1 Doa es dan nu kjeene Vedaumnis fa dee, dee en Christus Jesus sent, dee nich no daut Fleesch waundlen, oba no däm Jeist. Ree 8:34 2 Wiels daut Jesaz von däm Jeist von daut Läwen en Christus Jesus, haft mie friejemoakt von daut Jesaz von de Sind un von däm Doot. 3 Wiels waut fa daut Jesaz onmäajlich wia wuarenn daut derch daut Fleesch schwak wia, schekjt Gott sienen ieejnen Sän en de Jestault von sintlichet Fleesch un fa de Sind un vedaumd de Sind em Fleesch, Apj 13:38; 15:10; Heb 2:17 4 om daut de Jerajchtichkjeit vom Jesaz en ons mucht erfelt woaren, dee wie nich no daut Fleesch, oba no däm Jeist waundlen. Gal 5:16,25 5 Wiels dee, waut no daut Fleesch sent, denkjen aun daut, waut vom Fleesch es, oba dee, waut no däm Jeist sent, no daut, waut vom Jeist es. 6 Wiels de Jesennunk* vom Fleesch es de Doot, oba de Jesennunk vom Jeist es Läwen un Fräd. Ree 6:21; Gal 6:8 7 Wiels de fleeschliche Jesennunk es Fientschoft jäajen Gott, wiels dee es Gott sien Jesaz nich unjadon, un dee kaun uk nich. Jak 4:4 8 Dee oba em Fleesch sent, kjennen Gott nich jefaulen. 9 Jie oba sent nich em Fleesch, oba em Jeist, wan sest Gott sien Jeist en junt wont. Wan oba wäa Christus sien Jeist nich haft, dee es nich sient. 10 Wan oba Christus en junt es, dan es de Kjarpa werkjlich doot wäajens de Sind, oba de Jeist es Läwen wäajens de Jerajchtichkjeit. Gal 2:20 11 Un wan de Jeist von däm, dee Jesus vom Doot opperwakjt haft, en junt wont, dan woat dee, dee Christus von de Doodje opperwakjt haft, uk june stoafliche Kjarpasch läwendich moaken derch sienen Jeist, dee en junt wont.

12 Soo dan, Breeda, sent wie Schildna, oba nich aun daut Fleesch, daut wie no daut Fleesch läwen; Ree 6:7,18 13 wiels wan jie nom Fleesch läwen, dan woa jie stoawen; wan jie oba derch dän Jeist de Woakjen vom Kjarpa dootmoaken, dan woa jie läwen. Ree 7:24; Gal 6:8; Efs 4:22-24 14 Wiels aula, dee von Gott sien Jeist jeleit woaren, dee sent Gott siene Säns. 15 Wiels jie haben nich eenen Sklowenjeist jekjräajen, daut jie junt wada ferchten, oba jie haben eenen Jeist von de Kjintschoft jekjräajen, endäm wie roopen: Abba, Voda! Gal 4:5-6; 2Tim 1:7 16 De Jeist selfst jeft onsem Jeist Zeichnis, daut wie Gott siene Kjinja sent. 2Kor 1:22 17 Wan oba Kjinja, dan uk Oawen, Gott siene Oawen un Christus siene Metoawen, wan wie sest met Am toop lieden, daut wie uk met-veharlicht woaren. Gal 4:7; Opb 21:7

18 Wiels ekj hool daut doafäa, daut de Lieden von dise Tiet nich wieet sent, vejlikjt to woaren met de Harlichkjeit, dee aun ons saul jeopenboat woaren. 2Kor 4:17 19 Wiels daut drinjende Wachten von de Kjreatua luat no de Openboarunk von Gott siene Kjinja. Kol 3:4; 1Joh 3:2 20 Wiels de Kjreatua es de Eitelkjeit unjadon jeworden, nich wellens, oba wäajens dän, dee dee unjadon jemoakt haft, opp Hopninj, Prä 1:4 21 soo daut uk de Kjreatua selfst woat friejemoakt woaren von de Sklowarie von de Vedoawunk to de harliche Frieheit von Gott siene Kjinja. 2Pe 3:13 22 Wiels wie weeten, daut aule Kjreatua metstänt un bat nu toop en Jeburts-Weedoag licht; 23 un nich bloos dee, oba uk wie selfst, dee wie de ieeschte Frucht vom Jeist haben, uk wie selfst stänen en ons selfst un luaren no de Kjintschoft, no de Erleesunk von ons Kjarpa. 2Kor 5:2 24 Wiels en de Hopninj sent wie jerat; oba eene Hopninj, dee eena sitt, es nich Hopninj; wiels woo kaun eena daut hopen, waut eena sitt? 25 Wan wie oba daut hopen, waut wie nich seenen, dan lua wie met Jedult. Gal 5:5

26 Un jrod soo halpt de Jeist uk met onse Schwakheit. Wiels wie weeten nich, waut wie bäden sellen, soo aus sikj daut jehieet; oba deeselwja Jeist veträt* ons met een onutspräakjlichet Stänen. 27 Oba dee, waut de Hoaten unjasieekjt, weet, waut de Jeist em Senn haft, wiels Hee veträt de Heilje doano, aus waut Gott jefelt. 28 Wie weeten oba, daut fa deejanje, dee Gott leewen, aules toom Basten wirkjt, dee no daut Väanämen beroopen sent. Efs 1:8 29 Wiels woone Hee verhäa-kjand, dee haft Hee uk verhäa-bestemt, daut Bilt von sien Sän jlikj to woaren, soo daut Hee de Ieeschtjebuarna es mank väle Breeda. Kol 1:18; Heb 1:6 30 Woone Hee oba verhäa-bestemt haft, dee haft Hee uk beroopen; un woone Hee beroopen haft, dee haft Hee uk jerajchtfoadicht; woone Hee oba jerajchtfoadicht haft, dee haft Hee uk veharlicht. Ree 3:26; 2Tess 2:13-14

31 Waut sull wie dan hiatoo sajen? Wan Gott fa ons es, wäa kaun jäajen ons sennen? Ps 118:6 32 Hee, dee sienen ieejnen Sän nich veschoont haft, oba Am fa ons aula hanjeef, woo sull Hee ons nich uk met Am aules schenkjen? Joh 3:16 33 Wäa woat jäajen Gott siene Uterwälde eene Aunkloag brinjen? Gott es daut, dee rajchtfoadicht. 34 Wäa es, dee doa vedaumt? Christus es, dee jestorwen es un väl mea, dee uk opperwakjt es, dee uk aun Gott siene rajchte Haunt es, dee ons uk veträt. 1Joh 2:1; Heb 7:25 35 Wäa woat ons scheeden von Christus siene Leew? Triebsaul ooda Angst ooda Vefoljunk ooda Hungaschnoot ooda Bloozichkjeit ooda Jefoa ooda Schwieet? 36 Soo aus jeschräwen steit: "Om dient-haulwen woa wie dän gaunzen Dach dootjemoakt; wie sent jetalt aus Schlacht-Schop!" Ps 44:23; 2Kor 4:11 37 Oba en aul dit sent wie mea aus Jewenna derch dän, dee ons jeleeft haft. 1Joh 5:4 38 Wiels ekj sie äwazeicht, daut nich Doot, nich Läwen, nich Enjel, nich Ferschtentiema, nich Machten, nich Jäajenwuatjet, nich Tookjinftjet, Efs 6:12 39 nich Huaget, nich Deepet, un kjeene aundre Kjreatua kaun ons scheeden von Gott siene Leew, dee en Christus Jesus es, onsem Harn. Ps 73:23-26