1 Petrus un Johanes jinjen toop nopp en dän Tempel om de näajende Stund, de Jebäts-Stund. 2 Un een jewessa Maun, dee von siene Mutta äa Lief aun lom wia, wort jedroacht, dän see aule Dach aun de Tempel-Puat hansaden, dee de Scheene jenant woat, om Aulmoosen to prachren von dee, waut en dän Tempel nenjinjen. 3 Aus hee Petrus un Johanes sach, daut see en dän Tempel nengonen wullen, prachad hee, om Aulmoosen to kjrieen. 4 Petrus oba kjikjt am stia aun met Johanes un säd: Kjikj ons aun! 5 Hee oba moakjt opp äant un räakjend doamet, irjentwaut von äant to kjrieen. 6 Oba Petrus säd: Selwa un Golt hab ekj nich; oba waut ekj hab, jäw ekj die: En Jesus Christus von Nazaret sien Nomen, sto opp un go! 7 Un hee foot am aun de rajchte Haunt un recht am opp. Un fuaz worden siene Feet un Feetjelenkja stoakj; 8 un hee hupst opp, stunt un wort gonent, un hee jinkj met äant en dän Tempel, jinkj un sprunk un lowd Gott.

9 Un aul daut Volkj sach am gonen un Gott lowen. 10 Un see erkjanden am, daut hee dee wia, dee wäajens Aulmoosen aun de scheene Tempel-Puat jesäten haud; un see worden met Wunda un Staunen jefelt, äwa waut am passieet wia.

11 Aus oba dis jeheelda Loma sikj aun Petrus un Johanes hilt, rand aul daut Volkj no äant en de Haul, jenant Salomo siene, un vewundaden sikj. Joh 10:23; Apj 5:12 12 Aus Petrus daut sach, auntwuad hee daut Volkj: Jie Mana von Israel, wuarom wundat junt dit, ooda wuarom kjikj jie soo opp ons, aus wan wie derch onse ieejne Krauft un Fromheit am haben gonen jemoakt? 13 De Gott äwa Abraham un Isaak un Jakob, de Gott von onse Vodasch, haft sienen Sän* Jesus veharlicht; Am hab jie äwajäft un ver Pilatus veloagen, aus dee uadeeld, Am loos to loten. 14 Jie oba haben dän Heiljen un Jerajchten veloagen un foddaden, daut junt eenen Maun, eenen Merda, jeschonken wort. Mat 27:20-21 15 Oba jie muaken dän Läwens-Aunfenja doot, dän Gott von de Doodje opperwakjt haft, wuavon wie Zeijen sent. 16 Un derch dän Gloowen aun sienen Nomen haft sien Nomen disen, dän jie seenen un kjanen, stoakj jemoakt; un de Gloowen, waut derch Am es, haft am dise vollkomne Jesuntheit jejäft ver junt aulem.

17 Un nu, jie Breeda, ekj weet, daut jie en Onweetenheit jehaundelt haben, soo aus uk june Väastona. Luk 23:34 18 Gott oba haft daut soo erfelt, waut Hee derch aul siene Profeeten äa Mul verhäa aunjesajcht haft, daut Christus lieden sull. Luk 24:44 19 Doot nu Busse un bekjieet junt, daut june Sinden aufjelascht woaren, soo daut vom Harn sien Aunjesecht Tieden von Erfreschunk komen kjennen, Apj 2:38 20 un daut Hee junt dän verhäa jeprädichten Jesus Christus schekjen wudd, 21 dän de Himmel oppnämen must, bat en de Tieden, wua aules wada-häajestalt woat, wuavon Gott derch daut Mul von aul siene heilje Profeeten von jeehäa jerät haft. 22 Wiels Moses haft werkjlich to de Vodasch jesajcht: "Eenen Profeet woat junt de Har, jun Gott, ut june Breeda oppwakjen, soo aus mie; Am sell jie horchen en aules, waut Hee junt sajen woat. 5Mo 18:15,19 23 Un daut woat passieren, daut jieda Seel, dee nich opp disen Profeet horchen woat, saul vom Volkj utjerot woaren." 3Mo 23:29 24 Un aul de Profeeten von Samuel aun un dee nohäa, sooväl aus jerät haben, dee haben uk dise Doag aunjesajcht. 25 Jie sent de Säns von de Profeeten un von däm Bunt, dän Gott met onse Vodasch jeschloten haft, wäarent Hee to Abraham säd: "En dienem Nokomen sellen aul de Jeschlajchta von de Ieed jesäajent woaren." 1Mo 22:18 26 Un ieeschtens haft Gott fa junt sienen Sän Jesus oppjewakjt un Am schekjt, junt to säajnen, endäm sikj een jiedra von siene Boosheit wajchdreit. Apj 13:46