1 Doawäajen kaust du die nich entschuldjen, Oo Mensch, wäaemma du best, dee du rechtst; wiels wuarenn du eenen aundren rechtst, vedaumst du die selfst; wiels du, dee du rechtst, deist dautselwje. Mat 7:2; Joh 8:7; Jak 4:12 2 Oba wie weeten, daut Gott sien Jerecht woarhauftich es jäajen dee, dee soone Dinja doonen. 3 Un denkjst du, Oo Mensch, dee du dee rechtst, waut soont doonen un deist uk dautselwje, daut du von Gott sien Uadeel utkleiwen woascht? 4 Ooda ve-achtst du dän Rikjtum von siene Leeftolichkjeit, Jedult un Lankmoot, onen to weeten, daut Gott sien Goodet die to de Busse leit? 2Pe 3:9,15 5 Oba no dien hoadet un onbussfoadjet Hoat klompst du fa die selfst dän Oaja opp, fa dän Dach vom Oaja un de Openboarunk von Gott sien jerajchtet Jerecht, 6 dee doa eenem jiedren tolen woat, doano aus siene Woakjen sent: Jer 32:19; Mat 16:27; 2Kor 5:10 7 Eewjet Läwen fa dee, waut aunhoolent met Jedult en goode Woakjen de Harlichkjeit un Iea un Onstoaflichkjeit sieekjen; 8 oba fa dee, waut zenkjisch un de Woarheit onjehuarsom sent un jehorchen de Ojjerajchtichkjeit, Wutt un Oaja; 2Tess 1:8 9 Triebsaul un Angst äwa jieda Menschen-Seel, dee doa Beeset deit, ieeschtens de Juden un uk de Griechen; 10 oba Harlichkjeit un Iea un Fräd eenem Jiedren, dee Goodet wirkjt, ieeschtens de Juden un uk de Griechen; 11 wiels doa es kjeen Aunseenen von de Persoon bie Gott. 2Chr 19:7; Apj 10:34; Kol 3:25; 1Pe 1:17

12 Oba sooväle aus onen Jesaz jesindicht haben, dee woaren uk onen Jesaz veloaren gonen; un dee unja daut Jesaz jesindicht haben, dee woaren derch daut Jesaz ve-uadeelt woaren, 13 (wiels ver Gott sent nich de Hiera vom Jesaz jerajcht, oba dee daut Jesaz doonen, woaren jerajchtfoadicht woaren. 5Mo 6:25; Mat 7:21; Jak 1:22 14 Wiels wan de Heiden, dee daut Jesaz nich haben, von Natua doonen, waut daut Jesaz velangt, sent see fa sikj selfst een Jesaz, wan see uk nich daut Jesaz haben; Apj 10:35 15 woone doa bewiesen, daut daut Woakj vom Jesaz en äare Hoaten jeschräwen es; un äa Jewessen jeft Zeichnis, wäarent äare Jedanken sikj unjarenaunda vekloagen ooda veteidjen,) Ree 1:32 16 aun däm Dach, wua Gott daut vestoakne von de Menschen rechten woat derch Jesus Christus, no mien Evangelium. Luk 8:17

17 Kjikj, du heetst een Jud un velatst die opp daut Jesaz un deist die brow en Gott 18 un weetst sienen Wellen un proofst daut Baste, wiels du utem Jesaz unjarecht best 19 un best toovetrut, een Leida fa de Blinje to sennen, een Licht fa dee, dee en de Diestanis sent, Mat 15:14 20 een Beliera fa de Onvestendje, een Liera fa de Kjinjakjes, dee du de Form hast von Erkjantnis un Woarheit em Jesaz. 21 Du lieescht aulsoo aundre, oba die selfst lieescht du nich? Du prädichst, daut eena nich stälen saul, un du stälst? Ps 50:16-21; Mat 23:3-4 22 Du sajchst, eena saul nich ehebräakjen, un du brakjst de Ehe? Die gruselt fa* de Aufjetta, un du bejeist Tempel-Stälarie? 23 Du best brow em Jesaz un beschämst Gott derch daut Jesaz Äwaträden? 24 Soo aus jeschräwen steit: "Gott sien Nomen woat derch junt mank de Heiden jelastat." Jes 52:5; Hes 36:20-23

25 Wiels de Beschniedunk nuzt werkjlich, wan du daut Jesaz helst; best du oba een Jesaz-Äwaträda, dan woat diene Beschniedunk to eene Onbeschniedunk. 26 Wan nu de Onbeschnädna de Fodrungen vom Jesaz helt, woat siene Onbeschniedunk am dan nich aus Beschniedunk aunjeräakjent woaren? Gal 5:6 27 Un sull nich dee, waut von Natua onbeschnäden es un daut Jesaz erfelt, die rechten, dee du unja de Buakstow un Beschniedunk daut Jesaz äwaträtst? 28 Wiels daut es nich een Jud, dee daut butalich es, uk es daut nich eene Beschniedunk, dee butalich aum Fleesch passieet; Jer 4:4 29 oba daut es een Jud, dee daut ennalich es, un de Beschniedunk es dee vom Hoat, em Jeist, oba nich no de Buakstow. Däm sien Low es nich von Menschen, oba von Gott. 5Mo 30:6; Flp 3:3; Kol 2:11