1 Wäarent see oba toom Volkj räden, kjeemen de Priesta un de Hauptmaun vom Tempel un de Saduzäa. Luk 22:4,52 2 Dee wieren sea vedrisslich, daut see daut Volkj lieeden un en Jesus daut Oppstonen vom Doot prädijden. Apj 23:8 3 Un see läden de Henj aun äant un saden äant en Vewoarunk bat aum foljenden Morjen, wiels daut wia aul Owent. 4 Oba väle von dee, dee daut Wuat jehieet hauden, worden jleewent, un de Zol von de Mana woss bat bie fief-dusent. Apj 2:47

5 Daut passieed oba aum Morjen, daut äare Bowaschte un Eltestasch un Schreftjelieede sikj en Jerusalem vesaumelden, 6 Hanas, de Huagapriesta, un Kaifas un Johanes un Alexanda un aul dee, dee utem Huagepriesta-Jeschlajcht wieren. Luk 3:1-2 7 Un see stalden äant ver sikj un fruagen äant: Ut waut fa Krauft, ooda en waut fa Nomen hab jie dit jedonen? Mat 21:23

8 Dan säd Petrus, vom Heiljen Jeist jefelt, to äant: Jie Bowaschte vom Volkj un jie Eltestasch von Israel! Mat 10:19-20 9 Wan wie vondoag wäajens een goodet Woakj aun eenem kranken Mensch jerecht woaren, wuaderch hee jeheelt worden es, 10 dan sell jie aula un daut gaunze Volkj Israel weeten, daut derch dän Nomen Jesus Christus von Nazaret, dän jie jekjriezicht haben, dän Gott vom Doot opperwakjt haft, daut derch Am disa jesunt ver junt steit. Apj 3:6,13-16 11 Dit es de Steen, dee von junt Bulied veschmäten wort, dee toom Haupt-Akjsteen jeworden es. Mat 21:42 12 Un doa es en kjeenem aundren de Radunk, wiels unja däm Himmel es kjeen aundra Nomen mank Menschen jejäft, en däm wie sellen jerat woaren. Mat 1:21; Apj 10:43

13 Aus see oba Petrus un Johanes äa Friemoot sagen un enworden, daut see onjelieede Menschen un Onjeschoolde wieren, wundaden see sikj un kjanden äant, daut see met Jesus toopjewast wieren. 14 Aus see oba dän Mensch sagen bie äant stonen, dee doa wia jeheelt worden, kunnen see nuscht doajäajen sajen. Apj 3:8-9 15 Dan befoolen see äant, utem huagen Rot rut to gonen un haundelden metenaunda un säden: 16 Waut sell wie dise Menschen doonen? Wiels doa es werkjlich een moakjboaret Tieekjen derch äant passieet, un daut es fa aul dee openboa, dee en Jerusalem wonen, un wie kjennen daut nich velieejen. Joh 11:47 17 Oba om daut et nich wieda em Volkj vespreet, lot ons äant iernstlich dreiwen, nich lenja to irjent een Mensch von disem Nomen to räden. 18 Un see roopten äant un jebooden äant, daut see derchut nich en däm Nomen Jesus räden uk nich lieren sullen. 19 Oba Petrus un Johanes auntwuaden äant un säden: Doot fa junt selfst rechten, auf daut rajcht es ver Gott, daut wie junt mea horchen aus Gott. Apj 5:28-29 20 Wiels wie kjennen nich aundasch, aus doavon räden, waut wie jeseenen un jehieet haben. 21 See oba dreiwden äant noch wieda un leeten äant gonen, wiels see nuscht fungen, woo see äant strofen kunnen, wäajens daut Volkj haulwen, wiels see veharlichten Gott aula äwa daut, waut passieet wia. 22 Wiels de Mensch wia äwa vieetich Joa oolt, aun däm dit Heel-Tieekjen* passieet wia.

23 Un aus see äant hauden gonen loten, kjeemen see no de Äaje un säden äant aules, waut de Huagepriesta un de Eltestasch to äant jesajcht hauden. 24 Un see, aus see daut hieeden, hoowen eenstemmich äare Stemm opp no Gott un säden: Har, Du best de Gott, dee Himmel un Ieed un daut Mäa un aules, waut doabennen es, jemoakt haft; 25 dee Du derch dien Kjnajcht David sien Mul jesajcht hast: "Wuarom tooben de Heiden, un de Menschen plonen Nutzlooset? 26 De Kjennichs von de Ieed stonen sikj toop, un de Bowaschte vesaumlen sikj jäajen dän Harn un jäajen sienen Christus." Ps 2:1-2 27 Werkjlich, see haben sikj vesaumelt jäajen dien heiljet Kjint Jesus, dän Du jesaulft hast, beid, Herodes un Pontius Pilatus, met de Heiden un de Menschen von Israel, Luk 23:12 28 to doonen, waut diene Haunt un dien Rotschluss verhäa beschloten haud, daut et passieren sull. 29 Un nu, Har, kjikj no äa Dreiwen un jeff diene Kjnajchts, daut see met aulem Friemoot dien Wuat räden, 30 wäarent Du diene Haunt utstrakjst fa de Heelunk, un daut Tieekjens un Wunda passieren derch dän Nomen von dien heilja Sän Jesus. 31 Un aus see jebät hauden, scheddad de Städ, wua see vesaumelt wieren; un see worden aula met däm Heiljen Jeist jefelt un räden Gott sien Wuat met Friemoot.

32 Un de Häad von de Jleewende wieren een Hoat un eene Seel; un doa säd kjeena, daut irjent von siene Jieta siene ieejne wieren, oba see hauden aules jemeen. Apj 2:44 33 Un met groote Krauft jeewen de Apostel daut Zeichnis auf von däm Harn Jesus sien Oppstonen, un doa wia groote Jnod opp äant aula. Apj 2:47 34 Un doa wia uk kjeena mank äant met Bederfnis, wiels sooväl aus doa Ieejendeema von Akasch ooda Hiesa wieren, vekoften dee un brochten dän Pries von daut Vekofte Apj 2:45 35 un läden de Apostel daut vere Feet, un daut wort eenem jiedren toojedeelt, doano aus een jiedra Bederfnis haud. 36 Un Joses, dee von de Apostel uk Barnabas jenant wort (daut woat äwasat: De Sän vom Troost), een Levit, von Jeburt ut Ziepern, Apj 11:22-26; 12:25; 15:2; Gal 2:1; Kol 4:10 37 dee eenen Aka haud, vekoft dän, brocht daut Jelt un läd de Apostel daut vere Feet.