1 Un aus wie jerat wieren, word wie en, daut de Insel Malta heet. 2 De Enwona beweesen ons eene nich kjliene Frintschoft, stekjten een Fia aun un neemen ons aula opp, wäajens dän Räajen waut doa foll un wäajens de Kold. 2Kor 11:27 3 Aus Paulus oba eenen Klompen Struck toop-ropt un daut oppet Fia läd, kjeem eene Schlang ut de Hett un muak sikj faust aun siene Haunt. 4 Aus oba de Enwona sagen, daut daut Tia aun siene Haunt honk, säden see to eenaunda: Secha es dis Mensch een Merda; wan hee uk vom Mäa jerat worden es, lat am de Rach doch nich läwen. 5 Oba hee schliesad daut Tia en daut Fia nenn, un am passieed kjeen Schoden. Mrk 16:18 6 Oba see wachten doaropp, daut hee wudd aunschwalen ooda plazlich doot dolfaulen. Aus see oba lang wachten un sagen, daut am nuscht Schlajchtet passieed, endaden see äare Meeninj un säden, hee wia een Gott. Apj 14:11

7 Oba opp de Städen en de Omjäajent haud de Väaschta von de Insel, met Nomen Publius, Lendarieen; dee neem ons frintlich opp un bedeend ons dree Doag. 8 Daut passieed oba, daut Publius sien Voda krank dol-lach aun Feeba un Derchfaul; Paulus jinkj bie am nenn, bäd un läd am de Henj opp un muak am jesunt. 9 Aus dit passieet wia, kjeemen uk de äwaje Kranke von de Insel doahan un worden jeheelt. 10 Un see beweesen ons väl Iea, un aus wie veleeten, jeewen see ons noch, waut doa needich wia.

11 Oba no dree Moonat säajeld wie met een alexandrischet Schepp, daut en de Insel äwawintat haud un haud de Figua von daut Breedapoakje*. 12 Un aus wie en Sierakus aunkjeemen, bleew wie doa dree Doag. 13 Un von doa säajeld wie rom un kjeemen no Region; un no een Dach, aus de Siedwint oppkjeem, kjeem wie aum näakjsten Dach no Puteoli. 14 Doa fung wie Breeda un worden von äant ermooticht, säwen Doag bie äant to bliewen, un soo kjeem wie no Room. 15 Un von doa kjeemen de Breeda, aus see von ons jehieet hauden, ons entjäajen, bat Apii-Forum un Tres-Tabernä. Aus Paulus äant sach, dankt hee Gott un foot Moot. 16 Aus wie oba no Room kjeemen, äwajeef de Hauptmaun de Jefangne aun dän bowaschten Hauptmaun äwa de Woak; oba Paulus wort erlaupt, oppoat to läwen, met eenem Soldot, dee am bewoakt. Apj 27:3

17 Daut passieed oba no dree Doag, daut Paulus de Väaschte von de Juden tooproopt; un aus dee toopkjeemen, säd hee to äant: Jie Mana un Breeda, ekj hab nuscht jäajen ons Volkj jedonen un uk nich jäajen onse vodaliche Jewanheiten, sie ekj doch een Jefangna von Jerusalem, äwajäft worden en de Reema äare Henj. Apj 23:1 18 Dise, aus see mie unjasocht hauden, wullen mie frie-loten, wiels kjeene Uasoak fa dän Doot en mie wia. 19 Oba aus de Juden doajäajen räden, sach ekj mie jedwungen, mie opp dän Kjeisa to beroopen; oba nich, aus wan ekj jäajen mien Volkj waut to kloagen haud. Apj 25:11 20 Om dise Uasoak haulwen hab ekj junt jeroopt, om junt to seenen un met junt to räden; wiels wäajens Israel äare Hopninj sie ekj met dise Kjäden jebungen. Apj 26:6-7 21 See oba säden to am: Wie haben nich Breew von Judäa jekjräajen wäajens die, uk nich eena von de Breeda, waut jekomen sent, haft von die waut Beeset berecht ooda jesajcht. 22 Oba wie wellen von die hieren, waut du denkjst; wiels von dise Sekt es ons bekaunt, daut aulawäajen jäajen dee jerät woat. Apj 24:14

23 Un aus see am eenen Dach bestemt hauden, kjeemen väle no am en de Woninj. To dee erkjläad un bezeijd hee Gott sien Rikj un äwazeijd äant von Jesus, beides, ut Moses sien Jesaz un de Profeeten, von zemorjes bat aum Owent. 24 Un atelje leeten sikj äwazeijen von waut hee säd, un atelje oba jleewden nich. 25 Un aus see sikj nich eenich wieren, jinjen see wajch, aus Paulus dit Wuat jerät haud: Wool haft de heilja Jeist derch dän Profeet Jesaja to onse Vodasch jerät, Jes 6:9-10 26 aus hee säd: "Go no dit Volkj un saj: Met daut Hieren woa jie hieren un nich vestonen, un seenent woa jie seenen un nich venämen; 27 wiels daut Hoat von dit Volkj es vehoatelt, un met de Uaren hieren see schwoa, un äare Uagen haben see toojeschloten; soo daut see nich met eenmol met de Uagen seenen un met de Uaren hieren un met daut Hoat vestonen un sikj bekjieren, soo daut ekj äant heelen kunn". 28 Soo sell jie nu weeten, daut de Heiden dise Radunk von Gott jeschekjt es; un see woaren daut hieren. Apj 13:46 29 Un aus hee dit jesajcht haud, jinjen de Juden doa wajch un hauden väle Froagen mank sikj selfst.

30 Paulus oba bleef twee Joa en siene ieejne jepachte Woninj un neem aul dee opp, dee no am kjeemen, 31 prädijd Gott sien Rikj un lieed von däm Harn Jesus Christus met aulem Friemoot onen Hindanis. Efs 6:20