1 Daut passieed oba, wäarent Apollos en Korint wia, daut Paulus, nodäm hee de Bowa-Lenda derchjereist wia, no Efesus kjeem. Un aus hee atelje Jinja funk, 2 säd hee to äant: Hab jie dän Heiljen Jeist jekjräajen, aus jie jleewent worden? See säden: Wie haben noch niemols jehieet, auf doa een Heilja Jeist es. Apj 2:38 3 Un hee säd to äant: Wuaropp word jie dan jedeept? See säden: Opp de Doop von Johanes. 4 Dan säd Paulus: Johanes haft met de Doop von de Omkjia jedeept un säd to daut Volkj, daut see aun dän jleewen sullen, dee no am kjeem, daut es aun Jesus Christus. Mat 3:11 5 Aus see daut hieeden, worden see opp dän Nomen vom Harn Jesus jedeept. 6 Un aus Paulus äant de Henj oppläd, kjeem de Heilja Jeist opp äant, un see räden met Tungen un profezeiden. Apj 8:17; 10:44,46 7 Un aulatoop wieren daut bie twalw Mana.

8 Un hee jinkj en de Synagoge un prädijd friemootich fa dree Moonat lang, wäarent hee sikj unjahilt un äwazeijd äant äwa Gott sien Rikj. 9 Oba wiels atelje vehoaden un nich jleewden, oba ver de Häad von däm Wajch Schlajchtet räden, deeld hee sikj von äant un sondad de Jinja auf un unjahilt sikj aule Dach en de School von een jewessa Tieranus. 10 Un daut jinkj fa twee Joa soo aun, daut aul dee, dee en Asien wonden, däm Harn sien Wuat hieeden, beides, Juden un Griechen.

11 Un Gott wirkjt nich jeweenliche Wunda derch Paulus siene Henj, Apj 14:3; 2Kor 12:12 12 soo daut see soogoa Schweetdieekja un Schaldieekja von sienem Kjarpa opp de Kranke läden un de Krankheiten veleeten äant, un de beese Jeista fuaren rut von äant. Apj 5:15

13 Oba eenje von de rom-reisende judische Beschwiera vesochten dän Nomen vom Harn Jesus to nanen äwa dee, dee beese Jeista hauden, un säden: Wie beschwieren junt bie däm Jesus, dän Paulus prädicht. Luk 9:49 14 Daut wieren säwen Säns von een judischa Huagapriesta Skeva, dee soont deeden. 15 Oba de beesa Jeist auntwuad un säd: Jesus kjan ekj, un ekj weet wäa Paulus es, oba wäa sent jie? 16 Un de Mensch, en däm de beesa Jeist wia, sprunk opp äant un jewonn äant, kjrieech de Macht äwa äant, soo daut see noaktich un vewunt utem Hus utkleiwden. 17 Un dit wort aulem bekaunt, de Juden un uk Griechen, dee en Efesus wonden. Un doa foll eene Forcht äwa aulem, un de Nomen vom Harn Jesus wort huach-jehowen. 18 Un väle von dee, waut doa wieren jleewent jeworden, kjeemen un bekjanden un vetalden äare Woakjen. 19 Oba väle von dee, waut doa Zaubarie jedräwen hauden, brochten de Bieekja toop un vebrenden dee ver aulem; un see räakjenden äaren Wieet ut un befungen, daut et feftich-dusent Selwastekja wieren. 20 Soo woss daut Wuat vom Harn majchtich un neem äwahaunt. Apj 12:24

21 Nodäm dise Dinja äwa wieren, neem Paulus sikj em Jeist väa, derch Mazedonien un Achaja to reisen, un no Jerusalem to reisen, un säd: Wan ekj doa ieescht jewast sie, mott ekj uk noch Room seenen. Apj 23:11 22 Hee schekjt oba twee von siene Deena, Timotäus un Erastus, no Mazedonien; oba hee bleef noch eene Tietlank en Asien. 2Tim 4:20

23 Doa kjeem en de Tiet oba eene nich kjliene Oppräajunk opp äwa dän Wajch. 2Kor 1:8-9 24 Wiels een Selwa-Schmett, met Nomen Demetrius, muak selwane Tempelkjes fa de Diana un brocht de Hauntoabeida eenen nich kjlienen Jewenst. 25 Dise brocht hee toop, uk met de Oabeida von deeselwje Beschaftjunk, un säd: Mana, jie weeten, daut wie von dit Hauntwoakj onsen Rikjtum kjrieen. 26 Un jie hieren un seenen, daut dis Paulus nich bloos en Efesus, oba meist em gaunze Asien väl Volkj äwarät un toom Auffaul brinjt un sajcht: Daut sent nich Jetta, waut met de Henj jemoakt woaren, 27 soo daut nich bloos de Jefoa es, daut ons dis Haundel vefelt, oba uk, daut de Tempel von de groote Jettin Diana fa nuscht je-acht woat un äa Aunseenen venicht woat, dee gaunz Asien un de Welt aunbät. 28 Aus see daut hieeden, worden see voll Wutt un schrieejen un säden: Groot es de Diana von de Efeesa! 29 Un de gaunze Staut wia voll Vewerrunk, un see stormden eenstemmich en dän Teauta, un see schlapten de Mazedonia, Gajus un Aristarchus, Paulus siene Reis-Poatna, met sikj. Apj 20:4 30 Aus oba Paulus mank daut Volkj gonen wull, leeten de Jinja daut nich. 31 Uk atelje von de Bowaschte en Asien, dee siene Frind wieren, schekjten no am un ermonden am, daut hee sikj nich sull en dän Teauta nenjäwen. 32 Un atelje schrieejen een Dinkj un aundre waut aundret, un de Vesaumlunk wia derchenaunda, un de mieeschte wisten nich, wuarom see toopjekomen wieren. 33 Oba see neemen Alexanda von ut de Volkjshäad, wiels de Juden schoowen am veraun. Un Alexanda wonk met de Haunt un wull sikj ver daut Volkj veteidjen. 34 Oba aus see enworden, daut hee een Jud wia, schrieejen see bie twee Stund, aula met eene Stemm: Groot es de Diana von de Efeesa!

35 Aus oba de Stauts-Schriewa daut Volkj beruicht haud, säd hee: Jie Mana von Efesus, wua es een Mensch, dee nich weet, daut de Staut von de Efeesa Tempel-Fläaja von de groote Jettin Diana es un von daut Bilt, waut von Jupiter raufjefollen es? Apj 19:27 36 Wiels daut nu nich jeit to wadaspräakjen, es daut needich, daut jie ruich sent un nuscht too haustich doonen. 37 Wiels jie haben dise Mana häajebrocht, dee nich Tempel-Reiba uk nich Lastra fa june Jettin sent. 38 Wan oba Demetrius un de Kjenstla, waut met am sent, eene Kloag jäajen irjentwäm haben, dan woat Jerecht jehoolen, un doa sent Be-aumte, lot äant sikj unjarenaunda vekloagen. 39 Wan jie oba noch eene aundre Sach wenschen, dan saul daut en de jesazliche Vesaumlunk jeschlicht woaren. 40 Wiels wie sent en Jefoa, wäajens dän vondoagschen Opprua aunjekloacht to woaren, un doa es kjeene Uasoak, wuamet wie dise wille Vesaumlunk entschuldjen kunnen. 41 Un aus hee dit jesajcht haud, entleet hee de Vesaumlunk.