1 De Apostel un de Breeda, waut en Judäa wieren, hieeden, daut uk de Heiden Gott sien Wuat aunjenomen hauden. 2 Un aus Petrus noppkjeem no Jerusalem, streeden dee von de Beschniedunk met am 3 un säden: Du best bie de onbeschnädne Mana nenjegonen un hast met äant toop jejäten! Gal 2:12

4 Petrus oba funk aun un vetald äant aules no de Rieej un säd: 5 Ekj wia en de Staut Joppe un bäd; un ekj sach en eene Entzikjunk eene Vision, een jewesset Jefäss kjeem rauf, soo aus een grootet Loaken, daut aun vea Akjen vom Himmel raufjeloten wort, un daut kjeem bat mie. Apj 10:9-48 6 Un aus ekj doa nenkjikjt, sach ekj vea-feetje Tieren von de Ieed un wille Tieren un Krupende un Väajel vom Himmel. 7 Un ekj hieed eene Stemm, dee säd to mie: Sto opp, Petrus, schlacht un at! 8 Ekj oba säd: Oo nä, Har, wiels doa es niemols waut Jemeenet ooda Onreinet en mien Mul jekomen. 9 Oba de Stemm auntwuad mie toom tweedemol vom Himmel: Waut Gott jereinicht haft, daut hool du nich jemeen. 10 Dit passieed oba dreemol; un aules wort wada en dän Himmel noppjetrocken. 11 Un kjikj, fuaz stunden dree Mana ver daut Hus, wua ekj bennen wia, dee von Cäsarea no mie jeschekjt wieren. 12 Un de Jeist säd to mie, daut ekj met äant gonen sull un nich twiewlen. Doa kjeemen oba uk dise sas Breeda met mie, un wie jinjen en däm Maun sien Hus. 13 Un hee vetald ons, woo hee eenen Enjel jeseenen haud, dee doa en sien Hus stunt un to am säd: Schekj Mana no Joppe un lot Simon, met däm Bienomen Petrus, holen; 14 dee woat Wieed to die räden, derch woone du un dien gaunzet Hus woaren jerat woaren. 15 Un aus ekj aunfunk to räden, foll de Heilja Jeist opp äant, jrod soo aus opp ons aum Aunfank. Apj 1:1-4 16 Dan docht ekj aun däm Harn sien Wuat, soo aus Hee säd: Johanes haft met Wota jedeept, jie oba sellen met däm Heiljen Jeist jedeept woaren. Apj 1:5 17 Wan nu Gott äant deeselwje Gow jejäft haft soo aus uk ons, dee wie aun dän Harn Jesus Christus jejleeft haben, wäa wia ekj, daut ekj kunn Gott wäaren? 18 Aus see oba dit hieeden, berujden see sikj un lowden Gott un säden: Aulsoo haft Gott uk de Heiden de Omkjia jejäft toom Läwen!

19 Dee nu, dee vestreit wieren derch de Vefoljunk, dee wäajens Stefanus oppkjeem, jinjen derch bat Feenizien un Ziepern un Antiochia un räden to kjeenem daut Wuat, aus auleen to de Juden. Apj 8:1-4 20 Doa wieren oba atelje mank äant, Mana von Ziepern un Kiereen, woone, aus dee no Antiochia kjeemen, räden see uk to de Griechen un vekjindijden daut Evangelium vom Harn Jesus. 21 Un däm Harn siene Haunt wia met äant, un eene groote Zol wort jleewent un bekjieed sikj toom Harn. Apj 2:47

22 Dan kjeem dise Norecht von äant ver de Uaren von de Jemeent en Jerusalem, un see schekjten Barnabas, daut hee derchjinkj bat Antiochia. Apj 4:36 23 Un aus hee hanjekomen wia, un Gott siene Jnod sach, freid hee sikj un ermond aulem, daut see von gaunzem Hoaten biem Harn bliewen sullen. 24 Wiels hee wia een gooda Maun, voll Heiljen Jeist un Gloowen. Un doa wort eene groote Häad däm Harn biejedonen. Apj 5:14 25 Un Barnabas reisd wieda no Tarsus, om Saulus wada to sieekjen. Apj 9:30 26 Un aus hee am jefungen haud, brocht hee am no Antiochia. Un see bleewen doa een gaunzet Joa un kjeemen en de Jemeent toop un lieeden eene groote Häad, un de Jinja worden en Antiochia daut ieeschte Christen jenant. Gal 2:11

27 Un en dise Doag kjeemen Profeeten von Jerusalem rauf no Antiochia. Apj 13:1; 15:32 28 Un eena von äant, met Nomen Agabus, stunt opp un wees derch dän Jeist eene groote Hungaschnoot aun, dee doa komen sull äwa de gaunze Welt; dee dan uk unja däm Kjeisa Klaudius passieed. Apj 21:10 29 Un de Jinja entschlooten, daut een jiedra, doano aus hee em Vemieejen wia, de Breeda, waut en Judäa wonden, eene Methelp to schekjen, 30 waut see dan uk deeden, un schekjten dee no de Eltestasch derch de Haunt von Barnabas un Saulus. Apj 12:25; 1Kor 16:1-4