1 Weet jie nich, Breeda (wiels ekj räd met dee, dee daut Jesaz weeten), daut daut Jesaz äwa dän Mensch harscht, soo lang aus hee läft? 2 Wiels de befriede Fru es derch daut Jesaz aun äaren Maun jebungen, soo lang aus hee läft; wan oba de Maun stoaft, dan es see frie von daut Jesaz von däm Maun. 1Kor 7:39 3 Soo dan, wan äa Maun noch läft, woat see eene Ehebräakjarin jenant, wan see een aundra Maun siene woat; wan oba de Maun stoaft, es see frie vom Jesaz, soo daut see nich eene Ehebräakjarin es, wan see een aundra Maun siene woat. 4 Jrod soo sent uk jie, miene Breeda, to daut Jesaz dootjemoakt, derch Christus sien Kjarpa, soo daut jie eenem aundren siene woaren, däm siene, dee von de Doodje opperwakjt es, soo daut wie fa Gott Frucht brinjen. 5 Wiels aus wie em Fleesch wieren, wirkjten de Liedenschoften von de Sinden*, dee derch daut Jesaz sent, en onse Jlieda, om fa dän Doot Frucht to brinjen. Ree 6:21 6 Oba nu sent wie frie vom Jesaz, wiels wie to daut jestorwen sent, waut ons faust hilt, soo daut wie em Nieen vom Jeist deenen un nich em Oolen vonne Buakstow. Ree 8:1-2; 6:2,4

7 Waut sell wie dan nu sajen? Es daut Jesaz Sind? Sea lang nich! Oba onen daut Jesaz haud ekj de Sind nich erkjant; wiels uk von de Lost haud ekj nuscht jewist, wan daut Jesaz nich jesajcht haud: Lot die nich jelesten. 2Mo 20:17 8 Oba de Sind, dee derch daut Jeboot Uasoak neem, wirkjt aulahaunt Lost en mie; wiels onen daut Jesaz wia de Sind doot. Ree 5:13; 1Kor 15:56 9 Ekj oba läwd ea onen Jesaz; oba aus daut Jeboot kjeem, läwd de Sind opp, un ekj storf. 10 Un daut befunk sikj en mie, daut daut Jeboot, waut toom Läwen jejäft wort, brocht mie dän Doot. 3Mo 18:5; Jak 1:15 11 Wiels de Sind, dee derch daut Jeboot Uasoak neem, vefieed mie un muak mie doaderch doot. Heb 3:13 12 Daut Jesaz es aulsoo heilich, un daut Jeboot es heilich, rajcht un goot. 1Tim 1:8 13 Brocht mie daut Goode dan dän Doot? Sea lang nich! Oba de Sind, om daut dee sikj aus Sind bewees, wirkjt en mie dän Doot derch daut Goode, soo daut de Sind äwarut sindich wort derch daut Jeboot. Ree 5:20

14 Wiels wie weeten, daut daut Jesaz jeistlich es; oba ekj sie fleeschlich, unja de Sind vekoft. Joh 3:6 15 Wiels waut ekj doo, vesto ekj nich; wiels ekj doo nich, waut ekj well, oba waut ekj haus, daut doo ekj. 16 Wan ekj oba daut eew, waut ekj nich well, dan stemm ekj daut Jesaz bie, daut et rajcht es. 17 Nu oba doo nich mea ekj daut, oba de Sind, dee en mie wont. 18 Wiels ekj weet, daut en mie, daut es en mien Fleesch, nuscht Goodet wont; wiels daut Wellen es doa en mie, oba daut Goode to vollbrinjen, finj ekj nich. 1Mo 6:5; 8:21 19 Wiels daut Goode, daut ekj well, doo ekj nich, oba daut Beese, daut ekj nich well, daut doo ekj. 20 Wan ekj oba doo, waut ekj nich well, dan doo nich mea ekj daut, oba de Sind, dee en mie wont. 21 Aulsoo finj ekj een Jesaz, wan ekj daut Goode eewen well, daut Beese mie tojäajen es. 22 Wiels ekj hab Lost aun daut Jesaz von Gott no däm bennaschten Mensch no; 23 oba ekj see een aundret Jesaz en miene Jlieda, daut jäajen daut Jesaz von mien Senn stritt un nemt mie faust unja daut Jesaz von de Sind, daut en miene Jlieda es. Gal 5:17 24 Ekj älendja Mensch! Wäa woat mie friemoaken von disem Doodes-Kjarpa? 25 Ekj dank Gott derch Jesus Christus, onsen Harn! Soo deen ekj nu selfst met däm Senn daut Jesaz von Gott, oba met daut Fleesch daut Jesaz von de Sind. 1Kor 15:57