1 Oba een jewessa Maun, met Nomen Ananias, met siene Fru Safira, vekoft een Goot 2 un hilt waut von daut Jelt trigj, un siene Fru wist daut uk, un brocht een Deel doavon un läd de Apostel daut vere Feet. Apj 4:34-37 3 Petrus oba säd: Ananias, wuarom haft de Soton dien Hoat jefelt, om dän Heiljen Jeist väa to lieejen un waut von daut Jelt vom Aka trigj-hoolen wurscht? 4 Hautst du dän nich fa die behoolen kunt? Un aus du dän vekoft hautst, wia daut nich en diene Macht? Wuarom neemst du die en dien Hoat dan soon Woakj väa? Du hast nich Menschen väajeloagen, oba Gott. 5 Aus oba Ananias dise Wieed hieed, foll hee han un storf. Un eene groote Forcht kjeem äwa aule, dee dit hieeden. 6 Dan stunden de junge Mana opp, wekjelden am en, druagen am rut un begrowden am.

7 Un daut passieed onjefäa om dree Stund, dan kjeem siene Fru nenn un wist nich, waut passieet wia. 8 Dan auntwuad Petrus ar: Saj mie, auf jie dän Aka fa sooväl vekoften? See säd: Jo, fa sooväl. 9 Petrus oba säd to ar: Wuarom sent jie junt eenich jeworden, däm Harn sien Jeist to vesieekjen? Kjikj, de Feet von dee, dee dienen Maun begroft haben, sent ver de Däa un woaren die rutdroagen. 10 Un see foll fuaz ver siene Feet dol un storf. Un aus de junge Mana nenkjeemen, fungen see ar doot, druagen ar rut un begrowden ar bie äarem Maun. 11 Un doa kjeem eene groote Forcht äwa de gaunze Jemeent un äwa aule, dee dit hieeden.

12 Un derch de Apostel äare Henj passieeden väle Tieekjens un Wunda mankem Volkj; (un see wieren aula eenstemmich toop en Salomo siene Haul. Apj 3:11 13 Oba von de aundre woagd kjeena, sikj äant aun to schluten; oba daut Volkj schazt äant huach. 14 Un emma mea Jleewende worden däm Harn biejedonen, Häaden, beides, Mana un Frues,) Apj 2:47 15 soo daut see de Kranke opp de Gaussen rutdruagen un opp Baden un Loagasch läden, daut, wan Petrus vebie kjeem, sien Schauten weenstens äwa irjent eenen komen sull. Apj 19:11-12 16 Doa kjeemen oba uk väle ut de omligjende Städa no Jerusalem un brochten de Kranke un dee, waut von onreine Jeista jeploacht wieren, un dee worden aula jeheelt.

17 Doa stunt de Huagapriesta opp un aule, dee met am wieren, daut es de Saduzäa Sekt, un worden von Iewa jefelt, Apj 4:1,6 18 un see läden äare Henj aun de Apostel un stopten äant en daut effentliche Jefenkjnis. 19 Oba däm Harn sien Enjel muak en de Nacht de Jefenkjnis-Däaren op un brocht äant rut un säd: Apj 12:7 20 Got han, stot un rät em Tempel toom Volkj aul de Wieed von dit Läwen. 21 Aus see daut jehieet hauden, jinjen see tiedich zemorjes en dän Tempel nenn un lieeden. De Huagapriesta oba kjeem un dee, dee met am wieren, un see roopten dän huagen Rot toop un aul de Eltestasch von de Kjinja Israel un schekjten nom Jefenkjnis, äant to holen. 22 Oba aus de Deena hankjeemen, fungen see äant nich em Jefenkjnis, un see jinjen trigj un berechten daut 23 un säden: Wie troffen daut aun, daut daut Jefenkjnis veschloten wia met aul de Vesechrunk un de Wajchta buta de Däaren stonen; aus wie oba opmuaken, fung wie doa kjeenen bennen. 24 Aus nu de Huagepriesta un de Tempel-Hauptmaun un de Priesta dise Wieed hieeden, wieren see bekjemmat äwa äant, äwa waut doavon noch woaren wudd.

25 Dan kjeem eena un säd to äant: Kjikj, de Mana, dee jie en daut Jefenkjnis stopten, stonen em Tempel un lieren daut Volkj. 26 Dan jinkj de Hauptmaun met de Deena han un brochten äant, nich met Jewault, wiels see ferchten daut Volkj, daut see kunnen jesteenicht woaren.

27 Un see brochten äant un stalden äant ver dän huagen Rot; un de Huagapriesta fruach äant un säd: 28 Hab wie junt nich strenj veboden, en disem Nomen to lieren? Un kjikj, jie haben Jerusalem met june Lia jefelt un wellen daut Bloot von disem Mensch opp ons brinjen. Apj 4:18 29 Oba Petrus un de Apostel auntwuaden un säden: Maun mott Gott mea jehorchen aus Menschen. Dan 3:17-18; Apj 4:19 30 Onse Vodasch äa Gott haft Jesus opperwakjt, dän jie dootjemoakt haben, aus jie Am aun daut Holt jehongen haben. Apj 3:15 31 Dän haft Gott derch siene Rajchte toom Fiera un Rada erhowen, om Israel Busse un Sinden-Vejäwunk to jäwen. Apj 2:33 32 Un wie sent siene Zeijen fa dise Dinja un uk de Heilja Jeist, dän Gott deejanje jejäft haft, dee Am jehorchen. Luk 24:48

33 Aus see oba daut hieeden, jinkj äant daut derch daut Hoat, un see haundelden, äant doot to moaken. 34 Dan stunt oba eena em huagen Rot opp, een Farisäa met Nomen Gamaliel, een Jesaz-Liera, dee biem gaunze Volkj aunjeseenen wia un befool, de Apostel fa eene korte Tiet rut to doonen Apj 22:3 35 un säd to äant: Jie Mana von Israel, nämt junt selfst en acht, waut jie met dise Menschen doonen wellen. 36 Wiels ver dise Doag stunt Teudas opp un säd, daut hee selfst wäa wia, däm eene Zol von bie vea-hundat Mana aunhonk; dee es jeschloagen worden un aul dee, dee am Jehia jeewen, sent vestreit un to nuscht jeworden. 37 No disem stunt Judas, de Galiläa, opp, en dee Doag von de Enschriewunk, un muak väl Volkj auffaulen un am foljen, un dee es uk omjekomen un aul dee, sooväl aus am Jehia jeewen, sent vestreit. 38 Un nu saj ekj junt: Lot auf von dise Menschen un lot äant toch. Wan dis Rot ooda dit Woakj von Menschen es, dan woat daut unjagonen; Mat 15:13 39 es daut oba von Gott, dan kjenn jie daut nich venichten; un mucht jie nich aus soone jefungen woaren, dee jäajen Gott kjamfen. 40 Un see jeewen am Jehia; un aus see de Apostel jeroopt hauden, schluagen see dee un jebooden äant, nich en Jesus sien Nomen to räden, un leeten äant loos. Mat 10:17

41 See oba jinjen froo von de Jäajenwuat vom huagen Rot, wiels see wirdich jewast wieren, om sien Nomens haulwen Schmach to lieden. Mat 5:10-12; 1Pe 4:13 42 Un see hieeden nich opp, aule Dach em Tempel un han un häa en de Hiesa to lieren un daut Evangelium von Jesus Christus to vekjindjen.