda. Siet nich ut no huage Dinja, oba hoolt junt rauf to de Läaje; hoolt junt nich selfst fa kluak. Jes 5:21; Ree 15:5; Flp 2:2 17 Tolt kjeenem Beeset fa Beeset trigj! Vesorcht Goodet ver aule Maun. Spr 20:22; 2Kor 8:21; 1Tess 5:15 18 Wan et mäajlich es, soo väl aus aun junt licht, läft met aule Menschen en Fräd. 19 Rajchent junt selfst nich, miene Jeleewde, oba jäft däm Oaja Rum; wiels doa steit jeschräwen: "De Rach es miene, Ekj woa trigjtolen, sajcht de Har." 5Mo 32:35; 3Mo 19:18; Mat 5:38-44 20 Wan nu dienen Fient hungat, feed am; darscht am, dan drenkj am. Wan du daut deist, woascht du fieeje Kolen opp sienen Kopp saumlen. 2Kje 6:22; Spr 25:21-22 21 Lot die nich von daut Beese jewennen, oba jewenn daut Beese met Goodet.