1 En dee Doag, aus de Jinja sikj vemieeden, kjeem doa een Murren opp mank de Griechen jäajen de Hebräa, wiels äare Wätfrues bie de auldoagsche Bedeenunk äwaseenen worden. Apj 4:35 2 Dan roopten de Twalw de Häad Jinja toop un säden: Daut ziemt sikj nich, daut wie Gott sien Wuat veloten un de Deschen bedeenen. 3 Doawäajen, Breeda, seet nu mank junt no säwen Mana, dee een goodet Zeichnis haben, voll Heiljen Jeist un Weisheit, dee wie äwa dit Bederfnis aunstalen kjennen. 1Tim 3:8-10 4 Wie oba woaren aunhoolen aum Jebäd un aum Deenst von daut Wuat.

5 Un de Räd jefoll de gaunze Häad, un see wälden Stefanus, eenen Maun voll Gloowen un Heiljen Jeist, un Filippus un Prochorus un Nikanor un Timon un Parmenas un Nikolaus, dän Judenjenossen von Antiochia. Apj 8:5 6 Dise stalden see ver de Apostel, un aus see jebät hauden, läden see äant de Henj opp. Apj 1:24; 13:3; 14:23 7 Un Gott sien Wuat neem too, un de Zol von de Jinja wort sea groot en Jerusalem; un eene groote Volkjshäad von de Priesta worden däm Gloowen jehuarsom. Apj 2:47; 19:20

8 Stefanus oba, voll Gloowen un Krauft, deed Wunda un groote Tieekjens mankem Volkj. 9 Dan stunden oba atelje opp von dee soo-jenande Synagoge, von de Libertina un de Kiereena un de Alexandra un dee von Zilizien un Asien un streeden met Stefanus. 10 Un see kunnen de Weisheit un däm Jeist nich wadastonen, met däm hee räd. Luk 21:15 11 Dan bedwungen see plietsch Mana, dee doa säden: Wie haben am jehieet lastrende Wieed räden jäajen Moses un Gott. Mat 26:60-66 12 Un see räajden daut Volkj un de Eltestasch un de Schreftjelieede opp, un dee kjeemen äwa am un reeten am wajch un fieeden am ver dän huagen Rot; 13 un see stalden faulsche Zeijen opp, dee säden: Dis Mensch hieet nich opp, Lastawieed to räden jäajen dise heilje Städ un daut Jesaz, Jer 26:9,11 14 wiels wie haben am hieet sajen: Dis Jesus von Nazaret woat dise Städ dolbräakjen un de Jewanheiten endren, dee Moses ons äwajäft haft. Joh 2:19 15 Un aul dee, dee em huagen Rot sauten un am aunkjikjten, sagen sien Jesecht soo aus een Enjel-Jesecht.