1 Aus see oba derch Amfipolis un Apolonia reisden, kjeemen see no Tessalonich, wua eene Juden-Synagoge wia. 1Tess 2:2 2 Un Paulus jinkj bie äant nenn no Jewanheit un räd aun dree Sabaten met äant ut de Schreften, 3 erkjläad un läd väa, daut Christus must lieden un oppstonen von de Doodje un daut dis Jesus, dän ekj junt vekjindj, de Christus es. Luk 24:26-27 4 Un eenje von äant jleewden un jesalschoften sikj to Paulus un Silas, uk von de gottesferchtje Griechen eene groote Häad, un von de väanämste Frues, nich weinich. 1Tess 1:1; 2Tess 1:1 5 Oba de Onjleewende Juden worden voll Aufgonst un neemen to sikj atelje beese Romdriefs-Mana un muaken eene Grupp un brochten de Staut en Opprua un stormden Jason sien Hus un sochten äant, om äant ver daut Volkj to brinjen. 6 Oba aus see äant nich fungen, schlapten see Jason un atelje von de Breeda ver de Bowaschte von de Staut un schrieejen: Dise, dee de gaunze Welt en Opprua jebrocht haben, sent uk häa jekomen; Apj 16:20 7 dee haft Jason oppjenomen; un dise haundlen aula jäajen de Befälungen vom Kjeisa un sajen, doa es een aundra Kjennich, Jesus! Luk 23:2 8 Un see räajden daut Volkj un de Bowaschte vonne Staut opp, dee dit hieeden. 9 Oba aus see von Jason un de aundre Birjschoft kjrieejen, leeten see äant loos.

10 Oba de Breeda schekjten fuaz en de Nacht Paulus un Silas no Beria, wua see, aus see doahan kjeemen, en de Juden äare Synagoge nenjinjen. 11 Dise wieren aunstendja* aus dee von Tessalonich; see neemen daut Wuat gaunz wellich opp un forschten aule Dach en de Schreften, om to seenen, auf dit soo wia. Joh 5:39 12 Aulsoo jleewden väle von äant, uk von de griechische ieeboare Frues un Mana, nich weinich.

13 Aus oba de Juden en Tessalonich enworden, daut uk en Beria Gott sien Wuat von Paulus vekjindicht wort, kjeemen see uk doahan un räajden daut Volkj opp. 14 Oba de Breeda schekjten Paulus fuaz wajch, soo daut hee dan nom Mäa reisd; oba Silas un Timotäus bleewen doa. Apj 16:1 15 Dee oba Paulus bejleiten, brochten am no Ateen; un aus see eenen Befäl jekjräajen hauden fa Silas un Timotäus, daut see soo schwind aus mäajlich no am komen sullen, veleeten see.

16 Aus Paulus dan en Ateen no äant luad, räajd sien Jeist sikj opp en am, aus hee de Staut soo voll Aufjettarie sach. 17 Un hee unjahilt sikj en de Synagoge met de Juden un de Gottesferchtje un uk aule Dach oppem Moakjt met dee, dee hee doa auntroff. 18 Oba atelje von de epikurische un stoikische Filosofen streeden met am; un atelje säden: Waut well dis Blaubamauz sajen? Aundre: Hee schient een Prädja von framde Jetta to sennen, wiels hee vekjindijd äant daut Evangelium von Jesus un von de Opparstonunk. 1Kor 4:12 19 Un see neemen am un brochten am opp dän Areopag* un säden: Kjenn wie weeten, waut daut fa eene niee Lia es, wuavon du rätst? 20 Wiels du brinjst waut Framdet fa onse Uaren; nu well wie weeten, waut daut meent. 21 (Wiels aul de Ateena un uk de Utlenda, dee doa wonden, hauden met nuscht aundret soo jieren Tietvedrief, aus met waut Nieet to sajen ooda to hieren.)

22 Dan stunt Paulus opp medden opp däm Areopag un säd: Jie Mana von Ateen, ekj see daut aun aules, daut jie sea relijees sent! 23 Wiels aus ekj romjinkj un june Aunbädungs-Städen sach, funk ekj uk eenen Aultoa, aun däm jeschräwen stunt: "Däm onbekaunden Gott." Dän jie nu onweetent aunbäden, dän vekjindj ekj junt. 24 De Gott, dee de Welt jemoakt haft un aules, waut doabennen es, Hee, dee doa Har äwa Himmel un Ieed es, wont nich en henj-jemoakte Tempels. 1Kje 8:27 25 Am woat uk nich von Menschenhenj jedeent, soo aus wan Hee irjentwaut needich haud, wiels Hee selfst aulem daut Läwen un Odem un aules jeft. Ps 50:9-12 26 Un hee haft von een Bloot jieda Menschen-Jeschlajcht jemoakt, daut see opp däm gaunzen Ieedboddem wonen un haft em Verut Tieden bestemt un de Jrensen von äare Woninj, 5Mo 32:8; Mal 2:10 27 soo daut see dän Harn sieekjen sullen, auf see Am muchten feelen un finjen kjennen, wäarent Hee werkjlich nich wietauf es von eenem jiedren von ons. Jes 55:6 28 Wiels en Am läw un bewäaj wie ons un sent wie, soo aus atelje von june Dichta jesajcht haben: "Wie sent uk sien Jeschlajcht."

29 Wan wie nu Gott sien Jeschlajcht sent, sell wie nich denkjen, daut de Gottheit jlikj es met Golt, Selwa ooda Steen, een Bilt, derch menschliche Konst un Jedanken jemoakt. 1Mo 1:27 30 Oba Gott haft de Tiet von Onweetenheit äwaseenen, oba nu foddat Hee von aule Menschen aulawäajen, Busse to doonen. Apj 14:16 31 Wiels Hee haft eenen Dach jesat, wuarenn Hee de Welt rechten woat met Jerajchtichkjeit derch eenen Maun, däm Hee doatoo bestemt haft, derch dän Bewies, daut Hee Am von de Doodje oppjewakjt haft. Mat 25:31-33; Apj 10:42

32 Un aus see von de Opparstonunk von de Doodje hieeden, spataden atelje, un atelje säden: Wie wellen die doaräwa noch eenmol hieren. 33 Un soo jinkj Paulus von ut äare Medd wajch. 34 Atelje Mana oba schlooten sikj am aun un jleewden, mank woone wieren Dioniesius, een Areopageet*, un eene Fru met Nomen Damaris un noch aundre met äant toop.