1 Dan säd Agrippa to Paulus: Daut es die erlaupt, fa die selfst to räden. Dan strakjt Paulus de Haunt ut un veteidijd sikj: 2 Ekj schaz mie jlekjlich, leewa Kjennich Agrippa, daut ekj mie vondoag ver die veteidjen kaun wäajens aul de Dinja, wuawäajen de Juden mie vekloagen. 3 Besondasch wiels du aul de Strietfroagen un Jewanheiten von de Juden kjanst; doawäajen pracha ekj die, mie jeduldich too to horchen. 4 Äwa miene Läwens-Wies von Jugent opp, dee ekj von Aunfank aun mank mien Volkj un en Jerusalem jefieet hab, weeten aul de Juden, 5 dee mie von verhäa kjanen, wan see daut bezeijen wellen, daut ekj no de strenjste Sekt von onse Relijion jeläft hab aus een Farisäa. Apj 23:6; Flp 3:5 6 Un nu sto ekj un woa aunjekloacht wäajens de Hopninj von de Vespräakjunk, dee von Gott to onse Vodasch jemoakt wort, Apj 28:20 7 opp dee onse twalw Stam hopen to komen, wäarent see aunhoolent Gott deenen Dach un Nacht. Wäajens dise Hopninj woa ekj, Kjennich Agrippa, von de Juden aunjekloacht. Apj 24:15 8 Wuarom woat daut bie junt fa onjleeflich jehoolen, daut Gott de Doodje opperwakjt? Apj 23:8 9 Ekj docht werkjlich, daut ekj jäajen dän Nomen von Jesus von Nazaret aules doonen must, 10 waut ekj dan uk en Jerusalem deed. Un väle von de Heilje hab ekj en Jefenkjnissen enjestopt, wuatoo ekj Vollmacht kjrieech von de Huagepriesta, un wan see sullen dootjemoakt woaren, jeef ekj miene Stemm doatoo. 11 Un ekj stroft äant foaken en aule Synagogen, un bemust äant to lastren, un wia äwamoten doll jäajen äant un vefoljd äant soogoa bat en framde Städa.

12 Wuaropp, aus ekj no Damaskus reisd met Vollmacht un Befäl von de Huagepriesta, 13 dan sach ekj medden aum Dach oppem Wajch, Oo Kjennich, een Licht vom Himmel, dacha aus de Sonnenschien, daut mie un dee, waut met mie reisden, omscheen. 14 Un aus wie aula opp de Ieed jefollen wieren, hieed ekj eene Stemm en hebräische Sproak to mie sajen: Saul, Saul, wuarom vefolchst du Mie? Daut es die schwoa, jäajen de Stachels to hasren. 15 Ekj oba säd: Wäa best Du, Har? Un Hee säd: Ekj sie Jesus, dän du vefolchst. 16 Oba sto opp, un sto opp diene Feet; wiels doatoo hab Ekj Mie die jeopenboat, die aus Deena un Zeij to ordnen von daut, waut du jeseenen hast un von daut, waut Ekj die noch openboaren woa; 17 un ekj well die raden von daut Volkj un von de Heiden, mank dee Ekj die nu schekj, 18 om äare Uagen op to moaken, daut see sikj bekjieren von de Diestanis toom Licht un von däm Soton siene Jewault to Gott, soo daut see Sinden-Vejäwunk kjrieen un een Oafgoot mank dee, waut jeheilicht woaren derch dän Gloowen aun Mie. Apj 20:32

19 Doawäajen, Kjennich Agrippa, sie ekj de himlische Vision nich onjehuarsom jewast, Gal 1:16 20 oba ekj vekjindijd ieescht to dee en Damaskus un en Jerusalem, un dan derch daut gaunze judische Launt un de Heiden, daut see Busse doonen sullen un sikj to Gott bekjieren un Woakjen doonen, dee de Busse wieet sent. 21 Doawäajen jreepen mie de Juden em Tempel un vesochten, mie doot to moaken. Apj 21:30-31 22 Oba wiels ekj Gott siene Help kjrieech, sto ekj bat vondoag un jäw Zeichnis ver beid, Kjliene un Groote un saj nuscht aundret, aus waut de Profeeten un Moses jesajcht haben, waut doa passieren sull: Luk 24:44-47 23 Daut Christus lieden must, un daut Hee de Ieeschta von de Opparstonunk von de Doodje sennen sull, dee Licht vekjindjen wudd fa daut Volkj un de Heiden. 1Kor 15:20

24 Aus hee oba daut fa siene Veteidjunk säd, säd Festus met lude Stemm: Paulus, du best wonsennich! Daut väle Studieren moakt die wonsennich! 25 Hee oba säd: Ekj sie nich wonsennich, je-ieeda Festus, oba ekj räd woarhauftje un veninftje Wieed. 26 Wiels de Kjennich weet von dise Dinja, to wäm ekj frie räd, wiels ekj sie äwazeicht, daut am nuscht doavon onbekaunt es, wiels daut es nich em Winkjel passieet. Joh 18:20 27 Jleefst du, Kjennich Agrippa, de Profeeten? Ekj weet, daut du jleefst. 28 Agrippa oba säd to Paulus: Doa fält nich väl, daut du mie äwarätst, een Christ to woaren. 29 Paulus säd: Ekj wensch to Gott, aus doa väl ooda weinich fält, daut nich bloos du, oba uk aul dee, dee mie vondoag hieren, soo worden aus ekj sie, buta dise Kjäden.

30 Un aus hee daut jesajcht haud, stunt de Kjennich opp un de Launt-Rejiera un Bernice un dee bie äant sauten. 31 Un see jinjen auntsied un räden metenaunda un säden: Dis Mensch haft nuscht jedonen, waut dän Doot ooda Kjäden wieet es. 32 Agrippa oba säd to Festus. Dis Mensch haud kunt frie-jeloten woaren, wan hee sikj nich opp dän Kjeisa beroopen haud. Apj 25:11