1 Waut sell wie dan sajen, waut ons Voda Abraham nom Fleesch jefungen haft? 2 Wan Abraham derch Woakjen jerajchtfoadicht worden wia, dan haud hee waut toom Lowen, oba nich ver Gott. 3 Wiels waut sajcht de Schreft? "Abraham jleewd Gott, un daut wort am to Jerajchtichkjeit jeräakjent." 1Mo 15:6; Gal 3:6 4 Wäa oba wirkjt, däm woat de Loon nich aus Jnod aunjeräakjent, oba aus Schult. Ree 11:6 5 Wäa oba nich wirkjt, oba jleeft aun dän, dee de Gottloose rajchtfoadicht, däm woat sien Gloowen aus Jerajchtichkjeit aunjeräakjent. Ree 3:26 6 Soo aus uk David rät von de Jlekj-Seelichkjeit von däm Mensch, däm Gott de Jerajchtichkjeit tooräakjent onen Woakjen, Ps 32:1-2 7 un sajcht: "Seelich sent dee, wäms Jesazloosichkjeiten vejäft sent un dee äare Sinden bedakjt sent. 8 Seelich es de Maun, däm de Har de Sind nich aunräakjent!"

9 Kjemt dise Jlekj-Seelichkjeit dan opp dee von de Beschniedunk ooda uk opp dee von de Onbeschniedunk? Wiels wie sajen, daut de Gloowen Abraham aus Jerajchtichkjeit aunjeräakjent wort. 10 Woo wort am dee dan aunjeräakjent? Aus hee en de Beschniedunk ooda Onbeschniedunk wia? Nich en de Beschniedunk, oba en de Onbeschniedunk. 11 Un hee kjrieech daut Tieekjen von de Beschniedunk aus een Stampel von de Jerajchtichkjeit von däm Gloowen, dän hee aul en de Onbeschniedunk haud, soo daut hee Voda es fa aul dee, waut jleewen, wan uk onbeschnäden, soo daut uk äant de Jerajchtichkjeit wudd toojeräakjent woaren; 1Mo 17:10-11 12 un Voda von de Beschniedunk, dee nich bloos von de Beschniedunk sent, oba dee uk en de Footstaupen waundlen von däm Gloowen, dän ons Voda Abraham haud, aus hee noch en de Onbeschniedunk wia. Mat 3:9

13 Wiels nich derch daut Jesaz kjrieech Abraham ooda sien Nokomen de Vespräakjunk, daut hee de Welt äare Oaw sennen sull, oba derch de Jerajchtichkjeit vom Gloowen. 1Mo 22:17-18 14 Wiels wan dee vom Jesaz Oawen sent, dan es de Gloowen nutzloos jemoakt, un de Vespräakjunk es to nuscht jemoakt. 15 Wiels daut Jesaz wirkjt Oaja; wiels wua kjeen Jesaz es, doa es uk kjeene Äwaträdunk. Ree 3:20; 5:13; 7:8,10 16 Doawäajen es daut derch dän Gloowen, om daut et ut Jnod es, soo daut de Vespräakjunk fa de gaunze Nokomenschoft secha es, nich bloos fa dee, von ut daut Jesaz, oba uk fa dee, von Abraham sien Gloowen, dee de Voda von ons aula es, 17 (soo aus jeschräwen steit: "Ekj hab die toom Voda von väle Velkja jesat",) ver däm Gott, aun däm hee jleewd, woona de Doodje läwendich moakt un daut roopt, waut nich es, aus wan et doa es. 1Mo 17:5; 2Kor 1:9; Heb 11:19 18 Un hee haft jäajen Hopninj opp de Hopninj jejleeft, daut hee een Voda von väle Velkja wort, soo aus to am jesajcht wia: "Soo saul dien Nokomen sennen." 1Mo 15:5 19 Un hee wort nich schwak em Gloowen, hee betracht uk nich sienen ieejnen Kjarpa, dee aul vestorwen wia, wiels hee aul bie hundat Joa oolt wia uk nich dän vestorwnen Muttalief von Sara. 1Mo 17:17 20 Hee twieweld nich derch Ongloowen aun de Vespräakjunk von Gott, oba wort jestoakjt em Gloowen, endäm hee Gott de Iea jeef, 21 un wia voll äwazeicht, daut Hee daut, waut Hee vesproaken haft, uk doonen kaun. Heb 11:11 22 Doawäajen wort am daut uk to Jerajchtichkjeit aunjeräakjent.

23 Daut es oba nich auleen om sient-haulwen jeschräwen, daut am daut toojeräakjent wia, 24 oba uk om ons-haulwen, dee daut toojeräakjent woaren saul, wan wie aun dän jleewen, dee onsen Harn Jesus Christus von de Doodje opperwakjt haft, 25 woona wort om onse Sinden haulwen hanjejäft un wort opperwakjt fa onse Rajchtfoadjunk. Jes 53:4-6; Ree 8:32,34