1 Un daut passieed en Ikonion, daut see toop en de Juden äare Synagoge nenjinjen un räden, soo daut eene groote Häad jleewent wort, beides, Juden un Griechen. 2 De onjleewende Juden oba reizten un vebettaden de Heiden äare Seelen jäajen de Breeda. 3 See bleewen nu eene lange Tiet doa un lieeden friemootich en däm Harn, dee daut Wuat von siene Jnod Zeichnis jeef un leet Tieekjens un Wunda derch äare Henj passieren. Apj 19:11; Heb 2:4 4 Oba de Häad von de Staut deeld sikj, un atelje hilden daut met de Juden un de aundre met de Apostel. 5 Un aus sikj een Storm aunhoof von de Heiden un uk de Juden met äare Bowaschte, om äant to meshaundlen un to steenjen, 2Tim 3:11 6 un see daut enworden, kleiwden see ut no de Städa von Liekaonien, Liestra un Derbe, un en dee Omjäajent; 7 un doa vekjindijden see daut Evangelium.

8 Un en Liestra saut een jewessa Maun met schwake Feet un wia lom von Muttalief aun, dee noch niemols jegonen haud. 9 Disa hieed Paulus räden. Un aus hee am aunkjikjt un sach, daut hee Gloowen haud, jeheelt to woaren, Mat 9:28 10 säd hee met lude Stemm: Sto opprecht opp diene Feet! Un hee sprunk opp un jinkj. 11 Aus oba de Volkjshäaden sagen, waut Paulus jedonen haud, hoowen see äare Stemm un säden opp liekaonisch: De Jetta sent de Menschen jlikj jeworden un no ons raufjekomen. Apj 28:6 12 Un see nanden Barnabas Jupiter* un Paulus Merkurius*, wiels hee daut Wuat leid. 13 Oba de Priesta von Jupiter, dee ver de Staut wia, brocht Ossen un Kjrens no de Puat un wull met daut Volkj toop opfren. 14 Oba aus de Apostel Barnabas un Paulus daut hieeden, vereeten see äare Kjleeda un sprungen mank daut Volkj un schrieejen 15 un säden: Jie Mana, wuarom doo jie dit? Wie sent uk Menschen met deeselwje Jefeelen waut jie un vekjindjen junt, daut jie junt von dise Nutzloosichkjeiten bekjieren to däm läwendjen Gott, dee Himmel un Ieed un daut Mäa un aules, waut doabennen es, jemoakt haft; Apj 10:26 16 dee en de vegone Tiet aule Heiden en äare ieejne Wäaj gonen leet; Apj 17:30 17 un doch haft Hee sikj nich onen Zeichnis jeloten; Hee haft ons väl Goodet jedonen un vom Himmel Räajen un fruchtboare Tieden jejäft un onse Hoaten jefelt met Äten un Freid. 18 Un aus see dit säden, kunnen see knaup de Volkjshäad berujen, daut see nich to äant opfaden.

19 Doa kjeemen oba Juden von Antiochia un Ikonion un äwaräden daut Volkj un steenijden Paulus un schlapten am ut de Staut rut un dochten, daut hee jestorwen wia. 2Kor 11:25; 2Tim 3:11 20 Aus de Jinja sikj oba rom am kjrensten, stunt hee opp un jinkj en de Staut, un aum foljenden Dach reisd hee met Barnabas wajch no Derbe. 21 Un aus see en de Staut daut Evangelium vekjindicht un väle to Jinja jemoakt hauden, jinjen see wada trigj no Liestra un Ikonion un Antiochia, 22 stoakjten de Jinja äare Seelen un ermonden äant, em Gloowen to bliewen un daut wie derch väl Triebsaul en Gott sien Rikj nengonen motten. Ree 5:3-5; 1Tess 3:3 23 Un aus see en jieda Jemeent Eltestasch aunjestalt un jebät hauden met fausten, befoolen see äant däm Harn, aun däm see jleewent jeworden wieren. Apj 6:6

24 Un aus see derch Pisidien jereist wieren, kjeemen see no Pamfielien. 25 Un aus see daut Wuat en Perge jeprädicht hauden, jinjen see rauf no Atalja. 26 Un von doa säajelden see no Antiochia, von wua äant Gott siene Jnod wia aunbefolen worden fa daut Woakj, daut see verecht hauden. Apj 13:1-2 27 Aus see doa aunkjeemen, vesaumelden see de Jemeent un vekjindijden äant aules, waut Gott met äant jedonen haud un woo Hee de Heiden de Gloowens-Däa opjemoakt haud. 1Kor 16:9 28 Un see bleewen doa nich weinich Tiet met de Jinja.